ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ବିଜେପି ଏନ୍ଡିଏ ଗଠନ କରି ମିତ୍ର ସହଯୋଗୀଙ୍କ ସମର୍ଥନରେ ସରକାର ୪ବର୍ଷ ପୂର୍ଣ୍ଣ ହୋଇଛି। ଆଗାମୀ ନିର୍ବାଚନ ପାଇଁ ମଧ୍ୟ ବିଜେପି ସମେତ ଅନ୍ୟାନ୍ୟ ରାଜନୈତିକ ଦଳ ସେମାନଙ୍କ ରଣନୀତି ପ୍ରସ୍ତୁତ କରିବାକୁ ଆରମ୍ଭ କରିଛନ୍ତି। ତେବେ ଏନ୍ଡିଏ ସରକାର ତା’ର ଚୂଡ଼ାନ୍ତ ଅଧ୍ୟାୟ ଅତିକ୍ରମ କରିବା ପୂର୍ବରୁ ଟିଡିପି ପରି ସହଯୋଗୀ ଦଳର ସମର୍ଥନ ହରାଇଛି। ଆନ୍ଧ୍ରପ୍ରଦେଶକୁ ସ୍ୱତନ୍ତ୍ର ରାଜ୍ୟର ମାନ୍ୟତା ନ ଦିଆଯିବାରୁ ଟିଡିପି ନେତା ଚନ୍ଦ୍ରବାବୁ ନାଇଡ଼ୁ ଏଭଳି ପଦକ୍ଷେପ ନେଇଥିବା ଗଣମାଧ୍ୟମରେ ସୂଚନା ଦେଇଛନ୍ତି। ଶୁକ୍ରବାର ଟିଡିପି ନେତା ଚନ୍ଦ୍ରବାବୁ ନାଇଡ଼ୁ ଏନ୍ଡିଏକୁ ଦେଇଥିବା ସମର୍ଥନ ଫେରାଇ ନେବା ସହ ସଂସଦରେ ମୋଦି ସରକାରଙ୍କ ବିରୋଧରେ ଅବିଶ୍ୱାସ ପ୍ରସ୍ତାବ ଆଣିବାକୁ ସୋମବାର ଉଦ୍ୟମ କରିବାକୁ ସ୍ଥିର କରିଛି ଟିଡିପି।
ଏଆଇଏମ୍ଆଇଏମ୍ ଦଳର ନେତା ଅସଦୁଦ୍ଦିନ୍ ଓବେସୀ ସର୍ବପ୍ରଥମେ ସଂସଦ ମଧ୍ୟରେ ଅବିଶ୍ୱାସ ପ୍ରସ୍ତାବକୁ ସମର୍ଥନର ଘୋଷଣା କରିଥିଲା। ଓବେସୀଙ୍କ ସ୍ୱରରେ ସ୍ୱର ମିଳେଇବ ବୋଲି ଟିଏମସି ମଧ୍ୟ ଘୋଷଣା କରିଛି। ଏମାନଙ୍କ ବ୍ୟତୀତ କଂଗ୍ରେସ ମଧ୍ୟ ଅବିଶ୍ୱାସ ପ୍ରସ୍ତାବକୁ ସମର୍ଥନ କରିବ ବୋଲି ଘୋଷଣା କରିଛି।
