ମୁମ୍ବଇ: ଏଠାରେ କୋଭିଡ-୧୯ର ଡେଲଟା ପ୍ଲସ୍ ପ୍ରକରଣରେ ଜଣେ ମହିଳା ରୋଗୀଙ୍କର ମୃତ୍ୟୁ ଘଟିଛି। ଏହି ପ୍ରକରଣଜନିତ ଏହା ପ୍ରଥମ ମୃତ୍ୟୁ ବୋଲି ଜଣାଯାଇଛି। ତେବେ ମହିଳା ଜଣକ କୋଭିଡର ଦୁଇଟିଯାନ ପାନ ଟିକା ନେଇସାରିଥିଲେ ମଧ୍ୟ ତାଙ୍କର ମୃତ୍ୟୁ ଘଟିଛି। ମିଳିଥିବା ସୂଚନା ଅନୁଯାୟୀ ୬୩ ବର୍ଷ ବୟସ୍କା ଏହି ମହିଳା ମଧୁମେହ ସମେତ ଅନ୍ୟାନ୍ୟ ରୋଗରେ ପୂର୍ବରୁ ପୀଡିତ ଥିଲେ। ଏହା ପୂର୍ବରୁ ମହାରାଷ୍ଟ୍ର ସ୍ୱାସ୍ଥ୍ୟ ବିଭାଗ ପକ୍ଷରୁ ବୁଧବାର ସୂଚନା ଦିଆଯାଇଥିଲା ଯେ ରାଜ୍ୟରେ କୋଭିଡ-୧୯ର ଡେଲଟା ପ୍ଲସ ପ୍ରକରଣରେ ଆକ୍ରାନ୍ତ ରୋଗୀଙ୍କ ସଂଖ୍ୟା ୬୫ରେ ପହଞ୍ଚିଛି।
ଏହାପରେ ମହାରାଷ୍ଟ୍ର ସରକାରଙ୍କ ପକ୍ଷରୁ କୋଭିଡ-୧୯ ସମ୍ପର୍କିତ ସାନି ନିର୍ଦ୍ଦେଶାବଳୀ ଜାରି କରାଯାଇଛି। ଏଥିରେ ବ୍ୟାୟାମଶାଳା, ପାର୍ଲର ଏବଂ ସେଲୁନଗୁଡିକ ୫୦ ପ୍ରତିଶତ କ୍ଷମତାରେ ଖୋଲିବାକୁ ନିର୍ଦ୍ଦେଶ ଦିଆଯାଇଛି। ଏହି ସଂଶୋଧିତ ନିର୍ଦ୍ଦେଶନାମା ଚଳିତ ମାସ ୧୫ ତାରିଖରୁ ଲାଗୁ ହେବ। ସେହିଭଳି ରାଜ୍ୟରେ ସମସ୍ତ ଦୋକାନ ବଜାର ସବୁଦିନ ରାତି ୧୦ଟା ପର୍ଯ୍ୟନ୍ତ ଖୋଲା ରହିବ। ବିବାହ ଓ ଅନ୍ୟାନ୍ୟ କାର୍ଯ୍ୟକ୍ରମରେ ସର୍ବାଧିକ ୨୦୦ ଲୋକ ସମବେତ ହେବାକୁ ଅନୁମତି ଦିଆଯାଇଛି। ସରକାରୀ କାର୍ଯ୍ୟାଳୟଗୁଡିକ ୧୦୦ ପ୍ରତିଶତ କର୍ମଚାରୀଙ୍କୁ ନେଇ କାଯ୍ୟଁ କରିବ ଏବଂ ସମସ୍ତ କର୍ମଚାରୀ ଦୁଇ ପାନ ଟିକା ନେବା ବାଧ୍ୟତାମୂଳକ କରାଯାଇଛି। ବେସରକାରୀ କାର୍ଯ୍ୟାଳୟଗୁଡିକ ୨୪ ଘଣ୍ଟା ଖୋଲା ରହିପାରିବ ଏବଂ ସେଠାରେ କର୍ମଚାରୀମାନେ ସମ୍ପୂର୍ଣ୍ଣ ଭାବରେ ଟିକା ନେବାକୁ କୁହାଯାଇଛି। ତେବେ ରାଜ୍ୟରେ ଧାର୍ମିକ, ରାଜନୈତିକ, ସାଂସ୍କୃତିକ କାର୍ଯ୍ୟକ୍ରମକୁ ଅନୁମତି ମିଳିବ ନାହିଁ ଏବଂ ଚଳଚ୍ଚିତ୍ର ପ୍ରେକ୍ଷାଳୟଗୁଡିକ ବନ୍ଦ ରହିବ।
