ଆଗୁଆ ନିର୍ବାଚନ: ମମତା ବାନାର୍ଜୀଙ୍କ ଆଶଙ୍କା- ଲୋକସଭା ନିର୍ବାଚନ ପୂର୍ବରୁ ତାଙ୍କ ପୁତୁରା ଗିରଫ ହେବେ ବୋଲି କହିଲେ

କୋଲକାତା- ଲୋକସଭା ନିର୍ବାଚନ ପୂର୍ବରୁ ତାଙ୍କ ପୁତୁରା ଅଭିଷେକ ବାନାର୍ଜୀ ଗିରଫ ହୋଇପାରନ୍ତି ବୋଲି ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି । ଏହା ସହ ଡିସେମ୍ବର ପୂର୍ବରୁ ବିଜେପି ସରକାର ଲୋକସଭା ନିର୍ବାଚନ କରିପାରନ୍ତି ବୋଲି ସେ କହିଛନ୍ତି ।

ଏବେ ତାଙ୍କ ପୁତୁରା ତଥା ତୃଣମୂଳ କଂଗ୍ରେସର ମହାସଚିବ ଅଭିଷେକ ବାନାର୍ଜୀଙ୍କ ବିରୋଧର ବିଭିନ୍ନ ଷଡଯନ୍ତ୍ର କରାଯାଉଥିବା ସେ ପ୍ରକାଶ କରିଛନ୍ତି । କେନ୍ଦ୍ରୀୟ ଯାଞ୍ଚ ସଂସ୍ଥାମାନେ କେତେବେଳେ ବି ତାଙ୍କୁ ଗିରଫ କରିପାରନ୍ତି ବୋଲି ସେ ଆଶଙ୍କା ପ୍ରକାଶ କରିଛନ୍ତି ।

ତୃଣମୂଳ ଛାତ୍ର ପରିଷଦର ପ୍ରତିଷ୍ଠା ଦିବସ ଅବସରରେ ସେ ବକ୍ତବ୍ୟ ଦେବା ଅବସରରେ ଏପରି କଥା କହିଛନ୍ତି । ମମତା ବାନାର୍ଜୀ ଅନେକ କେନ୍ଦ୍ର ସରକାର ଦେଖିଥିବା କଥା କହିଛନ୍ତି । ମାତ୍ର ଏପରି ପ୍ରତିଶୋଧ ସରକାର ଦେଖି ନଥିବା କଥା ପ୍ରକାଶ କରିଛନ୍ତି ।

ବିଜେପି ସରକାର ଏବେ ଡିସେମ୍ବରରେ ଲୋକସଭା ନିର୍ବାଚନ ପାଇଁ ପ୍ରସ୍ତୁତ ହେଉଥିବା କଥା ସେ କହିଛନ୍ତି । ଏବେ ବିଜେପି ସରକାର ନିର୍ବାଚନ ପୂର୍ବରୁ ସବୁ ହେଲିକପ୍ଟର ବୁକ୍‌ କରି ନେଇଥିବା କଥା ମମତା ବାନାର୍ଜୀ କହିଛନ୍ତି ।