“ବଳଦଙ୍କୁ ଖାଇଗଲା ବୋଲି, ବାଘକୁ ବିଷ ଦେଇ ମାରିଦେଲି”

ବଣାଇ : ତିନି ବଳଦ ଜଙ୍ଗଲକୁ ଚରିବାକୁ ଯାଇ ଆଉ ଫେରି ନଥିଲେ। ଚାରି ଦିନ ପରେ ବଳଦଙ୍କ ମଢ଼ ଦେଖି ଶୋକାଭିଭୂତ ହୋଇ ପଡ଼ିଥିଲେ ଚାଷୀ ସୁନ୍ଦରଗଡ଼ ଜିଲା ଚାନ୍ଦିପୋଷ ଥାନା ଅନ୍ତର୍ଗତ କୁସୁମଡିହି ଗାଁର ନୂଆସ ଖେସ। କୌଣସି ବନ୍ୟ ଜନ୍ତୁ ତାଙ୍କ ବଦଳଙ୍କୁ ମାରି ଖାଇଥିବା ସେ ଜାଣି ପ୍ରତିଶୋଧ ନେବାକୁ ମନେ ମନେ ଚିନ୍ତା କରି ମଢ଼ ଦେହରେ ବିଷ ବୋଳି ଦେଇଥିଲେ। ୧୧ ତାରିଖରେ ବିଷ ବୋଳା ବଳଦ ମାଂସ ଖାଇ ଏକ କଲରାପତରିଆର ମୃତ୍ୟୁ ଘଟିଛି। ବାଘ ମାରିଥିବା ଅଭିଯୋଗରେ ଚାଷୀ ନୂଆସଙ୍କୁ ଗିରଫ କରାଯାଇଛି। ଆଜି ନୂଆସକୁ ଜଙ୍ଗଲକୁ ନିଆଯାଇଥିଲା। ସେ ବଳଦ ମଢ଼ରେ କିପରି ବିଷ ମିଶାଇଥିଲା ତାହା ଘଟଣାସ୍ଥଳରେ ବର୍ଣ୍ଣନା କରିଥିଲା। ରାଉରକେଲା ଆଞ୍ଚଳିକ ମୁଖ୍ୟ ବନ ସଂରକ୍ଷକ ପି ରାମାସ୍ବାମୀ, ବଣାଇ ବନଖଣ୍ଡ ଅଧିକାରୀ ଲଳିତ କୁମାର ପାତ୍ର ଓ ସ୍ଥାନୀୟ ସରପଞ୍ଚ ସସ୍ମିତା ଏକ୍କାଙ୍କ ଉପସ୍ଥିତିରେ ବଣାଇ ଓ ଗୁରୁଣ୍ଡିଆର ପ୍ରାଣୀ ଚିକିତ୍ସକ ଦଳ କଲରାପତରିଆର ଶବ ବ୍ୟବଚ୍ଛେଦ କରିଛନ୍ତି। ତା’ ମୃତଦେହକୁ ସେଠାରେ ପୋତି ଦିଆଯାଇଥିବା ବଣାଇ ବନଖଣ୍ଡ ଅଧିକାରୀ ଶ୍ରୀ ପାତ୍ର ସୂଚନା ଦେଇଛନ୍ତି।