ଭୁବନେଶ୍ବର: ବହୁଚର୍ଚ୍ଚିତ ପରୀ ଦୁଷ୍କର୍ମ ଓ ହତ୍ୟା ମାମଲାରେ ମଙ୍ଗଳବାର ବଡ଼ ରାୟ ପ୍ରକାଶ ପାଇଛି। ହତ୍ୟାକାରୀକୁ ୨୦ ବର୍ଷ ଜେଲ୍ ଦଣ୍ଡରେ ଦଣ୍ଡିତ କରାଯାଇଛି। ନୟାଗଡ଼ ସ୍ବତନ୍ତ୍ର ଚିଲ୍ଡ୍ରେନ୍ସ କୋର୍ଟ ଅଭିଯୁକ୍ତକୁ ଦୋଷୀ ସାବ୍ୟସ୍ତ କରି ୨୦ ବର୍ଷ ସଶ୍ରମ କାରାଦଣ୍ଡରେ ଦଣ୍ଡିତ କରିଛନ୍ତି। ଏଥିସହ ୬ ହଜାର ଟଙ୍କା ଜରିମାନା ଏବଂ ଜରିମାନା ଅନାଦେୟ ଅଧିକ ୧ ବର୍ଷ ଜେଲ୍ ଦଣ୍ଡାଦେଶ ଦେଇଛନ୍ତି ଅଦାଲତ। ସରକାରୀଙ୍କ ଓକିଲଙ୍କ କହିବା ମୁତାବକ, ଦୋଷୀ ନାବାଳକ। ତେଣୁ ତାକୁ ୨୦ ବର୍ଷ ଜେଲ୍ ଦଣ୍ଡ ହୋଇଛି। ଯଦି ସାବାଳକ ହୋଇଥାଆନ୍ତା, ତେବେ ମୃତ୍ୟୁଦଣ୍ଡ ମିଳିବାର ସମ୍ଭାବନା ଥିଲା।
ସୂଚନାଯୋଗ୍ୟ, ୨୦୨୦ରେ ଘଟିଥିବା ଏହି ହତ୍ୟାକାଣ୍ଡକୁ ନେଇ ରାଜ୍ୟରେ ହଇଚଇ ସୃଷ୍ଟି ହୋଇଥିଲା। ଏହାକୁ ନେଇ ରାଜନୈତିକ ତୁମ୍ବିତୋଫାନ ମଧ୍ୟ ହୋଇଥିଲା। ୫ ବର୍ଷୀୟା ଶିଶୁକନ୍ୟା ପରୀ ଗାଁ ଦାଣ୍ଡରେ ଖେଳୁଥିବା ବେଳେ ନିଖୋଜ ହୋଇଯାଇଥିଲା। ନିଖୋଜ ହେବାର ୧୦ ଦିନ ପରେ ଏକ ଅଖା ବସ୍ତାରୁ ଶିଶୁର ଗଳିତ ଦେହାବଶେଷ ଉଦ୍ଧାର ହୋଇଥିଲା। ପରେ ଶିଶୁକନ୍ୟାକୁ ଦୁଷ୍କର୍ମ କରି ହତ୍ୟା କରାଯାଇଥିବା ଜଣାପଡ଼ିଥିଲା। କ୍ରାଇମବ୍ରାଞ୍ଚ ଘଟଣାର ତଦନ୍ତ କରି ଅଭିଯୁକ୍ତକୁ ଗିରଫ କରିଥିଲା।
