ଭୁବନେଶ୍ବର : ସରଗରମ ହେବ ବିଧାନସଭା। ଆଜି ବିଧାନସଭା ଶୀତ ଅଧିବେଶନର ତୃତୀୟ ଦିନ। ଶିଶୁ ବିକ୍ରି, ଆମ୍ବ ଟାକୁଆ ଖାଇ ଆଦିବାସୀ ମୃତ୍ୟୁ ଏବଂ ବିପର୍ଯ୍ୟସ୍ତ ଆଇନ ଶୃଙ୍ଖଳା ଆଦି ବଡ ପ୍ରସଙ୍ଗ ଆଜି ଗୃହରେ ଉଠିବ। ଆଜି ବିଭିନ୍ନ ବିଭାଗ ର ପ୍ରଶ୍ନକାଳ ମଧ୍ୟ ରହିଛି। ବିରୋଧୀ ଦଳ ପକ୍ଷରୁ ମୁଲତବୀ ପ୍ରସ୍ତାବ ଦିଆଯିବ । ବୁଧବାର ଦ୍ଵିତୀୟ ଦିନରେ ଗନ୍ଧମାର୍ଦନ ପାହାଡ ପାଦଦେଶ ଜମି ଘରୋଇ କମ୍ପାନୀକୁ ସରକାର ବିକ୍ରି କରିବାକୁ ନେଇ ବିଧାନସଭାରେ ଉଭୟ ବିରୋଧୀ ଓ ଶାସକ ଦଳ ବିଧାୟକ ମୁହାଁମୁହିଁ ହୋଇଥିଲେ। ଆରୋପ-ପ୍ରତ୍ୟାରୋପରେ ଗୃହ କମ୍ପିଥିଲା। ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ ସରକାରଙ୍କୁ ଜବାବ ମାଗି ଘେରିଥିବାବେଳେ ଉପମୁଖ୍ୟମନ୍ତ୍ରୀ କନକବର୍ଦ୍ଧନ ସିଂହଦେଓ ଉତ୍ତର ରଖି ପାଲଟା ଶାଣିତ ଆକ୍ରମଣ କରିଥିଲେ। ଗନ୍ଧମାର୍ଦନର ଇଞ୍ଚେ ଜମି ସରକାର କାହାକୁ ବିକ୍ରି କରିବେ ନାହିଁ। ଯଦି ସରକାର ଜମି ବିକ୍ରି କରିବାକୁ ନିଷ୍ପତ୍ତି ନିଅନ୍ତି, ଗନ୍ଧମାର୍ଦନ ସୁରକ୍ଷା ପାଇଁ ସେ ନିଜେ ଆନ୍ଦୋଳନରେ ସାମିଲ ହେବେ ବୋଲି ଉପମୁଖ୍ୟମନ୍ତ୍ରୀ କନକବର୍ଦ୍ଧନ ରୋକ୍ଠୋକ୍ ଗୃହରେ କହିଥିଲେ। ଶାସକ ଦଳର ପାଲଟା ଆକ୍ରମଣରେ ବିରୋଧୀ ଦଳ ଉପନେତା ଶ୍ରୀ ଆଚାର୍ଯ୍ୟ ତୁନି ପଡିଯାଇଥିବା ଦେଖିବାକୁ ମିଳିଥିଲା।
Comments are closed.