ନୂଆଦିଲ୍ଲୀ : ବାୟୁ ପ୍ରଦୂଷଣ ଯୋଗୁଁ ୨୦୧୭ରେ ଭାରତରେ ୧୨ ଲକ୍ଷ ଲୋକଙ୍କ ମୃତ୍ୟୁ ଘଟିଛି। ଆରେମିକାର ହେଲ୍ଥ ଇଫେକ୍ଟସ୍ ଇନଷ୍ଟଚ୍ୟୁଟ୍ ନିଜ ରିପୋର୍ଟ ‘ଷ୍ଟେଟ୍ ଅଫ ଗ୍ଲୋବାଲ ଏୟାର-୨୦୧୯’ରେ ଏହା ଉଲ୍ଲେଖ କରିଛି। ଏଥିରେ କୁହାଯାଇଛି ଯେ ୨୦୧୭ରେ ହୃଦ୍ଘାତ, ମଧୁମେହ, ଫୁସ୍ଫୁସ୍ କର୍କଟ ଭଳି ରୋଗରେ ବିଶ୍ୱରେ ୫୦ ଲକ୍ଷ ଲୋକଙ୍କ ମୃତ୍ୟୁ ଘଟିଛି। ଏମାନଙ୍କ ମଧ୍ୟରୁ ୩୦ ଲକ୍ଷ ଲୋକଙ୍କ ସିଧାସଳଖ ଭାବେ ପିଏମ୍ ୨.୫(ବାୟୁ ପ୍ରଦୂଷଣ ସ୍ତରର ମାନକ) ଯୋଗୁଁ ମୃତ୍ୟୁ ଘଟିଛି। ଇନଷ୍ଟିଚ୍ୟୁଟ୍ ଅନୁସାରେ ଭାରତ ପ୍ରଦୂଷଣ ସହ ଲଢିବା ପାଇଁ ପ୍ରଭାବଶାଳୀ ଯୋଜନା ପ୍ରସ୍ତୁତ କରିଛି। ଏଥିରେ ପ୍ରଧାନମନ୍ତ୍ରୀଙ୍କ ଉଜ୍ୱଳା ଯୋଜନା, ନ୍ୟାଶନାଲ କ୍ଲିନ୍ ଏୟାର ଯୋଜନା ଏବଂ ବିଏସ୍-୪ ଇନ୍ଧନ ଲାଗୁକୁ ଖୁବ୍ ପ୍ରଶଂସା କରାଯାଇଛି। ଏହି ଯୋଜନାଗୁଡ଼ିକ ସଠିକ୍ ଭାବେ କାର୍ଯ୍ୟକାରୀ ହେଲେ ସକରାତ୍ମକ ପରିଣାମ ଦେଖିବାକୁ ମିଳିବ ବୋଲି ଉଲ୍ଲେଖ କରାଯାଇଛି। ରିପୋର୍ଟରେ କୁହାଯାଇଛି ଯେ ପ୍ରଦୂଷଣ ଯୋଗୁଁ ଦକ୍ଷିଣ ଏସିଆରେ ଜନ୍ମ ନେଉଥିବା ଶିଶୁଙ୍କ ଆୟୁଷ ଦେଢ ବର୍ଷ କମିଯାଇଛି। ବିଶ୍ୱସ୍ତରରେ ଶିଶୁଙ୍କ ଆୟୁଷ ପ୍ରାୟ ୨୦ ମାସ ପର୍ଯ୍ୟନ୍ତ କମି ଯାଇଛି। ବିଶ୍ୱରେ ସଡ଼କ ଦୁର୍ଘଟଣା, ମ୍ୟାଲେରିଆ ତୁଳନାରେ ପ୍ରଦୂଷଣରେ ଅଧିକ ଲୋକଙ୍କ ମୃତ୍ୟୁ ଘଟୁଛି। ଏହି ମାମଲାରେ ଭାରତ ଏବଂ ଚୀନ ଅବସ୍ଥା ପ୍ରାୟ ସମାନ ରହିଛି। ଭାରତରେ ପ୍ରତି ବର୍ଷ ଲୋକଙ୍କ ମୃତ୍ୟୁର ତୃତୀୟ ବଡ଼ କାରଣ ହେଉଛି ପ୍ରଦୂଷଣ। ରିପୋର୍ଟରେ ଭାରତ, ପାକିସ୍ତାନ, ବାଂଲାଦେଶ ଏବଂ ନେପାଳକୁ ସର୍ବାଧିକ ପ୍ରଦୂଷିତ ଅଞ୍ଚଳ କୁହାଯାଇଛି। ଏଠାରେ ପ୍ରତି ବର୍ଷ ୧୫ ଲକ୍ଷ ଲୋକଙ୍କ ପ୍ରଦୂଷଣ କାରଣରୁ ଅସମୟରେ ମୃତ୍ୟୁ ଘଟୁଛି। ଭାରତ ଏବଂ ଚୀନରେ ପ୍ରଦୂଷଣ ଯୋଗୁଁ ହେଉଥିବା ମୃତ୍ୟୁ ସଂଖ୍ୟା ପ୍ରାୟ ସମାନ ରହିଛି। ତେବେ ଚୀନ ପ୍ରଦୂଷଣ କମ କରିବା କ୍ଷେତ୍ରରେ ସଫଳତା ହାସଲ କରିଛି।
Comments are closed.