ଜମ୍ମୁ : ଅମରନାଥ ଯାତ୍ରା ରବିବାର ଠାରୁ ପୁଣି ଆରମ୍ଭ ହୋଇଛି। ବର୍ଷା ଓ ଭୂସ୍ଖଳନ ଯୋଗୁଁ ଶନିବାର ଅମରନାଥ ଯାତ୍ରା ବନ୍ଦ ରହିଥିଲା। ଜାମ୍ମୁର ଭଗବତୀ ନଗର ମୂଳ ଶିବିରରୁ ରବିବାର ଭୋର୍ ୪ଟା ସମୟରେ କଡ଼ା ନିରାପତ୍ତା ବ୍ୟବସ୍ଥା ମଧ୍ୟରେ ଚତୁର୍ଥ ପର୍ଯ୍ୟାୟ ଅମରନାଥ ତୀର୍ଥଯାତ୍ରୀ ଦଳ ଯାତ୍ରା ଆରମ୍ଭ କରିଛନ୍ତି । ଏହି ତୀର୍ଥଯାତ୍ରୀ ଦଳରେ ୫ ହଜାର ୧୯୮ ଜଣ ପୁରୁଷ, ଏକହଜାର ୪୨୯ ଜଣ ମହିଳା, ୨୪୯ ଜଣ ସାଧୁ ଓ ସାଧ୍ୱୀ ରହିଛନ୍ତି। ଜୁନ୍ ୨୭ ତାରିଖରୁ ଆରମ୍ଭ ହୋଇଥିବା ଚଳିତବର୍ଷର ଅମରନାଥ ଯାତ୍ରାରେ ଏପର୍ଯ୍ୟନ୍ତ ୧୬ ହଜାର ୧୮୨ ଜଣ ତୀର୍ଥଯାତ୍ରୀ ଜାମ୍ମୁ ଶିବିରରୁ ବାହାରି କାଶ୍ମୀର ଉପତ୍ୟକା ଅଭିମୁଖେ ଯାତ୍ରା କରିଛନ୍ତି।
