ପୋର୍ଟ ଏଲିଜାବେଥ୍ : ଓସାଦା ଫର୍ଣ୍ଣାଣ୍ଡୋ ଓ କୁଶଲ ମେଣ୍ଡିସଙ୍କ ଅପରାଜିତ ଅର୍ଦ୍ଧଶତକ ବଳରେ ଶ୍ରୀଲଙ୍କା ଏଠାରେ ଖେଳାଯାଇଥିବା ଦ୍ବିତୀୟ ତଥା ଅନ୍ତିମ କ୍ରିକେଟ ଟେଷ୍ଟରେ ଘରୋଇ ଦକ୍ଷିଣ ଆଫ୍ରିକାକୁ ୮ ୱିକେଟରେ ପରାସ୍ତ କରିଛି। ୧୯୭ ରନ୍ର ଲକ୍ଷ୍ୟକୁ ଶ୍ରୀଲଙ୍କା କେବଳ ୨ ୱିକେଟ ବିନିମୟରେ ହାସଲ କରିଛି। ଏହି ବିଜୟ ଫଳରେ ଶ୍ରୀଲଙ୍କା ଦୁଇଟିକିଆ ସିରିଜକୁ ୨-୦ରେ ପୋଛିନେଇଛି। ଅପରପକ୍ଷରେ ଶ୍ରୀଲଙ୍କା ପ୍ରଥମ ଏସୀୟ ରାଷ୍ଟ୍ରଭାବେ ଦକ୍ଷିଣ ଆଫ୍ରିକା ମାଟିରେ ଟେଷ୍ଟ ସିରିଜ ଜିତିବାରେ ସଫଳ ହୋଇଛି।
୧୯୭ ରନ୍ର ଲକ୍ଷ୍ୟକୁ ପିଛା କରୁଥିବା ଶ୍ରୀଲଙ୍କା ୨/୬୦ ରନରୁ ତୃତୀୟ ଦିନର ଖେଳ ଆରମ୍ଭ କରିଥିଲା। ଦୁଇ ଅପରାଜିତ ବ୍ୟାଟସମ୍ୟାନ ଓସାଦା ଫର୍ଣ୍ଣାଣ୍ଡୋ ଓ କୁଶଲ ମେଣ୍ଡିସ ଦକ୍ଷିଣ ଆଫ୍ରିକା ବୋଲରଙ୍କ ଉଚିତ ମୁକାବିଲା କରି ୩ୟ ୱିକେଟ ପାଇଁ ଅବିଭାଜିତ ୧୬୩ ରନ ଯୋଗ କରିଥିଲେ। ଫଳରେ ଶ୍ରୀଲଙ୍କା ଦ୍ବିତୀୟ ଇନିଂସରେ ୨ ୱିକେଟରେ ବିଜୟ ପାଇଁ ଆବଶ୍ୟକ ୧୯୭ ରନ ସ୍କୋର କରିଥିଲା। ଫର୍ଣ୍ଣାଣ୍ଡୋ ୭୫ ଓ ମେଣ୍ଡିସ ୮୪ ରନରେ ଅପରାଜିତ ଥିଲେ। ଦକ୍ଷିଣ ଆଫ୍ରିକା ପକ୍ଷରୁ କାଗିସୋ ରାବାଡା ଓ ଡୁଆନ୍ ଅଲିଭିୟର ଗୋଟିଏ ଲେଖାଏଁ ୱିକେଟ ଅକ୍ତିଆର କରିଥିଲେ। ଶ୍ରୀଲଙ୍କାର କୁଶଲ ମେଣ୍ଡିସ ‘ପ୍ଲେୟାର ଅଫ୍ ଦି ମ୍ୟାଚ’ ଓ କୁଶଲ ପରେରା ‘ପ୍ଲେୟାର ଅଫ୍ ଦି ସିରିଜ’ ବିବେଚିତ ହୋଇଛନ୍ତି। ସୂଚନାଯୋଗ୍ୟ କୁଶଲ ପରେରାଙ୍କ ଲଢୁଆ ତଥା ଅପରାଜିତ ଶତକ ବଳରେ ଶ୍ରୀଲଙ୍କା ଡର୍ବାନରେ ଖେଳାଯାଇଥିବା ସିରିଜର ପ୍ରଥମ ଟେଷ୍ଟରେ ଦକ୍ଷିଣ ଆଫ୍ରିକାକୁ ୧ ୱିକେଟରେ ପରାସ୍ତ କରିଥିଲା। ସଂକ୍ଷିପ୍ତ ସ୍କୋର: ଦକ୍ଷିଣ ଆଫ୍ରିକା-୨୨୨ ଓ ୧୨୮, ଶ୍ରୀଲଙ୍କା-୧୫୪ ଓ ୨/୧୯୭।
