ମୁମ୍ବଇ : ଆନନ୍ଦ ଏଲ.ରାଏ ନିର୍ଦେଶିତ ‘ତନୁ ୱେଡସ୍ ମନୁ’ ୨୦୧୧୧ରେ ଓ ଏହାର ଦ୍ବିତୀୟ ଭାଗ ୨୦୧୫ରେ ମୁକ୍ତିଲାଭ କରିଥିଲା। ଦୁଇଟି ଭାଗରେ ଆର୍.ମାଧବନ୍ ଓ କଙ୍ଗନା ରଣାୱତ୍ ଅଭିନିତ ଚଳଚ୍ଚିତ୍ର ଦୁଇଟି ସୁପରହିଟ୍ ହୋଇଥିଲା। ଆନନ୍ଦ ଏହାର ତୃତୀୟ ଭାଗ ନିର୍ମାଣର ଯୋଜନା କରିସାରିଲେଣି। ଏଥରକ ମାଧବନ୍-କଙ୍ଗନାଙ୍କ ପରିବର୍ତ୍ତେ ମୁଖ୍ୟ ଭୂମିକାରେ ଅଭିଷେକ ବଚ୍ଚନ ଓ ତାପସୀ ପନ୍ନୁ ଦେଖାଦେବେ ବୋଲି ଶୁଣାଯାଉଛି। ନିକଟରେ ଅନୁରାଗ କଶ୍ୟପ ନିର୍ଦେଶିତ ‘ମନମର୍ଜିୟାଁ’ରେ ଅଭିଷେକ, ତାପସୀ ଓ ବିକି କୌଶଲଙ୍କ ଅଭିନୟକୁ ବିଭିନ୍ନ ମହଲରେ ପ୍ରଶଂସା କରାଯାଇଛି। ଦୋଦୁଲ୍ୟମାନ ସ୍ଥିତିରେ ଥିବା ଜୁନିୟର୍ ବଚ୍ଚନଙ୍କ କ୍ୟାରିୟର ଏବେ କୂଳରେ ଲାଗିଛି ବୋଲି ସମୀକ୍ଷକଙ୍କ ମତ। ଏହାରଶ୍ରେୟ ଅଭିଷେକ ନିର୍ଦେଶକ ଅନୁରାଗଙ୍କୁ ଦେଇଛନ୍ତି। ‘ମନମର୍ଜିୟାଁ’ର ପ୍ରଯୋଜନା ଦାୟିତ୍ବରେ ଆନନ୍ଦ ଥିଲାବେଳେ ଅଭିଷେକ-ତାପସୀଙ୍କ ଯୋଡ଼ି ତାଙ୍କୁ ଖୁବ୍ ପସନ୍ଦ ଆସିଥିଲା। ଏଣୁ ‘ତନୁ ୱେଡସ୍ ମନୁ-୩’ରେ ସେ ଏଇ ଦୁହିଁଙ୍କୁ ସୁଯୋଗ ଦେବେ ସ୍ଥିର କରିଛନ୍ତି। ଅନ୍ୟପାଖେ ଏଇ ଚଳଚ୍ଚିତ୍ରର ପ୍ରଥମ ଦୁଇଟି ଭାଗ ସୁପରହିଟ୍ ହୋଇଥିବାବେଳେ ତୃତୀୟ ଭାଗ ମଧ୍ୟ ଦର୍ଶକ ମହଲରେ ପସନ୍ଦ ହେବ ବୋଲି ସମୀକ୍ଷକମାନେ ମତପୋଷଣ କରିଛନ୍ତି।
