ବେଗୁନିଆ : ସାରା ବିଶ୍ୱ କରୋନା ମହାମାରୀ କବଳରେ ରହିଥିବାବେଳେ ଏହା ପୁଣିଥରେ ଆମ ଦେଶରେ ଘାତକ ହେବାରେ ଲାଗିଛି। କରୋନାର ଦ୍ୱିତୀୟ ଲହର ଆହୁରି ଅଧିକ ସଂକ୍ରାମକ ହୋଇଥିବାରୁ ପୂର୍ବାପେକ୍ଷା କଟକଣା ଅଧିକ ଶକ୍ତ କରାଯିବାର ଆବଶ୍ୟକତା ରହିଛି । ଏହାକୁ ଦୃଷ୍ଟିରେ ରଖି ସରକାର କରୋନା କଟକଣାକୁ କଡାକଡି ପାଳନ ନିମନ୍ତେ ଅଧିକାରୀମାନଙ୍କୁ ନିର୍ଦେଶ ମଧ୍ୟ ଦିଆଯାଇଛି । ଏପରିକି କଟକଣା ଉଲ୍ଲଂଘନକାରୀଙ୍କ ବିରୋଧରେ କଡା କାର୍ୟ୍ୟାନୁଷ୍ଠାନ ଗ୍ରହଣ ପାଇଁ ମଧ୍ୟ ନିର୍ଦେଶ ରହିଛି। ହେଲେ ବେଗୁନିଆ ବ୍ଲକର ବିଭିନ୍ନ ହାଟ, ବଜାର ମାନଙ୍କରେ ଲୋକମାନେ କରୋନା କଟକଣା ମାନୁନଥିବା ଦେଖିବାକୁ ମିଳୁଛି। କିନ୍ତୁ ବେଗୁନିଆ ବ୍ଲକ ପ୍ରଶାସନ ତରଫରୁ କରୋନା କଟକଣା ଉପରେ କୌଣସି କାର୍ୟ୍ୟାନୁଷ୍ଠାନ ଗ୍ରହଣ କରାଯାଉ ନ ଥିବା ଦେଖିବାକୁ ମିଳିଛି। ଫଳରେ ବୁଦ୍ଧିଜୀବି ମହଲରେ ଉଦବେଗ ପ୍ରକାଶ ପାଇଛି।
ଅନ୍ୟପକ୍ଷରେ ବେଗୁନିଆ ବ୍ଲକ ଅଂଚଳରେ ବିଭିନ୍ନ ଛକରେ ଥିବା ଦୋକାନ ମାନଙ୍କରେ ଦୋକାନୀ ଓ ଗ୍ରାହକ ବିନା ମାସ୍କରେ ସାମାଜିକ ଦୂରତା ନରଖି ଦୋକାନ ବଜାର ଖୋଲି କିଣାବିକା କରୁଛନ୍ତି । ତେଣୁ ପୋଲିସ ପ୍ରଶାସନ ଲୋକମାନଙ୍କୁ ସଚେତନ କରାଇବାରେ ସେତେଟା ସଫଳ ହୋଇଥିବା ଦେଖିବାକୁ ମିଳୁନାହିଁ । ସ୍ଥାନୀୟ ପୋଲିସ ପ୍ରଶାସନ ଏ ଦିଗରେ କଡା କାର୍ୟ୍ୟାନୁଷ୍ଠାନ ଗ୍ରହଣ କରିବା ଜରୁରୀ ହୋଇପଡିଛି ବୋଲି ସ୍ଥାନୀୟ ଅଞ୍ଚଳରେ ମତ ପ୍ରକାଶ ପାଇଛି । ବ୍ଲକର ବିଡିଓ, ତହସିଲଦାର ଏବଂ ଥାନା ଅଧିକାରୀଙ୍କୁ କରୋନା କଟକଣା ଓ ଯାଞ୍ଚ ଉପରେ ଜିଲ୍ଲାପାଳ କ୍ଷମତା ପ୍ରଦାନ କରାଯାଇଛି। ସେହି ଦୃଷ୍ଟିରୁ ଅଧିକାରୀମାନେ ଅମାନିଆମାନଙ୍କୁ ସାବାଡ଼ କରିବା ଜରୁରୀ ହୋଇପଡିଛି ବୋଲି ସାଧାରଣରେ ହେଉଥିବା ଆଲୋଚନାରୁ ଜଣାପଡିଛି। ଅନ୍ୟପଟେ ବେଗୁନିଆ ତହସିଲ କାର୍ୟ୍ୟାଳୟ ପକ୍ଷରୁ ତହସିଲଦାର ପୃଥ୍ୱୀରାଜ ମଣ୍ଡଳ ବିଭିନ୍ନ ସମୟରେ କର୍ମଚାରୀମାନଙ୍କୁ ଧରି ଛକ ଜାଗା ଏବଂ ରାସ୍ତା ଉପରେ ମାସ୍କର ଘନ ଘନ ଚେକିଂ ସହିତ ଲୋକମାନଙ୍କୁ ସଚେତନ କରୁଥିବାର ଦେଖିବାକୁ ମିଳୁଛି। ବେଗୁନିଆ ପୋଲିସ କେତେବେଳେ କେମିତି ମାସ୍କ ଚେକିଂ କରୁଥିବାବେଳେ ଗ୍ରାମାଞ୍ଚଳରେ ମଧ୍ୟ କଡାକଡି ଚେକିଂ ପାଇଁ ବିଭିନ୍ନ ମହଲରୁ ଦାବୀ ହେଉଛି ।
Comments are closed.