ନୂଆଦିଲ୍ଲୀ : ଅନନ୍ତ ଅମ୍ବାନୀ ଏବଂ ରାଧିକା ମର୍ଚାଣ୍ଟଙ୍କ ପ୍ରାକ୍-ବିବାହ ଉତ୍ସବ ସାରା ଦୁନିଆ ଦେଖିଲା । ମୁକେଶ ଅମ୍ବାନୀ ଏବଂ ନୀତା ଅମ୍ବାନୀ ଗୁଜରାତର ଜାମନଗରରେ ଅନେକ ବଡ ବଡ ହସ୍ତୀଙ୍କ ମଧ୍ୟରେ ନିଜ ପୁଅ ଅନନ୍ତଙ୍କ ପ୍ରାକ୍-ବିବାହ ଉତ୍ସବ ସମାପନ କଲେ । ଦେଶର ସବୁଠାରୁ ଧନୀ ବ୍ୟକ୍ତି ମୁକେଶ ଅମ୍ବାନୀ ଏହି ଆୟୋଜନରେ ପ୍ରାୟ ୧୨୫୯ କୋଟି ଟଙ୍କା ଖର୍ଚ୍ଚ କରିଦେଲେ । ଏବେ ଚର୍ଚ୍ଚା ହେଉଛି କି ଅମ୍ବାନୀ ଫ୍ୟାମିଲି ପାଖରେ ସମୁଦାୟ କେତେ ଟଙ୍କା ଅଛି ଏବଂ ରିଲାଏନ୍ସ ଇଣ୍ଡଷ୍ଟ୍ରିଜରେ କାହାର କେତେ ଭାଗିଦାରୀ ରହିଛି ।
ଆପଣ ଚିନ୍ତା କରୁଥିବେ କି ରିଲାଏନ୍ସର ସବୁଠାରୁ ଅଧିକ ଅଂଶଧନ ମୁକେଶ ଅମ୍ବାନୀ କିମ୍ବା ନୀତା ଅମ୍ବାନୀଙ୍କ ପାଖରେ ଥିବ । କିମ୍ବା ଇଶା ଅମ୍ବାନୀ, ଆକାଶ ଅମ୍ବାନୀ ବା ଅନନ୍ତ ଅମ୍ବାନୀଙ୍କ ପାଖରେ ଥାଇପାରେ । ମୁକେଶ ଅମ୍ବାନୀଙ୍କ ସମୁଦାୟ ସମ୍ପତ୍ତି ୧୧୭ ବିଲିୟନ୍ ଡଲାର(୯୭,୬୬,୮୯,୮୧,୩୦,୦୦୦)ଟଙ୍କା । କିନ୍ତୁ ରିଲାଏନ୍ସରେ ସବୁଠାରୁ ବଡ ଭାଗିଦାରୀ ଅମ୍ବାନୀ ପରିବାରର ସବୁଠାରୁ ବରିଷ୍ଠ ସଦସ୍ୟ କୋକିଲାବେନ୍ ଅମ୍ବାନୀଙ୍କର । ରିଲାଏନ୍ସ ପ୍ରମୋଟର ଗ୍ରୁପରେ ଅମ୍ବାନୀ ପରିବାରର ସେୟାର ରହିଛି ଏବଂ ତାଙ୍କ ପାଖରେ କମ୍ପାନୀର ସମୁଦାୟ ୫୦.୩୯ ପ୍ରତିଶତ ଅଂଶଧନ ରହିଛି ।
ଯଦିଓ ବାକି ଅନ୍ୟ ଅଂଶଧନ ୪୯.୬୧ ପ୍ରତିଶତ ସେୟାର ପବ୍ଲିକ୍ ସେୟାରହୋଲ୍ଡର୍ସଙ୍କ ପାଖରେ ରହିଛି । କୋକିଲାବେନ୍ ଅମ୍ବାନୀ ଯଦିଓ ବ୍ୟବସାୟରେ ଏତେ ସକ୍ରିୟ ନାହାଁନ୍ତି କିନ୍ତୁ ତାଙ୍କ ପାଖରେ ସମୁଦାୟ ୧,୫୭,୪୧,୩୨୨ ସେୟାର୍ ରହିଛି ଏବଂ କମ୍ପାନୀରେ ତାଙ୍କ ଭାଗିଦାରୀ ୦.୨୪ ପ୍ରତିଶତ ରହିଛି । ସେହିଭଳି ମୁକେଶ ଓ ପରିବାରର ଅନ୍ୟମାନଙ୍କର ସେୟାର ୯୦,୫୨,୦୨୧ ଏବଂ ଏହା କମ୍ପାନୀର ୦.୧୨ ପ୍ରତିଶତ ।
