ଚଣ୍ଡିଗଡ଼: ଘନ କୁହୁଡି ଯୋଗୁଁ ହରିୟାଣାର ୫୨ ନମ୍ବର ରାଜପଥରେ ରବିବାର ସକାଳେ ଏକାଧିକ ଯାନ ପରସ୍ପରକୁ ଧକ୍କା ଦେଇଥିବା ଜଣାପଡିଛି। ଦୁର୍ଘଟଣାଗ୍ରସ୍ତ ଯାନ ମଧ୍ୟରେ ବସ୍, ଟ୍ରକ୍ କାର୍ ଓ ବାଇକ୍ ସାମିଲ ରହିଛି। ହିସାରରେ କୈଥାଲ ରୋଡୱେଜ୍ର ଏକ ବସ୍ ଡମ୍ପର ଟ୍ରକ୍କୁ ପଛରୁ ଧକ୍କା ଦେଇଥିଲା। ପଛରୁ ଆସୁଥିବା ହରିୟାଣା ସଡକ ପରିବହନ ନିଗମର ଅନ୍ୟ ଏକ ବସ୍ ଡମ୍ପର ସହ ପିଟି ହୋଇଯାଇଥିଲା। ବସ୍-ଟ୍ରକ୍-ବସ୍ ଦୁର୍ଘଟଣାଗ୍ରସ୍ତ ଅବସ୍ଥାରେ ଥିବାବେଳେ ସେହି ରାସ୍ତାରେ ଆସୁଥିବା ଗୋଟିଏ କାର୍ ଓ ବାଇକ୍ ମଧ୍ୟ ସେଗୁଡିକ ସହ ଧକ୍କା ଖାଇଥିଲେ।
ଏଥିରେ ବସ୍ ଓ କାର୍ର କେତେକ ଯାତ୍ରୀ ସାମାନ୍ୟ ଆହତ ହୋଇଥିବାବେଳେ ବାଇକ୍ ଆରୋହୀ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ରେୱାରିସ୍ଥିତ ୩୫୨ ନମ୍ବର ଜାତୀୟ ରାଜପଥରେ ତିନି ଚାରିଟି ବସ୍ ପରସ୍ପରକୁ ଧକ୍କା ଦେଇଥିବା କୁହାଯାଇଛି। ଆହତଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି। ରୋହତକ୍ ସହରର ମେହାମ୍ ଅଞ୍ଚଳରେ ଘନ କୁହୁଡି ଯୋଗୁଁ ଜାତୀୟ ରାଜପଥରେ ପ୍ରାୟ ୩୫ଟି ଯାନ ପରସ୍ପରକୁ ଧକ୍କା ଦେଇଥିବା ପୁଲିସ ପକ୍ଷରୁ କୁହାଯାଇଇଛି। ଏଥିରେ ମଧ୍ୟ ଏକାଧିକ ଲୋକ ଆହତ ହୋଇଥିବାବେଳେ ଯାନଗୁଡିକ କ୍ଷତିଗ୍ରସ୍ତ ହୋଇଛି। ଦୁର୍ଘଟଣାଗ୍ରସ୍ତ ଯାନ ମଧ୍ୟରେ ଅଧିକାଂଶ ଟ୍ରକ ସାମିଲ ରହିଛି।
