ଭଞ୍ଜନଗର: ଗଞ୍ଜାମ ଜିଲା ମୁଜାଗଡ଼ ନିକଟରେ ଦୁର୍ଘଟଣା। ଏହି ଦୁର୍ଘଟଣା ନେଇଛି ୨ ଜୀବନ। ଭଞ୍ଜନଗର ଅନ୍ତର୍ଗତ ମୁଜାଗଡ଼ ନିକଟରେ ଫୁଲବାଣୀରୁ ଆସୁଥିବା ଏକ କାର ଭାରସାମ୍ୟ ହରାଇ ଓଲଟି ପଡ଼ିଥିଲା। ଘଟଣାସ୍ଥଳରେ କାରରେ ଚାପି ହୋଇ ଜଣଙ୍କ ମୃତ୍ୟୁ ହୋଇଥିଲା। ସଂକଟାପନ୍ନ ଅବସ୍ଥାରେ ଜଣଙ୍କୁ ସ୍ଥାନୀୟ ଲୋକେ ଉଦ୍ଧାର କରି ଭଞ୍ଜନଗର ଡାକ୍ତରଖାନାକୁ ନେଇଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଅପରପକ୍ଷରେ ଏହି କାର ଦୁର୍ଘଟଣାରେ ୨ଜଣଙ୍କୁ ଗୁରୁତର ଅବସ୍ଥାରେ ସ୍ଥାନୀୟ ଲୋକେ ଉଦ୍ଧାର କରିଥିଲେ। ସେମାନଙ୍କୁ ଭଞ୍ଜନଗର ଡାକ୍ତର ଖାନାରେ ପ୍ରାଥମିକ ଚିକିତ୍ସା ପରେ ଅଧିକ ଚିକିତ୍ସା ପାଇଁ ବ୍ରହ୍ମପୁର ପଠାଯାଇଛି।
ମିଳିଥିବା ସୂଚନା ଅନୁଯାୟୀ ଆଜି ଫୁଲବାଣୀରୁ ଏକ କାର ଯୋଗେ ୪ଜଣ ସାଙ୍ଗ ଆସୁଥିଲେ। ସେମାନଙ୍କ କାରଟି ମୁଜାଗଡ଼ ନିକଟରେ ଓଲଟି ପଡ଼ିଥିଲା। ଘଟଣାସ୍ଥଳରେ ଜଣଙ୍କ ଜୀବନ ଯାଇଥିବାବେଳେ ଭଞ୍ଜନଗର ମେଡ଼ିକାଲେ ଅନ୍ୟ ଜଣଙ୍କ ମୃତ୍ୟୁ ହୋଇଥିଲା। ଆଉ ୨ଜଣ ଗୁରୁତର ଥିବାରୁ ସେମାନଙ୍କ ଚିକିତ୍ସା ଜାରି ରହିଛି। ସ୍ଥାନୀୟ ଲୋକଙ୍କ କହିବା ଅନୁଯାୟୀ କାରଟି ଦ୍ରୁତ ଗତିରେ ଆସୁଥିଲା। କାରଟି ଆସୁଥିବାବେଳେ ପ୍ରଥମେ ପଛ ଚକାଟି ବାହାରି ପଡ଼ିଥିଲା। ଏହାପରେ ୨ଟି ଚକା କାରରୁ ବାହାରି ଯାଇଥିଲା। ଫଳରେ କାରଟି ଭାରସାମ୍ୟ ହରାଇ ଓଲଟି ପଡ଼ିଥିଲା। କାରରେ ଚାପି ହୋଇରହିଥିବା ସମସ୍ତ ଯୁବକଙ୍କୁ ତତ୍କାଳ ସ୍ଥାନୀୟ ଲୋକେ ଉଦ୍ଧାର କରିଥିଲେ। ମୃତକ ଓ ଗୁରୁତର ଆହତ ଯୁବକମାନଙ୍କ ପରିଚୟ ଜଣାପଡ଼ିନାହିଁ। ଘଟଣାସ୍ଥଳରେ ପୁଲିସ ପହଞ୍ଚି ସବୁ ଦିଗକୁ ତଦନ୍ତ କରୁଛି। ତେବେ ମେଡ଼ିକାଲରେ ଉତ୍ତେଜନାମୂଳକ ପରିସ୍ଥିତି ଦେଖାଦେଇଛି।
Comments are closed.