ସମ୍ବଲପୁର: ସମ୍ବଲପୁର ଲୋକସଭା କ୍ଷେତ୍ରରେ ବିଜେଡି ନିର୍ବାଚନ ଆଚରଣ ବିଧି ଉଲ୍ଲଂଘନ କରୁଛି ବୋଲି ଜିଲା ବିଜେପି ପକ୍ଷରୁ ଜିଲାପାଳ ତଥା ରିଟର୍ଣ୍ଣିଂ ଅଧିକାରୀ ସୁନୀଲ ଅକ୍ଷୟ ଅଗ୍ରୱାଲଙ୍କ ନିକଟରେ ଅଭିଯୋଗ କରିଛି। ବିଜେପି ପକ୍ଷରୁ ଦିଆଯାଇଥିବା ଅଭିଯୋଗ ପତ୍ର ଅନୁଯାୟୀ, ସମ୍ବଲପୁର ଲୋକସଭା ଅନ୍ତର୍ଗତ ଆଠମଲ୍ଲିକ, ଦେବଗଡ଼, କୁଚିଣ୍ଡା ଓ ରେଢ଼ାଖୋଲ ବିଧାନସଭା ଅଞ୍ଚଳରେ ଖୋଲାଖୋଲି ଭାବରେ ଆଚରଣ ବିଧି ବାରମ୍ବାର ଉଲ୍ଲଂଘନ କରାଯାଉଛି। ଆଠମଲ୍ଲିକ ଅଞ୍ଚଳରେ ଆଶା ଓ ଅଙ୍ଗନୱାଡି କର୍ମୀମାନେ ବିଜେଡି ପାଇଁ କାମ କରୁଥିବା ବେଳେ କୁଚିଣ୍ଡା ଓ ଦେବଗଡ଼ ଅଞ୍ଚଳରେ ମଧ୍ୟ କିଛି ଅଧିକାରୀ ଶାସକ ଦଳ ପାଇଁ କାର୍ୟ୍ୟ କରୁଛନ୍ତି। ରେଢ଼ାଖୋଲ ଅଞ୍ଚଳରେ ବିଭିନ୍ନ ମନ୍ଦିରରେ ବିଜେଡି ପକ୍ଷରୁ ଦଳୀୟ ପତାକା ଲଗାଇ ନିୟମକୁ ଖିଲାପ କରାଯାଉଛି। ଏଣୁ ପ୍ରଶାସନ ପକ୍ଷରୁ ଆବଶ୍ୟକ ପଦକ୍ଷେପ ନେବାକୁ ଦାବି କରାଯାଇଛି। ପ୍ରତିନିଧି ମଣ୍ଡଳରେ ଦାମୋଦର କର, ପ୍ରତୀକ ମହାପାତ୍ର, ସୌମିକ ବାବୁ, ସୁନୀଲ ନନ୍ଦ, ମିଲନ ମହାରଣା, ସୁଜିତ ମିଶ୍ର, ଅରବିନ୍ଦ ନାୟକ, ମହେଶ କୁମାର ପଣ୍ଡା ପ୍ରମୁଖ ଉପସ୍ଥିତ ରହିଥିଲେ।
Comments are closed.