ପାଟଣା : ଓଡ଼ିଶା ସରକାରଙ୍କ ଜଳ ଓ ଭୂମି ପରିଚାଳନା ପ୍ରତିଷ୍ଠାନ (ୱାଲମୀ)ଦ୍ୱାରା ଆୟୋଜିତ ସବୁଜ ଜଳବାୟୁ ପାଣ୍ଠି ପ୍ରକଳ୍ପରେ ନିୟୋଜିତ ଜଳମିତ୍ର ମାନଙ୍କ ଦୁଇ ଦିବସୀୟ ପ୍ରଶିକ୍ଷଣ ଶିବିର ଆଜି ପାଟଣା ବ୍ଲକ ସଭାଗୃହ ଠାରେ ଅନୁଷ୍ଠିତ ହୋଇଯାଇଛି। ବିଡିଓ ମାନସ କୁମାର ଦଣ୍ଡପାଟ ଓ ଏପିଓ ଦୀପକ କୁମାର ବେହେରାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଏହି କାର୍ଯ୍ୟକ୍ରମ ହେଉଛି। ବ୍ଲକରେ ଥିବା ସମସ୍ତ ପଞ୍ଚାୟତରେ ଥିବା ଜଳ ମିତ୍ରମାନେ ଏହି ପ୍ରଶିକ୍ଷଣରେ ପର୍ଯ୍ୟାୟ କ୍ରମେ ପ୍ରଶିକ୍ଷଣ ନେବେ। ଆଜିର ପ୍ରଶିକ୍ଷଣ ଶିବିରରେ ୫ ଟି ପଞ୍ଚାୟତ ମିରିଗିଖୋଜି, ମୁଷାଖୋରୀ, ଏରେଣ୍ଡେଇ, କେନ୍ଦେଇପଶି ଓ ଯମୁନାପଶିର ୨୨ ଜଣ ଜଳମିତ୍ର ଉପସ୍ଥିତ ଥିଲେ। ପ୍ରଶିକ୍ଷଣ ଶିବିରରେ ପ୍ରଶିକ୍ଷକ ଭାବେ ଜଗତ ମୋହନ ପାତ୍ର ଓ ପରମେଶ୍ବର ପାତ୍ର ଉପସ୍ଥିତ ରହି ଜଳମିତ୍ର ମାନଙ୍କୁ ପ୍ରଶିକ୍ଷଣ ଦେଇଥିଲେ। ଜଳବାୟୁ ପରିବର୍ତ୍ତନ ଓ ତାର ପ୍ରଭାବ, ଭୂତଳ ଜଳର ଗୁରୁତ୍ୱ, ଖୋଲାକୂପ ନିର୍ମାଣ, କୃତ୍ରିମ ଜଳଭରଣ ନିତି, ଫସଲ ଜଳର ନିରୀକ୍ଷଣ, ଜଳର ଗୁଣବତ୍ତା ଓ ତାହାର ଗୁରୁତ୍ୱ, ସୌରଚାଳିତ ଜଳ ସିଞ୍ଚନ ଆଦିର ସୁପରିଚାଳନା ଓ ସଚେତନତା ବିଷୟ ସହିତ ଜଳ ମିତ୍ର ମାନଙ୍କ ଏଥିରେ ଭୂମିକା ଆଦି ବିବିଧ ପ୍ରସଙ୍ଗରେ ପ୍ରଶିକ୍ଷଣ ଦିଆଯାଇଥିଲା।
Comments are closed.