ସାଧରଣତଃ ଆମ ମଧ୍ୟରୁ ଅନେକ ସିଧାସଳଖ ବୋତଲରୁ ପାଣି ପିଇବାର ଅଭ୍ୟସ୍ତ। ବାହାରକୁ ଗଲାବେଳେ ମଧ୍ୟ ସାଥିରେ ପାଣି ନେବା ପାଇଁ ଆମେ ପ୍ଲାଷ୍ଟିକ୍ ବୋତଲର ବ୍ୟବହାର କରିଥାଉ। ହେଲେ ଖୁବ୍ କମ୍ ଲୋକ ଏ ବିଷୟରେ ଅବଗତ ଯେ, ସିଧାସଳଖ ବୋତଲରୁ ପାଣି ପିଇବା ସ୍ବାସ୍ଥ୍ୟ ପକ୍ଷେ ହାନିକାରକ ସାବ୍ୟସ୍ତ ହୋଇଥାଏ। ବିଶେଷ କରି ପ୍ଲାଷ୍ଟିକ ବୋତଲରେ ପାଣି ପିଇବା ଖୁବ୍ କ୍ଷତିକାରକ। ନିୟମିତ ଭାବେ ସିଧାସଳଖ ବୋତଲରୁ ପାଣି ପିଇବା ଦ୍ବାରା ବିଭିନ୍ନ ରୋଗ ହେବାସହ ମସ୍ତିଷ୍କ ମଧ୍ୟ ଦୁର୍ବଳ ହୋଇଥାଏ। ତେବେ ଚାଲନ୍ତୁ ଜାଣିବା ବୋତଲରେ ପାଣି ପିଇବା ଦ୍ୱାରା ଆମର କି କ୍ଷତି ହୋଇଥାଏ –
୧. ପ୍ଲାଷ୍ଟିକ ବୋତଲରେ ପାଣି ପିଇବା ଦ୍ୱାରା କର୍କଟ ରୋଗ ହେବାର ଆଶଙ୍କା ରହିଛି। ଗରମ କିମ୍ବା ଖରାରେ ପ୍ଲାଷ୍ଟିକ ବୋତଲ ଗରମ ହେବା ଦ୍ବାରା ବୋତଲରେ ଥିବା କେମିକାଲ୍ ଡାଇଅକ୍ସିନ ତରଳିବା ଆରମ୍ଭ ହୋଇଥାଏ। ଏହି ଡାଇଅକ୍ସିନ ତରଳି ପାଣିରେ ମିଶି ଶରୀର ମଧ୍ୟକୁ ଯାଇଥାଏ। ଡାଇଅକ୍ସିନ ମଣିଷ ଶରୀରରେ ଥିବା କୋଷ ଗୁଡିକୁ ନଷ୍ଟ କରି ଦେଇଥାଏ।
୨. ବୋତଲ ତିଆରିରେ ବ୍ୟବହାର କରାଯାଉଥିବା ବିସଫେନୋଲ-ଏ ଯୋଗୁଁ ମସ୍ତିଷ୍କର କାର୍ଯ୍ୟକଳାପ ପ୍ରଭାବିତ ହୋଇଥାଏ। ଯାହାଫଳରେ ମଣିଷର ଚିନ୍ତା ଶକ୍ତି ଏବଂ ସ୍ମରଣ ଶକ୍ତି ପ୍ରଭାବିତ ହୋଇଥାଏ। ଏଥିସହିତ ଏହି ବିସଫେନୋଲ-ଏ ର କୁପ୍ରଭାବ ପେଟ ଉପରେ ମଧ୍ୟ ପଡ଼ିଥାଏ। ବିପିଏ ନାମକ ରାସାୟନିକ ପଦାର୍ଥ ପେଟକୁ ଗଲେ ପାଚନକ୍ରିୟା ପ୍ରଭାବିତ ହୋଇଥାଏ। ଯାହାଫଳରେ ଆମେ ଖାଇଥିବା ଖାଦ୍ୟ ଭଲ ଭାବେ ହଜମ ହୋଇନଥାଏ ଓ ଗ୍ୟାସ, କୋଷ୍ଠକାଠିନ୍ୟ ଭଳି ସମସ୍ୟା ଦେଖା ଦେଇଥାଏ।
୩. ଗର୍ଭବତୀ ମହିଳା ମାନେ ସବୁବେଳେ ବୋତଲରେ ପାଣି ପିଇଲେ ଗର୍ଭପାତର ସମ୍ଭାବନା ମଧ୍ୟ ବଢିଥାଏ। ବୋତଲରେ ପାଣି ପିଇଲେ ଗର୍ଭରେ ଥିବା ଶିଶୁ ଉପରେ ଖରାପ ପ୍ରଭାବ ପଡ଼ିଥାଏ। ଏହାଫଳରେ ଶିଶୁକୁ ବିଭିନ୍ନ ମାରାତ୍ମକ ରୋଗ ହେବାର ମଧ୍ୟ ସମ୍ଭାବନା ଥାଏ।
