ଭଗବାନ ଶିବ ଆଦିଅନ୍ତ ଅଟନ୍ତି। ସେ ବ୍ରହ୍ମାଣ୍ଡର ସମସ୍ତ କୋଣରେ ବାସ କରିଥାନ୍ତି। ଭଗବାନ ଶିବଙ୍କୁ ଭୋଳାବାବା କୁହାଯାଇଥାଏ। କାରଣ ସେ ଶୀଘ୍ର ନିଜ ଭକ୍ତମାନଙ୍କ ଉପରେ ପ୍ରସନ୍ନ ହୋଇ ସମସ୍ତ ମନୋକାମନା ପୂର୍ଣ୍ଣ କରିଥାନ୍ତି। ଭଗବାନ ଶିବଙ୍କୁ ପ୍ରସନ୍ନ କରିବା ଅତି ସହଜ। କିନ୍ତୁ ତାଙ୍କୁ ପୂଜା କରିବା ବେଳେ କେବେ ବି ଭୁଲରେ ଶଙ୍ଖ ବଜାନ୍ତୁ ନାହିଁ। ଏପରି କରିବା ଦ୍ବାରା ସେ କ୍ରୋଧିତ ହୋଇ ଯାଆନ୍ତି।
ଶିବ ପୁରାଣରେ ଭଗବାନ ଶିବଙ୍କ ପୂଜାରେ ଶଙ୍ଖର ବ୍ୟବହାର କରିବାକୁ ବାରଣ କରାଯାଇଛି। ଏହାର କାରଣ ପୁରାଣ ଯୁଗରେ ଶଙ୍ଖଚୁଡ ନାମରେ ଜଣେ ଦୈତ୍ୟ ଥିଲେ। ଶଙ୍ଖଚୁଡ ଦୈତରାଜ ଦମ୍ଭଙ୍କ ପୁତ୍ର ଥିଲେ। ଦମ୍ଭ ବିଷ୍ଣୁଙ୍କୁ କଠୋର ତପସ୍ୟା କରି ତିନି ଲୋକ ପାଇଁ ମହାପରାକ୍ରମୀ ପୁତ୍ର ପ୍ରାପ୍ତି ପାଇଁ ବର ପ୍ରାର୍ଥନା କରିଥିଲେ। ଏହାସହ ଶଙ୍ଖଚୁଡ ବ୍ରହ୍ମାଙ୍କ ତପସ୍ୟା କରି ଅଭୟ ବର ପ୍ରାପ୍ତି କରିଥିଲେ। କିଛି ଦିନ ପରେ ଶଙ୍ଖଚୁଡ ତିନି ଲୋକରେ ନିଜର ଆଧିପତ୍ୟ ବିସ୍ତାର କରିଥିଲେ। ଶଙ୍ଖଚୁଡର ଅତ୍ୟାଚାରରେ ମନୁଷ୍ୟଙ୍କ ଠାରୁ ଆରମ୍ଭ କରି ଦେବତାଗଣ ମଧ୍ୟ ଅତିଷ୍ଠ ହୋଇ ଯାଇଥିଲେ।
ଦେବତାମାନେ ଏଥିରୁ ରକ୍ଷା ପାଇବା ପାଇଁ ଭଗବାନ ଶିବଙ୍କର ସାହାଯ୍ୟ ନେଇଥିଲେ। କିନ୍ତୁ ଶଙ୍ଖଚୁଡଙ୍କୁ ଶ୍ରୀକୃଷ୍ଣଙ୍କ କବଚ ଓ ତୁଳସୀଙ୍କ ପତିବ୍ରତା ଧର୍ମ ପ୍ରାପ୍ତି ପାଇଁ ଶିବ ତାଙ୍କୁ ବଧ କରି ପାରି ନଥିଲେ। ତେଣୁ ଭଗବାନ ବିଷ୍ଣୁ ବ୍ରାହ୍ମଣ ରୂପରେ ଶ୍ରୀକୃଷ୍ଣଙ୍କ କବଚ ଶଙ୍ଖଚୁଡ ଠାରୁ ଦାନ ରୂପେ ନେଇଥିଲେ। ଏହାସହ ସେ ଶଙ୍ଖଚୁଡଙ୍କ ରୂପ ଧାରଣ କରି ତୁଳସୀ ଶୀଳା ହରଣ କରିଥିଲେ। ଏହି ସୁଯୋଗରେ ଭଗବାନ ଶିବ ଶଙ୍ଖଚୁଡଙ୍କୁ ନିଜ ତ୍ରିଶୁଳରେ ଭସ୍ମ କରିଥିଲେ। କୁହାଯାଇଛି ଯେ, ଶଙ୍ଖଚୁଡର ହାଡରୁ ଶଙ୍ଖ ଜାତ ହୋଇଛି। ତେଣୁ ଭଗବାନ ଶିବଙ୍କ ପୂଜାରେ ଶଙ୍ଖ ବଜାଇବା ଅନୁଚିତ।