ଏହା ଆମେ ସମସ୍ତେ ଜାଣନ୍ତି ଯେ, ସବୁଜ ପନିପରିବା ଖାଇବା ସ୍ବାସ୍ଥ୍ୟ ପାଇଁ ନିହାତି ଆବଶ୍ୟକୀୟ। ଏହାଦ୍ବାରା ଶରୀରକୁ ମୁଖ୍ୟ ପୋଷକ ତତ୍ତ୍ବ ମିଳିଥାଏ। ତେବେ ବିଭିନ୍ନ ପ୍ରକାରର ସବୁଜ ପନିପରିବା ମଧ୍ୟରୁ ମଟର ଛୁଇଁ ପ୍ରାୟତଃ ସମସ୍ତଙ୍କୁ ଖାଇବାକୁ ଭଲ ଲାଗିଥାଏ। ଆଜିକାଲି ସବୁ ସମୟରେ ଏହା ବଜାରରରେ ଉପଲବ୍ଧ ହେଉଥିଲେ ମଧ୍ୟ ମୁଖ୍ୟତଃ ଏହି ପରିବାର ଚାହିଦା ଶୀତଦିନେ ଅଧିକ ଦେଖିବାକୁ ମିଳିଥାଏ। ଆମେ ସମସ୍ତେ ମଟର ଛୁଇଁ ଖାଉ ସତ ହେଲେ ଏହାର ଉପକାରୀ ଗୁଣ ବିଷୟରେ ହୁଏତ କ୍ବଚିତ୍ ଲୋକ ଜାଣିଥିବେ। ଏହାର ଉପକାରୀତା ବିଷୟରେ ଜାଣିଲେ ଏହାକୁ ଆପଣ ସବୁଦିନ ଖାଇବା ଆରମ୍ଭ କରିଦେବେ। ତେବେ ଚାଲନ୍ତୁ ଜାଣିବା ମଟର ଛୁଇଁ ଆମ ସ୍ବାସ୍ଥ୍ୟର କି ଉପକାର କରିଥାଏ –
ଓଜନ ହ୍ରାସ କରିବାରେ ସହାୟକ ହୋଇଥାଏ :
ଓଜନ କମ୍ କରିବା ପାଇଁ ମଟର ଛୁଇଁ ଖାଇବା ଲାଭଦାୟକ ହୋଇଥାଏ। ଏଥିରେ ଭରପୂର ମାତ୍ରାରେ ଫାଇବର୍ ରହିଥାଏ। ଏଥିସହିତ କ୍ୟାଲୋରୀ ଏବଂ କମ୍ ଫ୍ୟାଟ୍ ଥାଏ। ଯାହା ଶରୀରର ଓଜନକୁ କମ୍ କରିବାରେ ସହାୟକ ହୋଇଥାଏ । ଏହାକୁ ଖାଦ୍ୟରେ ସାମିଲ କରିବା ଦ୍ବାରା ଏଥିରେ ଥିବା ଫାଇବର ସାରାଦିନ ଶକ୍ତି ଯୋଗାଇଥାଏ।
ହାଡ଼ ଶକ୍ତ କରିଥାଏ :
ମଟର ଛୁଇଁରେ ଭିଟାମିନ୍ ଭରପୁର ମାତ୍ରାରେ ରହିଛି। ଯାହା ଆପଣଙ୍କ ଶରୀରର ହାଡ଼କୁ ମଜବୁତ୍ କରିବାରେ ସହାୟକ ହୋଇଥାଏ। ମଟର ଛୁଇଁ ଆପଣଙ୍କ ହାଡ଼କୁ ଓଷ୍ଟେଓପୋରୋସିସ୍ ପରି ଭୟଙ୍କର ରୋଗରୁ ଦୂରେଇ ରଖିଥାଏ। ହାଡ଼ର ସୁରକ୍ଷା ପାଇଁ ସବୁଜ ମଟର ଖାଇବା ନିହାତି ଜରୁରୀ।
କୋଲେଷ୍ଟ୍ରଲ ନିୟନ୍ତ୍ରିତ ରହିଥାଏ :
ମଟର ଛୁଇଁର ସେବନ ଆପଣଙ୍କ ଶରୀରର କୋଲେଷ୍ଟ୍ରଲକୁ ନିୟନ୍ତ୍ରଣରେ ରଖିଥାଏ। ଏଥିରୁ ମିଳୁଥିବା ପ୍ରୋଟିନ୍ ବହୁ ଗମ୍ଭୀର ରୋଗରୁ ମୁକ୍ତି ଦେଇଥାଏ ।
ହୃଦରୋଗରୁ ରକ୍ଷା କରେ :
ସବୁଜ ମଟରରେ ଏମିତି ଗୁଣ ରହିଥାଏ ଯାହା ହୃଦ୍ ସମ୍ବନ୍ଧୀୟ ରୋଗରୁ ରକ୍ଷା କରିଥାଏ। ଏଥିରେ ଲୌହ, ଜିଙ୍କ୍, କପର ବହୁ ମାତ୍ରାରେ ରହିଥାଏ। ଏହା ବ୍ୟତୀତ ମଟର ଛୁଇଁରେ ଆଣ୍ଟିଅକ୍ସିଡାଣ୍ଟ ମଧ୍ୟ ରହିଥାଏ। ଏହା ଶରୀରର ରୋଗ ପ୍ରତିରୋଧକ କ୍ଷମତା ବୃଦ୍ଧି କରିଥାଏ।
