ଭୁବନେଶ୍ବର: ସୋମବାରଠାରୁ ବିଧାନସଭା ବଜେଟ୍ ଅଧିବେଶନ ଆରମ୍ଭ ହେବାକୁ ଯାଉଛି। ଦିନ ୧୧ଟାରେ ରାଜ୍ୟପାଳଙ୍କର ଅଭିଭାଷଣରୁ ଗୃହ କାର୍ଯ୍ୟ ଆରମ୍ଭ ହେବ। ଏହାପରେ ମୁଖ୍ୟମନ୍ତ୍ରୀ ଗୃହରେ ଶୋକ ପ୍ରସ୍ତାବ ରଖିବେ । ଫେବୃଆରୀ ୧୩ ତାରିଖ ପର୍ଯ୍ୟନ୍ତ ଚାଳିବାକୁ ଥିବା ଷୋଡଶ ବିଧାନସଭାର ୧୫ତମ ଅଧିବେଶନରେ ମୋଟ୍ ୭ଟି କାର୍ଯ୍ୟ ଦିବସ ରହିଛି। ଆସନ୍ତା ୮ ତାରିଖରେ ୨୦୨୪-୨୫ ଆର୍ଥିକ ବର୍ଷ ପାଇଁ ପ୍ରାୟ ୨ ଲକ୍ଷ ୬୦ ହଜାର କୋଟିର କାମଚଳା ବଜେଟ୍ କୁ ଅର୍ଥମନ୍ତ୍ରୀ ଗୃହରେ ଆଗତ କରିବେ । ସାଧାରଣ ନିର୍ବାଚନ ପୂର୍ବରୁ ଏହା ଶେଷ ଅଧିବେଶନ ହୋଇଥିବାବେଳେ ରାଜ୍ୟପାଳ ରଘୁବର ଦାସ ପ୍ରଥମଥର ପାଇଁ ଗୃହରେ ଅଭିଭାଷଣ ରଖିବେ।
ସ୍ବଳ୍ପ ଅଧିବେଶନରେ ନୂଆ ଏବଂ ପୁରୁଣା ପ୍ରସଙ୍ଗକୁ ନେଇ ଗୃହ ବେଶ୍ ସରଗରମ ହେବାର ସମ୍ଭାବନା ରହିଛି। ଗୃହ କାର୍ଯ୍ୟକୁ ସୁରୁଖୁରୁରେ ଶେଷ କରିବା ପାଇଁ ବାଚସ୍ପତି ସର୍ବଦଳୀୟ ବୈଠକ କରି ଉଭୟ ବିରୋଧୀ ଏବଂ ଶାସକଙ୍କର ସହଯୋଗ ଲୋଡିଛନ୍ତି। ସେପଟେ ବିଧାନସଭାର ବଜେଟ ଅଧିବେଶନ ଲାଗି କମିଶନରେଟ ପୁଲିସ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି। ୨୮ ପ୍ଲାଟୁନ ଫୋର୍ସ ମୁତୟନ ହେବାକୁ ଥିବାବେଳେ ତିନି ଥାକିଆ ସୁରକ୍ଷା ବଳୟରେ ବିଧାନସଭା ରହିଛି। ଏବଂ ସିସିଟିଭି ନଜରରେ ବିଧାନସଭା ଆଖପାଖ ଅଞ୍ଚଳକୁ ରଖାଯାଇଛି। ସନ୍ଦିଗ୍ଧ ଓ ଆନ୍ଦୋଳନକାରୀଙ୍କ ଉପରେ ତୀକ୍ଷ୍ଣ ନଜର ରହିବ ବୋଲି ପୁଲିସ ମହାନିର୍ଦେଶକ ସୂଚନା ଦେଇଛନ୍ତି।
Comments are closed.