ଏହି ଧାର୍ମିକ ପର୍ଯ୍ୟଟନ ସ୍ଥଳ ନାମରୁ ହୋଇଛି ମୁମ୍ବଇର ନାମକରଣ

ମହାରାଷ୍ଟ୍ରର ରାଜଧାନୀ ମୁମ୍ବଇରେ ବହୁ ଧାର୍ମିକ ପର୍ଯ୍ୟଟନ ସ୍ଥଳ ରହିଛି। ଯେଉଁଥିରେ ମୁମ୍ବା ଦେବୀ ମନ୍ଦିର ପ୍ରମୁଖ ଅଟେ। ଏହି ଦେବୀଙ୍କ ମହିମା ଖୁବ ପ୍ରସିଦ୍ଧ ଅଟେ। ମୁମ୍ବଇ ନାମ ମରାଠୀର ଶବ୍ଦ ମୁମ୍ବାରୁ ଆସିଛି। କୁହାଯାଏ ଯେ ମୁମ୍ବା ମାତାଙ୍କ ନାମରୁ ହିଁ ଏହି ନାମକରଣ କରାଯାଇଛି। ଏହି ମନ୍ଦିରର ଇତିହାସ ପ୍ରାୟ ୪୦୦ ବର୍ଷ ପୁରାତନ ବୋଲି କୁହାଯାଉଛି। ସମ୍ପୂର୍ଣ୍ଣ ମହାରାଷ୍ଟ୍ରରେ ଏହି ମନ୍ଦିରର ଖୁବ ମାନ୍ୟତା ରହିଛି।
ମୁମ୍ବଇର ଆରମ୍ଭରେ ପ୍ରଥମେ କେଉଟ ମାନଙ୍କ ଏହା ବସ୍ତି ଥିଲା। ଏହି ଲୋକଙ୍କୁ ମୁମ୍ବଇରେ କୋଲୀ ବୋଲି କୁହାଯାଉଥିଲା। ଏହି କୋଲୀ ଲୋକମାନେ ବୋରୀ ବନ୍ଦରରେ ମୁମ୍ବା ଦେବୀଙ୍କ ମନ୍ଦିର ସ୍ଥାପନା କରିଥିଲେ। ଦେବୀ ମା’ଙ୍କ କୃପାରୁ ଏହି ମତ୍ସ୍ୟଜୀବୀ ମାନଙ୍କର ସମୁଦ୍ର କୌଣସି କ୍ଷତି କରିନଥିବା କୁହାଯାଏ। ଏହି ମନ୍ଦିର ମୂଳ ରୂପରେ ସେହି ସ୍ଥାନରେ ସ୍ଥାପନ ହୋଇଛି ତାହା ବର୍ତ୍ତମାନର ବିକ୍ଟୋରିଆ ଟର୍ମିନସ ବିଲଡ଼ିଙ୍ଗ ସ୍ଥାନ ଅଟେ।
ଏହି ମନ୍ଦିରଟି ଦେଖିବାକୁ ଖୁବ ଆକର୍ଷଣୀୟ ଅଟେ। ମା’ଙ୍କ ମୂର୍ତ୍ତି ସହ ତାଙ୍କ ସୁନ୍ଦର ସୁଶୋଭିତ ମକୁଟ ମନରେ ଭକ୍ତିର ଭାବ ଜାଗ୍ରତ କରିଥାଏ। ମନ୍ଦିରରେ ଅନ୍ୟାନ୍ୟ ଦେବାଦେବୀଙ୍କ ମୂର୍ତ୍ତି ମଧ୍ୟ ରହିଛି। ଦିନକୁ ପ୍ରାୟ ୬ ଥର ଏହି ମନ୍ଦିରରେ ଆଳତୀ ହୋଇଥାଏ। ପ୍ରତିଦିନ ଏହି ମନ୍ଦିରରେ ଭକ୍ତଙ୍କ ଭିଡ଼ ହୋଇଥାଏ। ମାତ୍ର ମଙ୍ଗଳବାର ଦିନ ସେଠାରେ ବହୁ ଭକ୍ତଙ୍କ ସମାଗମ ହୋଇଥାଏ। ଶ୍ରଦ୍ଧାଳୁଙ୍କ ବିଶ୍ୱାସ ଯେ, ଏହି ମନ୍ଦିରରେ ମାନସିକ କରିଥିବା ସମସ୍ତ ମନସ୍କାମନା ପୂରଣ ହୋଇଥାଏ।