କେନ୍ଦୁଝରଗଡ଼: ନାବାଳିକା ବଳାତ୍କାର ଅଭିଯୁକ୍ତକୁ ଦୋଷୀ ସାବ୍ୟସ୍ତ କରି ଫାଷ୍ଟ ଟ୍ରାକ୍ କୋର୍ଟ କେନ୍ଦୁଝର ଗୁରୁବାର ୭ବର୍ଷ ସଶ୍ରମ ଜେଲ ଦଣ୍ଡାଦେଶ ଶୁଣାଇଛନ୍ତି। ଭୁଲୁଦା ଗ୍ରାମର ଜନୈକା ୧୬ବର୍ଷର ନାବାଳିକା ଝାରବେଲଦାସ୍ଥିତ ସନ୍ତାଷୀ ମା’ ରିଜିଓନାଲ ମହାବିଦ୍ୟାଳୟରେ ଶିକ୍ଷା ଗ୍ରହଣ ସାରି ଘରକୁ ଫେରୁଥିବା ବେଳେ ଟାଉନ ଥାନା ଅଧିନ କବିତ୍ରା ଗ୍ରାମର ରଜତ କୁମାର ମହାନ୍ତ ଘରେ ଛାଡିଦେବାକୁ କହି ସମ୍ପୃକ୍ତ ନାବାଳିକାଜଣକୁ ବାଇକ୍ରେ ବସାଇ ନିକଟସ୍ଥ ଭାଲୁଘରସ୍ଥିତ ଜଙ୍ଗଲକୁ ନେଇ ଜୋରଜବରଦସ୍ତ ବଳାତ୍କାର କରିବା ପରେ ଉକ୍ତ ଜଙ୍ଗଲରେ ଛାଡି ପଳାଇଥିଲା।
ନାବାଳିକା ଜଣକ ଘରେ ପହଞ୍ଚି ଘଟଣା ସମ୍ପର୍କରେ ବାପାଙ୍କ ଆଗରେ କହିବା ପରେ ବାପା ଥାନାରେ ଅଭିଯୋଗ କରିଥିଲେ। ଏହାପରେ ପୁଲିସ ଅଭିଯୁକ୍ତ ରଜତକୁ ଗିରଫ ପରେ କୋର୍ଟ ଚାଲାଣ କରିଥିଲା। ମୋଟ ୧୨ଜଣ ସାକ୍ଷୀଙ୍କ ବୟାନକୁ ଭିତ୍ତିକରି ଫାଷ୍ଟ ଟ୍ରାକ୍ କୋର୍ଟ କେନ୍ଦୁଝରର ବିଚାରପତି ବିଜୟ କୁମାର ମିଶ୍ର ଗୁରୁବାର ମାମଲାର ଚୂଡାନ୍ତ ଶୁଣାଣି କରିଥିଲେ। ଅଭିଯୁକ୍ତ ରଜତକୁ ଦୋଷୀ ସାବ୍ୟସ୍ତ କରି ୭ବର୍ଷ ଜେଲ ଦଣ୍ଡାଦେଶ ସହ ୧୦ହଜାର ଟଙ୍କା ଜୋରିମାନା ଏବଂ ଜୋରିମାନା ଅନାଦେୟ ଅଧିକ ୬ ମାସ ସଶ୍ରମ କାରାଦଣ୍ଡାଦେଶ ଶୁଣାଇଥିଲେ। ଏଥିସହ ପୀଡିତା କ୍ଷତିପୂରଣ ନିମନ୍ତେ ୫ଲକ୍ଷ ଟଙ୍କା ଆର୍ଥିକ ସହାୟତା ଯୋଗାଇ ଦେବାକୁ ଜିଲା ଆଇନସେବା ପ୍ରାଧିକରଣକୁ ସୁପାରିଶ କରିଛନ୍ତି। ପୀଡିତାଙ୍କ ପକ୍ଷରୁ ସ୍ପେଶାଲ ପି.ପି. ଜ୍ଞାନେନ୍ଦ୍ରନାଥ ଜେନା ମକଦ୍ଦମା ପରିଚାଳନା କରୁଥିଲେ।
Comments are closed.