ଦିନରେ ଚିକେନ ବେପାରୀ, ରାତିରେ ଗାଡ଼ି ଚୋର

ଗୁରୁଡ଼ିଝାଟିଆ: ଦିନରେ ଖୁଣ୍ଟୁଣୀ ବଜାରରେ ଚିକେନ ବ୍ୟବସାୟ ଓ ରାତିରେ ବିଭିନ୍ନ ଜିଲ୍ଲାରୁ ବାଇକ ଚୋରିକରି ବିକ୍ରୟ କରୁଥିବା କୁଖ୍ୟାତ ଆନ୍ତଃଜିଲ୍ଲା ବାଇକଚୋରି ଦଳର ମୁଖ୍ୟ ରାକିବ୍‌‌ ଖାନ୍‌‌ ନାମକ ଯୁବକକୁ ଖୁଣ୍ଟୁଣୀ ପୁଲିସ ଗିରଫ କରି ଅଦାଲତ ଚାଲାଣ କରିଛି। ତା’ ନିକଟରୁ ୮ଟି ବାଇକ ଜବତ କରାଯାଇଛି। ଖୁଣ୍ଟୁଣୀ ଥାନା ଅଧିକାରୀ ଭବାନୀ ଶଙ୍କର ଖୁଣ୍ଟିଆ ଓ ଉପନିରୀକ୍ଷକ ଡଃ ବିକାଶ କୁମାର ସେଠୀ ବିଶ୍ୱସ୍ତ ସୂତ୍ରରୁ ଜାଣିବାକୁ ପାଇଥିଲେ ଖୁଣ୍ଟୁଣୀ ଥାନା ଅନ୍ତର୍ଗତ କଣ୍ଡରେଇ ପଞ୍ଚାୟତର ମାଣିତ୍ରୀ ଗ୍ରାମର ରାକିବ୍‌‌ ଖାନ୍‌‌ ନାମକ ଯୁବକ ବାଇକ ଚୋରି ରାକେଟର ମାଷ୍ଟରମାଇଣ୍ଡ। ସେ ଚୋରିଦଳ ତିଆରି କରି ବିଭିନ୍ନ ରାଜ୍ୟମାନଙ୍କୁ ଚୋରି ହୋଇଥିବା ବାଇକକୁ ଖୁଣ୍ଟୁଣୀକୁ ଆଣିଥାଏ। ସେଠାରୁ ସାଲେପୁର, ଆଠଗଡ଼ ଓ ଢେଙ୍କାନାଳ ଆଦି ସ୍ଥାନରେ ବିକ୍ରୟ କରିଥାଏ। ତେଣୁ ଅଭିଯୁକ୍ତ ରାକିବ୍‌କୁ ଗିରଫ କରିବା ପାଇଁ ଅତର୍କିତ ଭାବରେ ଚଢାଉ କରାଯାଇଥିଲା। ଅଭିଯୁକ୍ତ ରାକିବ୍‌‌ କିଛି ବୁଝିବା ପୂର୍ବରୁ ଖୁଣ୍ଟୁଣୀ ନିକଟରେ ଥିବା ତା’ର ଚିକେନ କାଉଣ୍ଟରରୁ ଖୁଣ୍ଟୁଣୀ ପୁଲିସ ଗିରଫ କରିବା ସହ ବିଭିନ୍ନ ସ୍ଥାନରେ ବିକ୍ରୟ କରିଥିବା ଓ ଗଚ୍ଛିତ ରଖିଥିବା ୮ଟି ଚୋରା ବାଇକକୁ ଜବତ କରିଛି। ଦୀର୍ଘଦିନ ଧରି ଆନ୍ତଃଜିଲ୍ଲା ଗାଡ଼ି ଡକାୟତ ଦଳର ମୁଖ୍ୟ ହିସାବରେ କାର୍ଯ୍ୟ କରୁଥିବା ରାକିବ୍‌ର ଏହି କଳା କାରନାମା ସଂପର୍କରେ କେହି ଜାଣିପାରି ନ ଥିଲେ। ସମସ୍ତଙ୍କ ନଜରରୁ ହଟାଇବା ପାଇଁ ସେ ଦିନରେ ଚିକେନ ବିକ୍ରୟ କରୁଥିଲା। ସ୍ଥାନୀୟ ଅଞ୍ଚଳରେ ସେ ଚିକେନ ବ୍ୟବସାୟୀ ଭାବେ ପରିଚିତ ଥିଲା। ହେଲେ ତା’ ନିକଟରୁ ଏତେ ସଂଖ୍ୟକ ଚୋରା ବାଇକ ଜବତ ହେବା ଓ ବିଭିନ୍ନ ଜିଲ୍ଲାର ବାଇକ ଚୋରିଦଳର ସଦସ୍ୟଙ୍କୁ ହାତକରି ଏଭଳି କଳା କାରନାମା କଥା କେହି ଜାଣିନଥିଲେ। ଆଜି ଅଭିଯୁକ୍ତର ଅସଲ ରୂପ ଧରାପଡ଼ିଛି। ଅନ୍ୟ ଅଭିଯୁକ୍ତଙ୍କୁ ଖୁବ୍‌‌ ଶୀଘ୍ର ଗିରଫ କରାଯିବ ବୋଲି ତଦନ୍ତକାରୀ ଅଧିକାରୀ ଉପନିରୀକ୍ଷକ ଡଃ ସେଠୀ କହିଛନ୍ତି।