ଶିବରାଜ, ବସୁନ୍ଧରା ଏବଂ ରମଣଙ୍କୁ ମିଳିବନି ଲୋକସଭା ନିର୍ବାଚନ ଦାୟିତ୍ୱ

ନୂଆଦିଲ୍ଲୀ : ପାଞ୍ଚଟି ରାଜ୍ୟର ବିଧାନସଭା ନିର୍ବାଚନରୁ ୩ଟି ହିନ୍ଦୀ ଭାଷୀ ରାଜ୍ୟରେ ବଡ଼ ବ୍ୟବଧାନରେ ପରାଜୟ ପରେ ବିଜେପି ଲୋକସଭା ନିର୍ବାଚନ ପାଇଁ ନୂଆ ରଣନୀତି ପ୍ରସ୍ତୁତ କରିବାକୁ ନିଷ୍ପତ୍ତି ନେଇଛି। ଏହି କ୍ରମରେ ବିଜେପି ରାଜସ୍ଥାନରୁ ବସୁନ୍ଧରା ରାଜେ, ମଧ୍ୟପ୍ରଦେଶରୁ ଶିବରାଜ ସିଂହ ଚୌହାନ ଏବଂ ଛତିଶଗଡ଼ରୁ ରମଣ ସିଂହଙ୍କୁ ଲୋକସଭା ନିର୍ବାଚନ ଦାୟିତ୍ୱରୁ ହଟାଇ ନୂଆ ମୁହଁକୁ ଦାୟିତ୍ୱ ଦେବ ବୋଲି ଦଳୀୟ ସୂତ୍ରରୁ ଜାଣିବାକୁ ମିଳିଛି।
କୁହାଯାଉଛି ଏହି ୩ ନେତାଙ୍କୁ କେନ୍ଦ୍ର ମନ୍ତ୍ରିମଣ୍ଡଳରେ ଅବସ୍ଥାପିତ କରାଯିବ। ଏମାନଙ୍କ ସ୍ଥାନରେ ରାଜ୍ୟର ନୂଆ ନେତାଙ୍କୁ ଲୋକସଭା ନିର୍ବାଚନ ଦାୟିତ୍ୱ ଦିଆଯିବ। ବିଜେପି ଏହି ନେତାଙ୍କ ଏକ ତାଲିକା ପ୍ରସ୍ତୁତ କରିଥିବା ଦଳୀୟ ସୂତ୍ରରୁ ଜଣାପଡିଛି। ସେମାନଙ୍କ ମଧ୍ୟରୁ ୩ ଜଣଙ୍କୁ ଦଳୀୟ ଦାୟିତ୍ୱ ଦିଆଯିବ। ଏହାସହ ଏହି ୩ ରାଜ୍ୟର ଦଳୀୟ କନ୍ଦଳକୁ ଦୂର କରିବା ପାଇଁ ରାଜ୍ୟସ୍ତରୀୟ ନୂଆ ଲୋକସଭା ନିର୍ବାଚନ କମିଟି ଗଠନ କରାଯିବ। ଏବେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିଜର ପୂର୍ଣ୍ଣ ଧ୍ୟାନ ଲୋକସଭା ନିର୍ବାଚନ ଉପରେ ଦେବାକୁ ଚାହୁଁଛନ୍ତି। କେନ୍ଦ୍ର ମନ୍ତ୍ରୀ ସୁଷମା ସ୍ୱରାଜ ଏବଂ ଉମା ଭାରତୀ ୨୦୧୯ରେ ନିର୍ବାଚନ ଲଢିବେ ନାହିଁ ବୋଲି ଘୋଷଣା କରିସାରିଛନ୍ତି। ଏପେଟ ଅରୁଣ ଜେଟଲୀଙ୍କ ସ୍ୱାସ୍ଥ୍ୟାବସ୍ଥା ଭଲ ନାହିଁ। ଅନନ୍ତ କୁମାରଙ୍କ ଦେହାନ୍ତ ପରେ ବିଜେପିରେ ଉତ୍କୃଷ୍ଟ ନେତୃତ୍ୱର ଅଭାବ ପରିଲକ୍ଷିତ ହୋଇଛି। କେନ୍ଦ୍ରରେ ଦୃଢ ନେତୃତ୍ୱ ପାଇଁ ଶିବରାଜ, ବସୁନ୍ଧରା ଏବଂ ରମଣ ସିଂହଙ୍କୁ କେନ୍ଦ୍ର ମନ୍ତ୍ରି ମଣ୍ଡଳରେ ସାମିଲ କରିବାକୁ ବିଜେପି ନିଷ୍ପତ୍ତି ନେଇଛି।