ନୂଆଦିଲ୍ଲୀ: ଜମି ପ୍ରତିବଦଳରେ ଚାକିରି ଦୁର୍ନୀତି ମାମଲାରେ ବିହାରର ପୂର୍ବତନ ମୁଖ୍ୟମନ୍ତ୍ରୀ ତଥା ଆରଜେଡି ମୁଖ୍ୟ ଲାଲୁ ପ୍ରସାଦ ଯାଦବ, ତାଙ୍କ ପତ୍ନୀ ରାବ୍ଡ଼ୀ ଦେବୀ, ପୁଅ ତେଜସ୍ବୀ ଯାଦବ ଓ ଝିଅ ମୀସା ଭାରତୀଙ୍କୁ ମିଳିଛି ବଡ଼ ଆଶ୍ବସ୍ତି। ଦିଲ୍ଲୀର ରାଉଜ ଆଭେନ୍ୟୁ ଅଦାଲତ ଏହି ମାମଲାର ଶୁଣାଣି କରି ଲାଲୁ ଏବଂ ତାଙ୍କ ପରିବାରର ଅନ୍ୟ ସଦସ୍ୟମାନଙ୍କୁ ଜାମିନ ପ୍ରଦାନ କରିଛନ୍ତି। ଏହି ମାମଲାରେ ସିବିଆଇ ଜୁଲାଇ ୩ ତାରିଖରେ ଲାଲୁ ଯାଦବ ଓ ଅନ୍ୟମାନଙ୍କ ନାଁରେ ସାନି ଚାର୍ଜସିଟ୍ ଫାଇଲ୍ କରିଥିଲା। ଏଥିରେ ଉଲ୍ଲେଖ ରହିଛି ଯେ, ରେଳବାଇର ନୀତିନିୟମ, ମାର୍ଗଦର୍ଶିକା ଓ ପ୍ରକ୍ରିୟା ଉଲ୍ଲଂଘନ କରାଯାଇ କେନ୍ଦ୍ରୀୟ ରେଳବାଇରେ ପ୍ରାର୍ଥୀମାନଙ୍କୁ ବେଆଇନ ଭାବେ ନିଯୁକ୍ତି ଦିଆଯାଇଛି।
ସୂଚନଯୋଗ୍ୟ, ୨୦୦୪ରୁ ୨୦୦୯ ପର୍ଯ୍ୟନ୍ତ ଲାଲୁ ଯାଦବ କେନ୍ଦ୍ର ରେଳମନ୍ତ୍ରୀ ଥିବା ବେଳେ ଏହି ଦୁର୍ନୀତି ହୋଇଥିଲା। ମଧ୍ୟପ୍ରଦେଶର ଜବଲପୁରସ୍ଥିତ ରେଳବାଇର ପଶ୍ଚିମ ସେଣ୍ଟ୍ରାଲ୍ ଜୋନ୍ରେ ଗ୍ରୁପ୍-ଡି ନିଯୁକ୍ତିରେ ଦୁର୍ନୀତି ହୋଇଥିଲା। ଭାରତୀୟ ରେଳବାଇରେ ନିଯୁକ୍ତି ପାଇବା ପାଇଁ ଲାଲୁ ଯାଦବଙ୍କ ପରିବାର ଲୋକଙ୍କ ନାଁରେ ଜମି ଟ୍ରାନ୍ସଫର୍ କରାଯାଇଥିବା ଅଭିଯୋଗ ଆଧାରରେ ମାମଲା ହୋଇଥିଲା।
