ମିଆମି : ୨୦୧୭ ୟୁଏସ୍ ଓପନ୍ ଚମ୍ପିଆନ୍ ଆମେରିକାର ସ୍ଲୋଆନ୍ ଷ୍ଟିଫେନ୍ସ ସମ୍ମାନଜନକ ମିଆମି ଓପନ୍ ଟେନିସ ଟୁର୍ଣ୍ଣାମେଣ୍ଟରେ ମହିଳା ସିଙ୍ଗଲ୍ସ ଚମ୍ପିଆନ୍ ଆଖ୍ୟା ଅର୍ଜନ କରିଛନ୍ତି। ଶନିବାର ଖେଳା ଯାଇଥିବା ଫାଇନାଲ ମ୍ୟାଚ୍ରେ ବିଶ୍ୱର ୧୨ନଂ ଷ୍ଟିଫେନ୍ସ ୨୦୧୭ ଫ୍ରେଞ୍ଚ୍ ଓପନ୍ ଚମ୍ପିଆନ୍ ଲାଟ୍ଭିଆର ୟେଲିନା ଓଷ୍ଟାପେଙ୍କୋଙ୍କୁ ୭-୬, ୬-୧ ସେଟ୍ରେ ପରାସ୍ତ କରିଛନ୍ତି। ଏହି ବିଜୟ ସହ ୨୫ ବର୍ଷ ବୟସ୍କା ଷ୍ଟିଫେନ୍ସ ତାଙ୍କ ଜୀବନରେ ଖେଳିଥିବା ୬ଟିଯାକ ଫାଇନାଲକୁ ଜିତିବାରେ ସଫଳ ହୋଇଛନ୍ତି। ଓଷ୍ଟାପେଙ୍କୋ ପ୍ରଥମ ସେଟ୍ରେ ଲଢ଼ୁଆ ପ୍ରଦର୍ଶନ କରିଥିଲେ ହେଁ ୨ୟ ସେଟ୍ରେ ଷ୍ଟିଫେନ୍ସଙ୍କ ଚମତ୍କାର ପ୍ରଦର୍ଶନ ଆଗରେ ସମ୍ପୂର୍ଣ୍ଣ ହାର ମାନିଥିଲେ। ପ୍ରଥମ ସେଟ୍ରେ ଉଭୟ ଖେଳାଳିଙ୍କର ୪ଟି ଲେଖାଏଁ ସର୍ଭିସ ବ୍ରେକ୍ ହୋଇଥିଲା। ତେବେ ଷ୍ଟିଫେନ୍ସ ଏହାକୁ ଟାଇବ୍ରେକରରେ ଜିତି ନେଇଥିଲେ। ଏହି ବିଜୟ ଫଳରେ ସ୍ଲୋଆନ୍ ଷ୍ଟିଫେନ୍ଙ୍କ ବିଶ୍ୱମାନ୍ୟତାରେ ଉନ୍ନତି ଘଟିବା ନିଶ୍ଚିତ। ଆସନ୍ତା ସପ୍ତାହରେ ପ୍ରକାଶିତ ହେବାକୁ ଥିବା ଡବ୍ଲୁଟିଏ ମାନ୍ୟତାରେ ଷ୍ଟିଫେନ୍ସ ୯ମ ସ୍ଥାନରେ ରହିବେ।
