ପାଟଣା: ୪୯ ନମ୍ବର ଜାତୀୟ ରାଜପଥର ତୁରୁମୁଙ୍ଗା ବଜାର ନିକଟ ହାତିବାରି ଛକ ତାରିଣୀ ଢାବା ସମ୍ମୁଖ ରାସ୍ତାରେ ଶନିବାର ରାତି ସାଢ଼େ ୮ଟାରେ ଏକ ଅଜଣା ଗାଡ଼ି ଧକ୍କାରେ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଛି। ଏହାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇବା ସହିତ ଲୋକେ ରାସ୍ତାରୋକୋ କରିଛନ୍ତି। କୌଣସି ଏକ ଭାରିଯାନ ଉକ୍ତ ବ୍ୟକ୍ତିଙ୍କ ଉପରେ ଚଢ଼ିଯିବାରୁ ତାଙ୍କର ମୃତ୍ୟୁ ହୋଇଛି। ମୃତକ ସ୍ଥାନୀୟ ଅଞ୍ଚଳର ବୋଲି ଜଣାପଡ଼ିଛି। କିନ୍ତୁ ଦୁର୍ଘଟଣାରେ ଶରୀର ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଯାଇଥିବାରୁ ତାଙ୍କୁ ଚିହ୍ନଟ କରାଯାଇପାରିନାହିଁ। ଦୁର୍ଘଟଣା ପରେ ହାତିବାରି ଗ୍ରାମର ମହିଳା ଏବଂ ପୁରୁଷମାନେ ରାସ୍ତାରୋକୋ କରିଥିବାରୁ ବହୁ ସଂଖ୍ୟକ ଗାଡ଼ିମୋଟର ରାସ୍ତାରେ ଅଟକି ରହିଥିଲା। ତୁରୁମୁଙ୍ଗା ଥାନା ଏସଆଇ ରସାନନ୍ଦ ନାଏକ ଘଟଣାସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରିବାକୁ ଉଦ୍ୟମ କରିବା ସହିତ ଘଟଣାର ତଦନ୍ତ ଚଳାଇଛନ୍ତି।
