ବୁର୍ଲା: ବୁର୍ଲା ଭିମସାର ମେଡ଼ିକାଲ କଲେଜ ଫାର୍ମା କୋଲୋଜି ବିଭାଗରେ ରହିଥିବା କୋଭିଡ ଲ୍ୟାବ (ଏମଆରୟୁ) ବିଏସଏଲ ଲ୍ୟାବରେ ଅଗ୍ନିକାଣ୍ଡ ଘଟି ଯାଇଥିବା ବେଳେ ଲକ୍ଷାଧିକ ଟଙ୍କାର ସମ୍ପତ୍ତି ନଷ୍ଟ ହୋଇଛି। ଭିମାସର ଅଗ୍ନିଶମ ବିଭାଗ ଘଟଣା ସ୍ଥଳରେ ପହଞ୍ଚି ପ୍ରାୟ ଦୁଇ ଘଣ୍ଟାରୁ ଉର୍ଦ୍ଧ୍ବ ସମୟ ଧରି ମେଡ଼ିକାଲ କର୍ମଚାରୀଙ୍କ ସହିତ ପ୍ରଚେଷ୍ଟାରେ ନିଆଁକୁ ଆୟତ କରିଥିଲେ।
ବୁର୍ଲା ଭିମସାର ମେଡ଼ିକାଲ କଲେଜର ଏମଆରୟୁ (ମଲ୍ଟି ଡିସିପ୍ଲିନାରି ରିସର୍ଚ୍ଚ ୟୁନିଟ) ର ବିଏସଲ ଲ୍ୟାବ ରେ ଆଜି ହଠାତ ଅଗ୍ନିକାଣ୍ଡ ଘଟି ଥିଲା। ଏହି ଲ୍ୟାବ ମଧ୍ୟରେ ରହିଥିବା ଏକ ଏସିରେ ସର୍ଟ ସର୍କିଟ ରୁ ନିଆଁ ଲାଗି ଯାଇଥିଲା। ଉକ୍ତ କକ୍ଷ ହୁ ହୁ ହୋଇ ଜଳି ଉଠିବା ସହିତ ଚାରିଆଡ଼େ ଧୁଆଁ ଭର୍ତ୍ତି ହୋଇ ଯାଇଥିଲା। ଏହା ସମ୍ବନ୍ଧରେ ଫର୍ମକୋଲୋଜୀ ବିଭାଗୀୟ ମୁଖ୍ୟ ଡାକ୍ତର ଅଶୋକ ପାଣିଗ୍ରାହି ଖବର ପାଇବା ପରେ କର୍ମଚାରୀ ଏବଂ ଅଗ୍ନିଶମ ବିଭାଗକୁ ଅବଗତ କରାଇଥିଲେ।
ଭିମସାର ମେଡ଼ିକାଲ କଲେଜ ଅଧ୍ୟକ୍ଷ ପ୍ରଫେସର ପ୍ରଦୀପ କୁମାର ମହାନ୍ତି, ଏମଆରୟୁ ବିଭାଗୀୟ ଅଧିକାରୀ ପ୍ରଫେସର ବିମଲ କୃଷ୍ଣ ପଣ୍ଡା ଘଟଣା ସ୍ଥଳରେ ପହଞ୍ଚିଥିଲେ । ମାତ୍ରାଧିକ ଧୁଆଁରେ ଆଚ୍ଛାଦିତ ହୋଇ ରହିଥିବା ବିଭାଗ ମଧ୍ୟକୁ ପ୍ରବେଶ କରିବା କଷ୍ଟକର ହୋଇ ପଡିଥିଲା। ଏହାପରେ ମେଡ଼ିକାଲ କର୍ମଚାରୀମାନଙ୍କ ସହାୟତାରେ ଝରକା କାଚ ଭାଙ୍ଗି ଦେବାରୁ କିଛି ମାତ୍ରାରେ ଧୁଆଁ ହ୍ରାସ ପାଇଥିଲା। ଅଗ୍ନିଶ ମ ବିଭାଗୀୟ କର୍ମଚାରୀମାନେ ଅଗ୍ନିନିର୍ବାପକ ସୁଟ ପିନ୍ଧି ଭିତରକୁ ପ୍ରକେଶ କରି ନିଆଁକୁ ଆୟତ୍ତ କରିଥିଲେ। ତେବେ ଏହି ଲ୍ୟାବ ମଧ୍ୟରେ ରହିଥିବା ବିଶାଳ ଫ୍ରିଜର ସହିତ ବାୟୁ ନିରୋଧକ କୋଠରୀ ମଧ୍ୟରେ ରହିଥିବା ସାମଗ୍ରୀ ସହିତ କୋଠରୀ ନିଆଁରେ ପୋଡ଼ି ଯାଇଥିବା ବେଳେ ଏହି କୋଠରୀ ବାୟୁ ନିରୋଧକ ହୋଇଥିବାରୁ ନିଆଁ କୋଠରୀ ବାହାରକୁ ସଂକ୍ରମିତ ହୋଇ ପାରି ନ ଥିଲା।
ମାତ୍ର ବାହାରେ ମଧ୍ୟ ଗରମ ଧୂଆଁରେ କାନ୍ଥ ଏବଂ ଛାତ ପ୍ରଭାବିତ ହୋଇଥିବା ଦେଖିବାକୁ ମିଳିଛି। ପ୍ରାୟ ଲକ୍ଷାଧିକ ଟଙ୍କାର କ୍ଷୟକ୍ଷତି ହୋଇ ଥିବା ଅନୁମାନ କରାଯାଉଛି। ତେବେ ଭିମସାର ମେଡ଼ିକାଲ କଲେଜ ଅଧ୍ୟକ୍ଷ ପ୍ରଫେସର ପ୍ରଦୀପ କୁମାର ମହାନ୍ତି ସର୍ଟ ସର୍କିଟରୁ ଏହି ଅଗ୍ନିକାଣ୍ଡ ଘଟିଥିବା ଏବଂ ବାୟୁ ନିରୋଧକ କୋଠରୀ ଯୋଗୁଁ ନିଆଁ ବାହାରକୁ ସଂକ୍ରମିତ ହୋଇ ନ ଥିବା ଏବଂ ବିଶେଷ କ୍ଷୟକ୍ଷତି ହୋଇ ନ ଥିବା ସୂଚନା ଦେଇଛନ୍ତି। ଅଗ୍ନିଶମ ବିଭାଗୀୟ ଅଧିକାରୀ ଲୋକେଶ ପଟେଲ ଭିତରକୁ ପ୍ରବେଶ କରି ନିଆଁକୁ ଆୟତ୍ତ କରିବାରେ ପ୍ରମୁଖ ଭୂମିକା ନିର୍ବାହ କରିଥିଲେ।
ଏହି ବିଏସଏଲ ୟୁନିଟଟି ଅନେକ ଦିନ ହେବ ତାଲାବନ୍ଦ ଅବସ୍ଥାରେ ରହିଥିଲା। ଏକ ବଡ ଧରଣର ଅଘଟଣରୁ ଆଜି ଭିମସାର ବର୍ତ୍ତିଯାଇଛି। ଯଦି ବା ଏହି ଫାର୍ମାକୋଲୋଜି ବିଭାଗରେ କର୍ମଚାରୀ ରହିଥିଲେ କୌଣସି ବଡ ଧରଣର ଅଘଟଣ ଘଟିବା ଆଶଙ୍କା ରହିଥିଲା।
Comments are closed.