ବୌଦ୍ଧ : ବୌଦ୍ଧ ଅବକାରୀ ବିଭାଗ ପକ୍ଷରୁ ବିଭିନ୍ନ ସ୍ଥାନରେ ଚଢାଉ କରାଯାଇ ୧୦ ଲିଟର ଦେଶୀମଦ ସହିତ ୬୮୦ କିଲୋ ମହୁଲ ପୋଚ ନଷ୍ଟ କରାଯାଇଛି। ଦେଶୀମଦ କାରବାରରେ ଜଣେ ମହିଳାଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଥିବା ଜଣାପଡିଛି।
ମିଳିଥିବା ସୂଚନା ମୁତାବକ, ବୌଦ୍ଧ ଥାନା ବୀରନରସିଂହପୁର ପଂଚାୟତର ନୂଆପଡା ଗ୍ରାମର ସସ୍ମିତା ମଲ୍ଲିକ(୩୦) ଏକ ଜାରରେ ୧୦ ଲିଟର ଦେଶୀମଦ ନେଇ ଯାଉଥିବାବେଳେ ଅବକାରୀ ବିଭାଗ ପକ୍ଷରୁ ଚଢାଉ କରାଯାଇ ମଦ ଜବତ କରାଯିବା ସହିତ ମହିଳାଙ୍କୁ ଗିରଫ କରାଯାଇଥିଲା। ସେହିପରି ନୂଆପଡା ନାଳଖଣ୍ଡିରେ ଦେଶୀମଦ ରନ୍ଧା ଯାଉଥିବା ସୂଚନା ପାଇ ଅବକାରୀ ବିଭାଗ ପକ୍ଷରୁ ସେଠାରେ ଚଢାଉ କରାଯାଇଥିଲା। ମଦ ପ୍ରସ୍ତୁତକାରୀମାନେ ଚଢାଉ ସଂପର୍କରେ ସୂଚନା ପାଇ ସେଠାରୁ ଫେରାର ହୋଇଯାଇଥିବାବେଳେ ୬୮୦ କିଲୋ ମହୁଲ ପୋଚ ନଷ୍ଟ କରାଯିବା ସହିତ ମଦରନ୍ଧା ସାମଗ୍ରୀ ସବୁ ଅବକାରୀ ବିଭାଗ ପକ୍ଷରୁ ଜବତ କରାଯାଇଥିବା ଏସଆଇ ରମେଶ ଚନ୍ଦ୍ର ମହାନ୍ତି ସୂଚନା ଦେଇଛନ୍ତି। ଏହି ଚଢାଉରେ ଏଏସଆଇ ରୂପେଶ ମୁଖୀ, କନେଷ୍ଟବଳ ଅଂଜଳୀ ଅମାତ, ପଂଚମୀ ବେହେରା, କୈଳାଶ ସାହୁ,ସଂଜୟ ସେଠୀ ପ୍ରମୁଖ ସାମିଲ ଥିଲେ।
