ବିହାର: ବେଗୁସରାଇରେ ତିନି ଜଣଙ୍କୁ ହତ୍ୟା । ବେଗୁସରାଇ ଜିଲାର ସାହେବପୁର କମଲ ପୁଲିସ ଷ୍ଟେସନ ଆହୋକ ଗୋବିନ୍ଦପୁର ଅଂଚଳରେ ଘଟିଛି ଏହି ବିଭତ୍ସ ହତ୍ୟାକାଣ୍ଡ । ଏଠାରେ ପ୍ରେମବିବାହ ଏବଂ ପାରିବାରିକ କଳହର କରୁଣ ପରିଣତି ରକ୍ତାକ୍ତରେ ସମାପ୍ତ ହୋଇଛି । ଝିଅକୁ ଶାଶୁ ଘରେ ଛାଡିବାକୁ ଯାଇଥିବା ବାପା, ଭାଇ ଏବଂ କନ୍ୟାଙ୍କୁ ଗୁଳି କରି ହତ୍ୟା କରାଯାଇଥିବା ଅଭିଯୋଗ ହୋଇଛି । କନ୍ୟା ଘର ପାଶ୍ୱର୍ରୁ ୩ଜଣଙ୍କୁ ଗୁଳି କରିବ ହତ୍ୟା କରାଯାଇଥିବା ବେଳେ ବର ଘରର ଜଣେ ଆହତ ହୋଇ ବେଗୁସରାଇ ମେଡିକାଲରେ ଚିକିତ୍ସିତ ହେଉଛନ୍ତି ।
କନ୍ୟା ପକ୍ଷ କହିଛନ୍ତି ଯେ ପୁଅ-ଝିଅ ପରସ୍ପରକୁ ଭଲ ପାଉଥିଲେ । ପରିବାର ଲୋକ ବିବାହ ପାଇଁ ରାଜି ନହେବାରୁ ଦୁହେଁ ଘର ଛାଡି ପଳାଇବା ସହ ମନ୍ଦିରରେ ବିବାହ କରିଥିଲେ । ଏହା ପରେ ପରିବାରର ଚାପରେ ପୁଅଟି ଝିଅକୁ ରଖିବାକୁ ମନା କରିଥିଲା । ଗତ ଦେଢ ବର୍ଷ ହେବ ଏହି କାରଣରୁ ବିବାଦ ଦେଖାଦେଇଥିଲା । ପୁଅ ଘର ଲୋକ ଯୌତୁକ ସାଙ୍ଗକୁ ୧୫ଲକ୍ଷ ଟଙ୍କା ମାଗିଥିଲେ । ଝିଅର ବାପା ଦୀର୍ଘ ଦିନ ପରେ ୧୫ଲକ୍ଷ ଟଙ୍କା ଜମା କରିବା ପରେ ଝିଅକୁ ସାଙ୍ଗରେ ନେଇ ବାପା ଭାଇ ଶାଶୁ ଘରେ ଛାଡିବାକୁ ଯାଇଥିଲେ । ହେଲେ ୧୫ଲକ୍ଷ ନେବା ପରେ ପୁଅ ଘର ଲୋକ ଝିଅକୁ ରଖିବାକୁ ମନା କରିବା ସହ ବାପା ଭାଇ ଓ ଝିଅକୁ ଗୁଳି କରି ହତ୍ୟା କରିଥିଲେ । ହତ୍ୟା ପରେ ପୁଅ ଘର ଲୋକ ଫେରାର ହୋଇଥିବା ବେଳେ ପୁଲିସ ସେମାନଙ୍କୁ ଧରିବାକୁ ପ୍ରୟାସ କରୁଛି ।
ଏହି ବିଭତ୍ସ ହତ୍ୟାକାଣ୍ଡ ପରେ ଗାଁରେ ଉତ୍ତେଜନା ପ୍ରକାଶ ପାଇଛି । ଏସପି, ଡିଏସପି ସହିତ ବହୁ ପୁଲିସ ଫୋର୍ସ ଗାଁରେ ପହଂଚି ଘଟଣାର ଛାନଭିନ କରୁଛନ୍ତି ।
