ଭୁବନେଶ୍ୱର: ହୋଣ୍ଡା ମୋଟରସାଇକଲ୍ ଆଣ୍ଡ୍ ସ୍କୁଟର୍ ଇଣ୍ଡିଆ ପ୍ରାଇଭେଟ୍ ଲିମିଟେଡ୍ (ଏଚଏମ୍ଏସ୍ଆଇ) ପକ୍ଷରୁ ଗୁଜରାଟର ଦ୍ୱାରକା ଜିଲ୍ଲାର ଭାନ୍ବାଡ୍ ଠାରେ ଦ୍ୱିତୀୟ ଟରବାଇନ୍ ବ୍ୟବସ୍ଥାକୁ ଉଦଘାଟନ କରାଯାଇଛି । କଂପାନିର ବିଠଲ୍ପୁର କାରଖାନା ଠାରୁ ୩୫୦ କିମି ଦୂରରେ ଏହି ପ୍ଲାଂଟ୍ ଅବସ୍ଥିତ ରହିଛି । ଏହାକୁ ୧୭୬ ନିୟୁତ ଟଙ୍କା ନିବେଶରେ ସ୍ଥାପନ କରାଯାଇଛି ଯେଉଁଥିରୁ ମୋଟ ୪.୭ ମେଗାୱାଟ୍ ପବନରୁ ବିଦ୍ୟୁତ୍ ଶକ୍ତି ଉତ୍ପାଦନ ହେବ । କଂପାନି ଏହାର ପ୍ରଥମ ପବନ ଟରବାଇନ୍ ୟୁନିଟ୍କୁ ଗୁଜରାଟର ପଟନ୍ ଜିଲ୍ଲାର ରାଧାନ୍ପୁର୍ରେ ସ୍ଥାପନ କରାଯାଇଥିଲା ।
ଏଚ୍ଏମ୍ଏସ୍ଆଇର ହରିୟାଣାରେ ଥିବା ମାନେସର୍, ରାଜସ୍ଥାନର ଟାପୁକାରା, କର୍ଣ୍ଣାଟକର ନର୍ସାପୁର୍ ଓ ଗୁଜରାଟର ବିଠଲ୍ପୁରରେ ଥିବା ଚାରି କାରଖାନାର ୫୦%ରୁ ଅଧିକ ଶକ୍ତି ଆବଶ୍ୟକତାକୁ ଏବେ ଅକ୍ଷୟ ଶକ୍ତି ଉତ୍ସରୁ ପୂରଣ କରିପାରିବ ।
ନୂଆ ୟୁନିଟ୍ର ଉଦଘାଟନ ଅବସରରେ ଆତ୍ସୁସି ଓଗାତା, ପରିଚାଳନା ନିର୍ଦେଶକ, ସଭାପତି ଓ ସିଇଓ, ହୋଣ୍ଡା ମୋଟରସାଇକଲ୍ ଆଣ୍ଡ୍ ସ୍କୁଟର୍ ଇଣ୍ଡିଆ କହିଛନ୍ତି ଯେ, “ସାମଜ ପ୍ରତି ଦାୟିତ୍ୱବଦ୍ଧତା ବିଷୟରେ କଂପାନି ଅବଗତ ଥିବା ବେଳେ ଏବେ ଓ ଭବିଷ୍ୟତରେ ହୋଣ୍ଡାରେ ଆମ ପାଇଁ ଗୁରୁତ୍ୱର ବିଷୟ ହେଉଛି ଶକ୍ତି ସୁରକ୍ଷା । ତାପଜ ବିଦୁ୍ୟତ୍ ଉପଯୋଗିତାକୁ ହ୍ରାସ କରିବା ସହ ୨୦୫୦ ସୁଦ୍ଧା କାର୍ବନ୍ ନୁ୍ୟଟ୍ରାଲ୍ ପାଇଁ ହୋଣ୍ଡା ପକ୍ଷରୁ ପରିବେଶକୁ ନେଇ ଥିବା ଦୀର୍ଘମିଆଦୀ ଲକ୍ଷ୍ୟକୁ ହାସଲ କରିବାର ଆଉ ଟିକେ ନିକଟତର ହୋଇଛି ଏଚ୍ଏମ୍ଏସ୍ଆଇ । ଆମ ଉତ୍ପାଦ ଓ ବ୍ୟବସାୟ କାର୍ଯ୍ୟକଳାପ ରେ ପରିବେଶ ଉପରେ ରହୁଥିବା ପ୍ରଭାବ ହ୍ରାସ କରିବା ଦିଗରେ ଗୁଜରାଟରେ ଆମର ଦ୍ୱିତୀୟ ପବନ ଟରବାଇନ୍ ଆଉ ଏକ ପଦକ୍ଷେପ । ପ୍ରାକୃତିକ ପରିବେଶକୁ ସୁରକ୍ଷିତ ରଖିବା ଦିଗରେ ଆମର ଉଦ୍ୟମ ପ୍ରତି ଆମେ ପ୍ରତିବଦ୍ଧ ରହିଛୁ ।’’
ଅକ୍ଷୟ ଶକ୍ତି ପ୍ରତି ନିଜର ଉଦ୍ୟମକୁ ଆହୁରି ବ୍ୟାପକ କରି ହୋଣ୍ଡା ୨ହ୍ୱିଲର୍ସ ଇଣ୍ଡିଆ ପକ୍ଷରୁ ନିରନ୍ତର ଭାବେ ଶକ୍ତି ଉତ୍ପାଦନ ଲାଗି ନିରନ୍ତର ସମ୍ବଳରେ ନିବେଶ କରାଯାଉଛି । ବର୍ଷକୁ ୬୬ ମେଗାୱାଟ୍ ଶକ୍ତି ଉତ୍ପାଦନ କରି ଏଚ୍ଏମ୍ଏସ୍ଆଇ ଏହାର ଉତ୍ପାଦନ କାରଖାନାଗୁଡ଼ିକର ଅକ୍ଷୟ ଶକ୍ତି ଆବଶ୍ୟକତାକୁ ପୂରଣ କରୁଛି । ୨୦୨୦-୨୧ରେ ଏଚ୍ଏମ୍ଏସ୍ଆଇ ପକ୍ଷରୁ ଅକ୍ଷୟ ଶକ୍ତି ଉତ୍ସରୁ ୭୭ ନିୟୁତ କିଲୋୱାଟ୍ ର ୟୁନିଟ୍ ବିଦୁ୍ୟତ୍ ଶକ୍ତି ଉତ୍ପାଦନ କରାଯାଇଥିଲା ଯାହା ଫଳରେ ୫୫,୦୦୦ ମେଟ୍ରିକ୍ ଟନ୍ରୁ ଅଧିକ ଅଙ୍ଗାରକାମ୍ଳ ଗ୍ୟାସ୍ ନିର୍ଗମନକୁ ହ୍ରାସ କରାଯାଇପାରିଛି ।
