ଆଠଗଡ : ଆଠଗଡର ବହୁ ପୁରାତନ ଶ୍ରୀ ରଘୁନାଥ ଜୀଉ ମନ୍ଦିର ପ୍ରାଙ୍ଗଣରେ ରଘୁନାଥ ଜୀଉ ରାମଲୀଳା ନାଟ୍ୟ ସଂଘର ୭୫ ବର୍ଷ ପୂର୍ତ୍ତି ଅବସରରେ ଗତ ୧୭ ଦିନ ଧରି ଚାଲିଥିବା ସମାରୋହ ରାତିରେ ଉଦ୍ଯାପିତ ହୋଇଯାଇଛି। ରାମନବମୀଠାରୁ ଚାଲିଥିବା ଏହି ଲୀଳା ଶ୍ରୀରାମ ଜନ୍ମଠାରୁ ଆରମ୍ଭ ହୋଇ ରାବଣ ବଧ ଓ ଶ୍ରୀରାମଙ୍କ ରାଜ୍ୟ ଅଭିଷେକରେ ଶେଷ ହୋଇଛି। ଶନିବାର ଉଦ୍ଯାପନୀ ଉତ୍ସବରେ ମୁଖ୍ୟଅତିଥି ଭାବେ ସ୍ଥାନୀୟ ବିଧାୟକ ତଥା କୃଷିମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ ମୁଖ୍ୟଅତିଥି, ବିଶିଷ୍ଟ ସାହିତ୍ୟିକ ଡଃ ନାରାୟଣ ପଣ୍ଡା, ମୁଖ୍ୟବକ୍ତା, ସୁନାମଧନ୍ୟ ଗୀତିକାର ରାଧାନାଥ ଦାସ, ଉପନଗରପାଳ, ଯୁବ ସଂଗଠକ ପ୍ରକାଶ ରାଉତ ପ୍ରମୁଖ ସମ୍ମାନିତ ଅତିଥି ଭାବେ ଯୋଗଦେଇ ମର୍ଯ୍ୟାଦା ପୁରୁଷୋତ୍ତମ ପ୍ରଭୁ ଶ୍ରୀ ରାମଙ୍କ ମାର୍ଗଦର୍ଶନକୁ ଆଧାର କରି ସମାଜରେ ଏକ ସୁସ୍ଥ ପରମ୍ପରା ସୃଷ୍ଟି କରିବା ଲାଗି ପରାମର୍ଶ ଦେଇଥିଲେ। ଶ୍ରୀରାମଙ୍କ ଦ୍ୱାରା ପ୍ରତିଷ୍ଠିତ ସମାଜ ଏବଂ ପ୍ରଣିତ ସାମାଜିକ ତତ୍ତ୍ୱ ଓ ରାଜକାର୍ଯ୍ୟ ବିଶ୍ୱବନ୍ଦିତ ବୋଲି ଅତିଥିଗଣ କହିବା ସହ ଏହା ଭାରତୀୟ ସଂସ୍କୃତିକୁ ରୁଦ୍ଧିମନ୍ତ କରିଛି ବୋଲି ମତବ୍ୟକ୍ତ କରିଥିଲେ। ଏହି ରାମଲୀଳ ଦ୍ୱାରା ଆଠଗଡ ଅଞ୍ଚଳରେ ଏକ ଆଧ୍ୟାତ୍ମିକ ପରିବେଶ ସୃଷ୍ଟି ହେବା ସହିତ ଭାଇଚାରା ସୁଦୃଢ କରିବାରେ ସହାୟକ ହୋଇଛି ବୋଲି ସେମାନେ ପ୍ରକାଶ କରିଥିଲେ।
ସଂଘର ସଭାପତି ପ୍ରଭାକର ପଟ୍ଟନାୟକଙ୍କ ସଭାପତିତ୍ୱରେ ଅନୁଷ୍ଠିତ ଏହି କାର୍ଯ୍ୟକ୍ରମ ଅବସରରେ ମନ୍ତ୍ରୀ ଶ୍ରୀ ସ୍ୱାଇଁ ଅନୁଷ୍ଠାନର ପୂଜ୍ୟଗୁରୁ ସ୍ୱର୍ଗତ ରାହାସ ବିହାରୀ ନାୟକ, ସଭାପତି କାଶିନାଥ ପ୍ରଧାନ, ପ୍ରତିଷ୍ଠାତା ସଭ୍ୟ ପଠାଣୀ ସିଠ, କେତି ଦେଇଙ୍କ ସ୍ମୃତିଚାରଣ କରି ସେମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ବର୍ଷିୟାନ କଳାକାର ତଥା ନାଟ୍ୟଗୁରୁ ସଦାନନ୍ଦ ସାହୁ, ଅଭିରାମ ବେହେରା, ସୁବାସ ବେହେରା ଓ ତ୍ରିଲୋଚନ ପ୍ରଧାନ ପ୍ରମୁଖଙ୍କୁ ମନ୍ତ୍ରୀ ପୁଷ୍ପଗୁଚ୍ଛ, ଉତ୍ତରୀୟ ଓ ମାନପତ୍ର ଦେଇ ସମ୍ବର୍ଦ୍ଧିତ କରିଥିଲେ। ଏହାଛଡା ବର୍ତ୍ତମାନ ଏହି ପୌରାଣିକ ଲୋକକଳାକୁ ବଞ୍ଚାଇ ରଖିଥିବା ୧୦ଜଣ କଳାକାରଙ୍କୁ ମଧ୍ୟ ସମ୍ବର୍ଦ୍ଧିତ କରାଯାଇଥିଲା । ସଭ୍ୟ ସତ୍ୟପ୍ରସାଦ ରଥଙ୍କ ମଞ୍ଚ ସଂଯୋଜନାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ସଂପାଦକ ସଂଘର ବିବରଣୀ ଉପସ୍ଥାପନ କରିବା ସହ ଧନ୍ୟବାଦ ଅର୍ପଣ କରିଥିଲେ।
Comments are closed.