କୋଏମ୍ବାଟୁର : ତାମିଲନାଡୁର କୋଏମ୍ବାଟୁର ଜିଲା ଅନ୍ତର୍ଗତ ଭାଲପରାଇ ସହରରେ ଜଣେ ମହିଳା ଏକ ଚିତାବାଘ ସହ ଲଢେଇ କରି ନିଜର ୧୧ ବର୍ଷୀୟା ଝିଅର ଜୀବନ ରକ୍ଷା କରିପାରିଛନ୍ତି। ମହିଳାଙ୍କ ଏତାଦୃଶ ସାହସକୁ ସବୁ ମହଲରେ ପ୍ରଶଂସା କରାଯାଇଛି। ୩୨ ବର୍ଷୀୟା ମୁଥୁଲକ୍ଷ୍ମୀ ଓ ତାଙ୍କ ଝିଅ ସାଥିୟା ଶନିବାର ରାତିରେ ଘର ପଛପଟରେ ଜାଳେଣି କାଠ ସଜାଡୁଥିବାବେଳେ ହଠାତ ଗୋଟିଏ ଚିତାବାଘ ସାଥିୟା ଉପରେ ଆକ୍ରମଣ କରିଥିଲା। ଚିତାବାଘଟି ଝିଅର ବେକକୁ କାମୁଡି ଧରିବା ସହ ଘୋଷାଡି ନେବାକୁ ଉଦ୍ୟତ ହେଉଥିବାବେଳେ ମୁଥୁଲକ୍ଷ୍ମୀ ଗୋଟିଏ କାଠଫାଳିଆରେ ଚିତା ମୁଣ୍ଡକୁ ଶକ୍ତ ପାହାର ପକାଇଥିଲେ। ଏଥିରେ ଚିତାଟି ସାଥିୟାକୁ ଛାଡି ନିକଟସ୍ଥ ଜଙ୍ଗଲକୁ ପଳାଇଥିଲା। ଆହତ ସାଥିୟାକୁ ଡାକ୍ତରଖାନାରେ ଭର୍ତ୍ତି କରାଯାଇଥିବାବେଳେ ତା’ର ସ୍ୱାସ୍ଥ୍ୟାବସ୍ଥା ଠିକ୍ ଥିବା ଜଣାପଡିଛି। ଖବର ପାଇ ବନ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚି ପରିସ୍ଥିତି ଅନୁଧ୍ୟାନ କରିବା ସହ ଚିତାବାଘକୁ ଧରିବାକୁ ଉଦ୍ୟମ ଜାରି ରଖିଥିବା ପ୍ରକାଶ।
