ମୁମ୍ବଇ: ବଲିଉଡ଼ ଅଭିନେତା ସନି ଦେଓଲ ତାଙ୍କ ବହୁପ୍ରତୀକ୍ଷିତ ଚଳଚ୍ଚିତ୍ର ‘ଗଦର-୨’କୁ ନେଇ ଚର୍ଚ୍ଚାରେ। ପ୍ରଶଂସକମାନେ ଉତ୍ସାହର ସହିତ ଏହାକୁ ଅପେକ୍ଷା କରିଛନ୍ତି। ଶୁକ୍ରବାର ଫିଲ୍ମର ନୂଆ ମୋଶନ ପୋଷ୍ଟର ରିଲିଜ୍ ହୋଇଛି। ଏଥିରେ ସନି ଦେଓଲ ଓ ଅଭିନେତା ଉତ୍କର୍ଷ ଶର୍ମା ଜବରଦସ୍ତ ଲୁକ୍ରେ ନଜର ଆସିଛନ୍ତି। ଏଥିସହ ଗୁଳି ଫୁଟିବା ଶବ୍ଦ ମଧ୍ୟ ଶୁଣିବାକୁ ମିଳୁଛି। ନୂଆ ମୋଶନ ପୋଷ୍ଟର ଦେଖି ଅନୁମାନ କରାଯାଇପାରେ ଯେ, ଫିଲ୍ମରେ ଦର୍ଶକ ଜବରଦସ୍ତ ଆକ୍ସନ ଦେଖିବାକୁ ପାଇବେ।
View this post on Instagram
ମୋଶନ ପୋଷ୍ଟରରେ ପ୍ରଥମେ ଏକ ବାର୍ତ୍ତା ଲେଖା ହୋଇଛି, ‘ଜଣେ ପିତାର ଭଲପାଇବା କୌଣସି ବନ୍ଧନ ମାନେନା’। ପୋଷ୍ଟରରେ ସନି ଦେଓଲ ଅଭିନେତା ଉତ୍କର୍ଷ ଶର୍ମାଙ୍କ ହାତ ଧରି ଦୌଡ଼ୁଥିବା ଦେଖିବାକୁ ମିଳିଛି। ବାଲି, ମାଟିର ରାସ୍ତାରେ ବହୁତ ପଥର ମଧ୍ୟ ଅଛି। ସନି ଦେଓଲଙ୍କ ତୀବ୍ର ରୂପ ଦେଖି ଏହା ଅନୁମାନ କରାଯାଇପାରେ ଯେ, ଚଳଚ୍ଚିତ୍ରରେ ସେ ପଡ଼ୋଶୀ ଦେଶକୁ କଡ଼ା ଜବାବ ଦେଉଥିବା ଦେଖିବାକୁ ମିଳିବ।
ମୋଶନ ପୋଷ୍ଟରକୁ ଆଜି ସନି ଦେଓଲ ତାଙ୍କ ଅଫିସିଆଲ ଇନଷ୍ଟାଗ୍ରାମ ଆକାଉଣ୍ଟରୁ ମଧ୍ୟ ଶେୟାର କରିଛନ୍ତି। ଏହା ସହିତ କ୍ୟାପ୍ସନ୍ ଲେଖାଯାଇଛି, ‘ନିଜ ଦେଶ ତଥା ପରିବାରର ସୁରକ୍ଷା ପାଇଁ ପ୍ରତ୍ୟେକ ଆହ୍ବାନର ସମ୍ମୁଖୀନ ହେବାକୁ ପ୍ରସ୍ତୁତ ତାର ସିଂ! ଏହି ସ୍ୱାଧୀନତା ଦିବସରେ ‘ଗଦର ୨’ ଆସୁଛି ବଡ଼ ପରଦାକୁ। ୧୧ ଅଗଷ୍ଟରୁ ଦେଖନ୍ତୁ ପ୍ରେକ୍ଷାଳୟରେ’। ମୋଶନ ପୋଷ୍ଟର ଦର୍ଶକଙ୍କ ଆଗ୍ରହ ତଥା ଉତ୍କଣ୍ଠାକୁ ଆହୁରି ବଢାଇଦେଇଛି। ଟ୍ରେଲର ଶୀଘ୍ର ରିଲିଜ୍ କରିବାକୁ ଦର୍ଶକମାନେ ଦାବି କରିଛନ୍ତି।
