ମ୍ୟାଲେରିଆ ଔଷଧର କାର୍ଯ୍ୟକାରୀ ଏବଂ ନୂଆ ପ୍ରଜାତିର ମଶା ଉପରେ ଆମେରିକା ଡାକ୍ତରଙ୍କ ଗବେଷଣା

ହରଭଙ୍ଗା: ମ୍ୟାଲେରିଆ ରୋଗର ଗବେଷଣା ଏବଂ ବର୍ତମାନର ସ୍ଥିତି ଅନୁଧ୍ୟାନ ପାଇଁ ବୌଦ୍ଧ ଜିଲା ହରଭଙ୍ଗା ବ୍ଲକର ଦୁର୍ଗମ ଅଞ୍ଚଳ ଲେଙ୍ଗରପାଜୁ ଗାଁରେ ଜାତୀୟ ସ୍ୱାସ୍ଥ୍ୟ ଅନୁଷ୍ଠାନ (ଏନଆଇଏଚ) ଓାଶିଂଟନ, ଆମେରିକାରୁ ଆସିଥିବା ମ୍ୟାଲେରିଆ ଗବେଷଣା ଡାକ୍ତର ମାଲ୍ଲା ରାଓଙ୍କ ସହିତ ଏକ ୧୦ ଜଣିଆ ଡାକ୍ତରୀ ଦଳ ସେଠାରେ ପହଞ୍ଚିଥିଲେ। ସେଠାରେ ରହୁଥିବା ଅଧିବାସୀଙ୍କ ସହିତ ମ୍ୟାଲରେିଆ ରୋଗ ସର୍ମ୍ପକରେ ବିସ୍ତୃତଭାବେ ଆଲୋଚନା କରିଥିଲେ। ଅଧିବାସୀଙ୍କ ଜୀବନେଶୈଳୀ, ପିଉଥିବା ପାଣି, ମଶାରୀ ବ୍ୟବହାର ଉପରେ ସେମାନଙ୍କ ସହିତ ମ୍ୟାଲେରିଆ ଗବେଷକ ଡାକ୍ତରୀ ଦଳ ପଙ୍ଖାନୁପଙ୍ଖ ଆଲୋଚନା କରିଥିଲେ। ମ୍ୟାଲେରିଆ ନିରାକରଣ ଦିଗରେ ଲୋକଙ୍କୁ ବୁଝାଇବା ସହିତ ପିଇବା ପାଣି, ମଶାରୀ ବ୍ୟବହାର ଦିଗରେ ସଚେତନତା କରିଥିଲେ। ନୂଆ ପ୍ରଜାତିର ମଶା, ମଶାଙ୍କ ପ୍ରାର୍ଦୁଭାବ, ଔଷଧ ସଠିକ୍ କାମକରୁଛି କି ନାହିଁ, ଲୋକଙ୍କ ଦେହରେ ମ୍ୟାଲେରିଆ ପ୍ରତିରୋଧକ ଶକ୍ତି କେତେ ମାତ୍ରାରେ ରହୁଛି ସେ ସବୁ ଦିଗରେ ମ୍ୟାଲେରିଆ ଗବେଷକ ଡାକ୍ତରୀ ଦଳ ଅନୁଧ୍ୟାନ କରିଥିଲେ। ଏହି ଟିମରେ ଆମେରିକାରୁ ଆସିଥିବା ମ୍ୟାଲେରିଆ ପ୍ରୋଗାମ ଅଫିସର ଡାକ୍ତର ମାଲ୍ଲା ରାଓଙ୍କ ସହିତ ଡା.ସଞ୍ଜୀବ ମହାନ୍ତି, ଡା.ପ୍ରଭାକର ସାହୁ, ଡା.ଏଚ.ଏ ହାକୁଭ୍, ଡା.ତିମିର କୁମାର ପ୍ରଧାନ, ଅସିତ କୁମାର ସାମଲ, ସତ୍ୟ ପାଣିଗ୍ରାହୀ, ଜୋହାନ ପି ଲାକର, ବୌଦ୍ଧ ମ୍ୟାଲେରିଆ ଅଫିସର ମଦନମୋହନ ପ୍ରଧାନ, ଭିବିଡିସି ସ୍ୱସ୍ତି କୁମାର ଏବଂ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଆଡେଣିଗଡର ରବିନ କୁମାର ପ୍ରଧାନ, ଇନଚାର୍ଜ ପିଏଚଇ.ଓ ଈଶ୍ୱର ବେହେରା, ଏଚଡବ୍ଲ୍ୟୁ ବିରେନ୍ଦ୍ର କହଁର, ମହିଳା ସ୍ୱାସ୍ଥ୍ୟ କର୍ମୀ ସାବିତ୍ରୀ, ଅଙ୍ଗନଓାର୍ଡୀ କର୍ମୀ ଜ୍ୟୋସ୍ନା ଯାନୀ, ଆଶାକର୍ମୀ ଜେମାମଣି ଯାନୀ ପ୍ରମୁଖ ସାମିଲ ଥିଲେ।

ସୂଚନା ଅନୁସାରେ ବୌଦ୍ଧ ଜିଲାରେ ମ୍ୟାଲେରିଆ ରୋଗ ନିୟନ୍ତ୍ରଣରେ ରହିଛି। ଜିଲାରେ ୩ଶହରୁ ଅଧିକ ମ୍ୟାଲେରିଆ ରୋଗୀ ଚିହ୍ନଟ ହେଉଥିବାବେଳେ ଏହି ରୋଗର ମୂଳତ୍ପୋଟନ ପାଇଁ ଆମେରିକା ମ୍ୟାଲେରିଆ ଗବେଷକଙ୍କ ଏକ ଟିମ ମେଲେରିଆ ପ୍ରବଣ ଲେଙ୍ଗରପାଜୁରେ ପହଞ୍ଚି ରୋଗର ବର୍ତ୍ତମାନର ସ୍ଥିତି ଅନୁଧ୍ୟାନ ସହିତ ନୂତନ ପ୍ରଜାତିର ମଶା ଉପରେ ବିଭିନ୍ନ ବୈଜ୍ଞାନିକ ଅନୁସନ୍ଧାନ କରିଥିଲେ। ଏହାପରେ ଏ ବିଷୟରେ ଜିଲାସ୍ତରୀୟ ପ୍ରଶାସନିକ ଅଧିକାରୀଙ୍କ ସହିତ ଆଲୋଚନା କରିଥିବା ଜଣାପଡିଛି।