ସମ୍ବଲପୁର : ଆଗାମୀ ୨୬ ରୁ ୩୦ ତାରିଖ ପର୍ଯ୍ୟନ୍ତ ଥାଇଲାଣ୍ଡ ଦେଶର ପଟ୍ଟାୟା ଠାରେ ଆର୍ନ୍ତଜାତୀୟ ସଫ୍ଟ ଟେନିସ ଚାମ୍ପିୟନସିପ ୨୦୨୩ ଆୟୋଜିତ ହେବାକୁ ଯାଉଛି। ଏଥିରେ ସମ୍ବଲପୁରର ଅଂଶୁମାନ ବାବୁ ଓଡ଼ିଶାରୁ ଅଣ୍ଡର – ୧୮ ବର୍ଗରେ ଚୟନ ହୋଇ ଦେଶକୁ ଆର୍ନ୍ତଜାତୀୟସ୍ତରରେ ପ୍ରତିନିଧିତ୍ୱ କରିବେ। କିନ୍ତୁ ଏହି ପ୍ରତିଯୋଗିତାରେ ଅଂଶଗ୍ରହଣ କରିବା ପାଇଁ ଲକ୍ଷାଧିକ ଟଙ୍କାର ଆବଶ୍ୟକତା ରହିଥିବାରୁ ସେ ଜିଲା ପ୍ରଶାସନ ନିକଟରେ ଦ୍ୱାରସ୍ଥ ହୋଇ ସାହାଯ୍ୟ ପାଇଁ ଅନୁରୋଧ କରିଛନ୍ତି। ଶୁକ୍ରବାର ଯୁବ ଖେଳାଳି ଅଂଶୁମାନ ଓ ତାଙ୍କର ପିତା ସଞ୍ଜୀବ ବାବୁଙ୍କ ସହିତ ଜିଲାପାଳଙ୍କୁ ସାକ୍ଷାତକାର କରି ପ୍ରତିଯୋଗିତାରେ ସାମିଲ ହେବା ପାଇଁ ସାହାଯ୍ୟ କରିବା ପାଇଁ ଅନୁରୋଧ କରିଛନ୍ତି। ସମ୍ବଲପୁରର ଠେମରା ଗ୍ରାମର ମୂଳ ନିବାସୀ ତଥା ଚାରଭାଟିରେ ରହୁଥିବା ସଞ୍ଜୀବ ବାବୁ ଓ ଗାୟତ୍ରୀ ବାବୁଙ୍କ ଦ୍ୱିତୀୟ ପୁତ୍ର ଅଂଶୁମାନ ବାବୁ ଦେଶକୁ ଅଣ୍ଡର – ୧୮ ବର୍ଗରେ ପ୍ରତିନିଧିତ୍ୱ କରି ଏହି ଆର୍ନ୍ତଜାତୀୟ ପ୍ରତିଯୋଗିତାରେ ଖେଳିବେ। ସମ୍ବଲପୁର ଟେନିସ ଏସୋସିଏସନ ତରଫରୁ ବିଭିନ୍ନ ପ୍ରତିଯୋଗିତା ଖେଳିବା ସହିତ ଅଂଶୁମାନ ରାଜ୍ୟ ଓ ଜାତୀୟସ୍ତରରେ ମଧ୍ୟ ଅନେକ ପ୍ରତିଯୋଗିତାରେ ଅଂଶଗ୍ରହଣ କରି ସଫଳତା ହାସଲ କରିଛନ୍ତି। ଆମେଚର ସଫ୍ଟ ଟେନିସ ଫେଡେରେସନ ଅଫ ଇଣ୍ଡିଆ ତରଫରୁ ଓଡ଼ିଶା ସଫ୍ଟ ଟେନିସ ଏସୋସିଏସନକୁ ଦିଆଯାଇଥିବା ପତ୍ର ଅନୁଯାୟୀ, ବିଗତ ଦିନରେ ପ୍ରଦର୍ଶିତ ଉତ୍ତମ ଖେଳ ପାଇଁ ଓଡ଼ିଶାରୁ ଅଂଶୁମାନ ବାବୁଙ୍କୁ ଏହି ଆର୍ନ୍ତଜାତୀୟ ପ୍ରତିଯୋଗିତାରେ ଭାଗ ନେବାକୁ ଚୟନ କରାଯାଇଛି। ତେବେ ତାଙ୍କ ପାଇଁ ଏବେ ଅର୍ଥ ଯୋଗାଡ କରିବା କଷ୍ଟକର ହୋଇ ପଡ଼ିଥିବାରୁ ପ୍ରତିଯୋଗିତାରେ ଅଂଶଗ୍ରହଣ କରିବାକୁ ନେଇ ଅନିଶ୍ଚିତତା ଦେଖାଦେଇଛି। ଅପରପକ୍ଷରେ ସମ୍ବଲପୁର ତଥା ରାଜ୍ୟ ପାଇଁ ଗୌରବ ଆଣି ଦେଇଥିବା ଅଂଶୁମାନଙ୍କୁ ଏହି ସଫଳତା ପାଇଁ ସବୁ ମହଲରୁ ଶୁଭେଚ୍ଛା ଓ ଅଭିନନ୍ଦନ ଦିଆଯାଉଛି।
Popular Categories
Previous article
Next article