ନୂଆଦିଲ୍ଲୀ : ପଞ୍ଜାବ ନ୍ୟାସନାଲ୍ ବ୍ୟାଙ୍କ୍ରେ ହୋଇଥିବା ଅର୍ଥ ହେରଫେର ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ ୧୨୦ଟି କମ୍ପାନୀରେ ହୀରା ବ୍ୟବସାୟୀ ନିରବ ମୋଦିଙ୍କ ଦ୍ୱାରା ହୋଇଥିବା କାରବାରର ତଦନ୍ତ କରୁଛି । ଅର୍ଥ ରାଷ୍ଟ୍ରମନ୍ତ୍ରୀ ଶିବପ୍ରତାପ ଶୁକ୍ଳା ଶୁକ୍ରବାର ଲୋକସଭାରେ ଏକ ଲିଖିତ ଉତ୍ତରରେ କହିଛନ୍ତି ଯେ,ଏହି ମାମଲାର ତଦନ୍ତ ଚାଲୁ ରହିଛି ଏବଂ ସମ୍ପୃକ୍ତ ୧୨୦ଟି କମ୍ପାନୀର ନାମ ପ୍ରକାଶ କଲେ ତାହା ତଦନ୍ତ ପ୍ରକ୍ରିୟାରେ ବାଧା ସୃଷ୍ଟି କରିବ । ନିରବ ମୋଦି ଏବଂ ତାଙ୍କର ସହଯୋଗୀଙ୍କ ଦ୍ୱାରା ଲେଟର୍ ଅଫ୍ ଅଣ୍ଡର ଟେକିଙ୍ଗ୍ର ଅସତ ଉପାୟରେ ବ୍ୟବହାର ବ୍ୟବହାର ଦ୍ୱାରା ଏଭଳି ଠକେଇ ଘଟିଥିବା ସେ କହିଛନ୍ତି । ଅନ୍ୟ ଏକ ପ୍ରଶ୍ନ ଉତ୍ତରରେ ଶ୍ରୀ ଶୁକ୍ଳା କହିଛନ୍ତି ଅର୍ଥ ଠକେଇ ନିରୋଧ ଆଇନ୍ ଅଧୀନରେ ନିରବ ମୋଦି ଏବଂ ମେହୁଲ ଚୋସ୍କିଙ୍କ ବିରୋଧରେ ଦୁଇଟି ମାମଲା ଦାୟର କରାଯାଇଛି ଏବଂ ଗତ ଫେବୃୟାରୀ ଶେଷ ସୁଦ୍ଧା ୭ହଜାର ୬୩୮କୋଟି ଟଙ୍କାର ସମ୍ପତ୍ତି ଜବତ କରାଯାଇଛି ।
