ନୂଆଦିଲ୍ଲୀ : ସମାଜବାଦୀ ପାର୍ଟି (ଏସପି)ର ପୂର୍ବତନ ରାଜ୍ୟସଭା ସାଂସଦ ସଂଜୟ ସେଠ ଏବଂ ସୁରେନ୍ଦ୍ର ସିଂହ ନାଗର ଶନିବାର ଆନୁଷ୍ଠାନିକ ଭାବେ ବିଜେପିରେ ଯୋଗଦେଇଛନ୍ତି। ଦୁଇ ନେତା କିଛି ଦିନ ତଳେ ଏସପିରୁ ଇସ୍ତଫା ଦେଇଥିଲେ। ଏହାପରେ ଅନୁମାନ କରାଯାଉଥିଲା ଯେ ଉଭୟ ବିଜେପିରେ ଯୋଗଦେଇ ପାରନ୍ତି। ସବୁ କଳ୍ପନାଜଳ୍ପନାର ଅନ୍ତ ଘଟାଇ ଦୁଇ ନେତା ଶନିବାର ନୂଆଦିଲ୍ଲୀଠାରେ ବିଜେପି ମୁଖ୍ୟାଳୟରେ ଆନୁଷ୍ଠାନିକ ଭାବେ ବିଜେପିରେ ଯୋଗଦେଇଛନ୍ତି।
ପ୍ରକାଶ ଯେ ଅଗଷ୍ଟ ୨ରେ ସୁରେନ୍ଦ୍ର ନାଗର ରାଜ୍ୟସଭା ସଦସ୍ୟ ଏବଂ ଏସପିରୁ ଇସ୍ତଫା ଦେଇଥିଲେ। କୁହାଯାଉଥିଲ ଯେ ତାଙ୍କ ଇସ୍ତଫା ଯୋଗୁ ଖାଲି ହୋଇଥିବା ଆସନର ଉପନିର୍ବାଚନରେ ବିଜେପି ପୁଣିଥରେ ତାଙ୍କୁ ରାଜ୍ୟସଭାକୁ ପଠାଇବ। ବୁଲନ୍ଦସହରରୁ ନବେ ଦଶକରେ ସ୍ୱାଧୀନ ପ୍ରାର୍ଥୀ ଭାବେ ଏମଏଲସି ନିର୍ବାଚିତ ହୋଇ ରାଜନୀତିକୁ ପ୍ରବେଶ କରିଥିଲେ ସୁରେନ୍ଦ୍ର ନାଗର। ଏହାପରଠାରୁ ସେ ରାଜ୍ୟ ରାଜନୀତିରେ ନିଜ ଦବଦବା କାଏମ ରଖିଛନ୍ତି।
