ଗ୍ରାମୀଣ ଭାରତ ମହୋତ୍ସବ୨୦୨୫ ଉଦଘାଟନ କଲେ ପ୍ରଧାନମନ୍ତ୍ରୀ

ଡେସ୍କ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର ନୂଆଦିଲ୍ଲୀର ଭାରତ ମଣ୍ଡପମଠାରେ ଗ୍ରାମୀଣ ଭାରତ ମହୋତ୍ସବ ୨୦୨୫କୁ ଉଦଘାଟନ କରିଛନ୍ତି। ଏହି ମହୋତ୍ସବର ବିଷୟବସ୍ତୁ ହେଉଛି, ବିକଶିତ ଭାରତ ୨୦୨୪ ପାଇଁ ଏକ ସୁଦୃଢ ଗ୍ରାମୀଣ ଭାରତ ଗଠନ। ଏହି ଅବସରରେ ସମାବେଶକୁ ସମ୍ବୋଧିତ କରି ପ୍ରଧାନମନ୍ତ୍ରୀ ଉପସ୍ଥିତ ସମସ୍ତ ଲୋକଙ୍କୁ ୨୦୨୫ର ଶୁଭେଚ୍ଛା ଜଣାଇଥିଲେ। ବର୍ଷ ପ୍ରାରମ୍ଭରେ ଗ୍ରାମୀଣ ଭାରତ ମହୋତ୍ସବର ଭବ୍ୟ ଆୟୋଜନ ଭାରତର ବିକାଶ ଯାତ୍ରାର ଝଲକ ଦେଉଛି ଏବଂ ଏହାର ଏକ ପରିଚୟ ସୃଷ୍ଟି କରୁଛି ବୋଲି ସେ କହିଥିଲେ। କାର୍ଯ୍ୟକ୍ରମ ଆୟୋଜନ ପାଇଁ ସେ ନାବାର୍ଡ ଓ ଅନ୍ୟ ସହଯୋଗୀଙ୍କୁ ଅଭିନନ୍ଦନ ଜଣାଇଥିଲେ।

ପ୍ରଧାନମନ୍ତ୍ରୀ କହିଥିଲେ ଯେ ଆମ ମଧ୍ୟରୁ ଯେଉଁମାନେ ଗାଁରେ ଜନ୍ମ ଗ୍ରହଣ କରିଛନ୍ତି ଏବଂ ବଡ଼ ହୋଇଛନ୍ତି ସେମାନେ ଗାଁର ସାମର୍ଥ୍ୟ ଜାଣିଛନ୍ତି। ଗାଁରେ ରହୁଥିବା ଲୋକଙ୍କ ମଧ୍ୟରେ ମଧ୍ୟ ଗାଁର ଆତ୍ମା ବାସ କରେ। ସେ ଆହୁରି ମଧ୍ୟ କହିଥିଲେ ଯେ ଯେଉଁମାନେ ଗାଁରେ ରହିଥିଲେ ସେମାନେ ମଧ୍ୟ ଜାଣନ୍ତି କିପରି ଏକ ଗାଁର ପ୍ରକୃତ ଜୀବନଯାପନ କରିବାକୁ ହେବ। ଶ୍ରୀ ମୋଦୀ କହିଥିଲେ ଯେ ଏକ ସରଳ ପରିବେଶ ଥିବା ଏକ ଛୋଟ ସହରରେ ତାଙ୍କର ପିଲାଦିନ ବିତାଇଥିବାରୁ ସେ ଭାଗ୍ୟବାନ । ସେ ଆହୁରି ମଧ୍ୟ କହିଥିଲେ ଯେ ପରେ ଯେତେବେଳେ ସେ ସହର ଛାଡିଥିଲେ ସେତେବେଳେ ସେ ଗ୍ରାମାଞ୍ଚଳରେ ସମୟ ବିତାଇଥିଲେ।

ଆଜି ୧.୫ ଲକ୍ଷରୁ ଅଧିକ ଆୟୁଷ୍ମାନ ଆରୋଗ୍ୟ ମନ୍ଦିରରେ ଲୋକଙ୍କୁ ସ୍ୱାସ୍ଥ୍ୟ ସୁବିଧା ଯୋଗାଇ ଦିଆଯାଉଛି ବୋଲି ପ୍ରଧାନମନ୍ତ୍ରୀ କହିଥିଲେ। ଡିଜିଟାଲ ଟେକ୍ନୋଲୋଜି ସହାୟତାରେ ଟେଲିମେଡିସିନ୍ ଗାଁକୁ ଶ୍ରେଷ୍ଠ ଡାକ୍ତର ଓ ହସ୍ପିଟାଲର ବିକଳ୍ପ ସୁନିଶ୍ଚିତ କରିଛି ବୋଲି ସେ କହିଥିଲେ। ଇ-ସଞ୍ଜୀବିନୀ ମାଧ୍ୟମରେ ଗ୍ରାମାଞ୍ଚଳର କୋଟି କୋଟି ଲୋକ ଟେଲିମେଡିସିନ ଦ୍ୱାରା ଉପକୃତ ହୋଇଛନ୍ତି। ଶ୍ରୀ ମୋଦୀ କହିଥିଲେ ଯେ କୋଭିଡ୍-୧୯ ମହାମାରୀ ସମୟରେ ଭାରତର ଗାଁଗୁଡ଼ିକ କିପରି ଏହାର ମୁକାବିଲା କରିବେ ତାହାକୁ ନେଇ ସାରା ବିଶ୍ୱ ଆଶ୍ଚର୍ଯ୍ୟ ହୋଇଥିଲା। କିନ୍ତୁ ସରକାର ସୁନିଶ୍ଚିତ କରିଥିଲେ ଯେପରି ଟୀକା ପ୍ରତ୍ୟେକ ଗାଁର ଶେଷ ଲୋକଙ୍କ ପାଖରେ ପହଞ୍ଚିବ।

ଗ୍ରାମୀଣ ଅର୍ଥନୀତିକୁ ସୁଦୃଢ଼ କରିବା ପାଇଁ ଗ୍ରାମୀଣ ସମାଜର ପ୍ରତ୍ୟେକ ବର୍ଗକୁ ବିଚାର କରି ଅର୍ଥନୈତିକ ନୀତି ପ୍ରସ୍ତୁତ କରିବାର ଗୁରୁତ୍ୱ ଉପରେ ପ୍ରଧାନମନ୍ତ୍ରୀ ଆଲୋକପାତ କରିଥିଲେ। ଗତ ୧୦ ବର୍ଷ ମଧ୍ୟରେ ଗାଁର ପ୍ରତ୍ୟେକ ବର୍ଗ ପାଇଁ ସରକାର ସ୍ବତନ୍ତ୍ର ନୀତି ପ୍ରଣୟନ କରିବା ସହ ନିଷ୍ପତ୍ତି ନେଇଥିବାରୁ ସେ ସନ୍ତୋଷ ବ୍ୟକ୍ତ କରିଥିଲେ। ଗାଁ ଭିତରେ ଗ୍ରାମବାସୀଙ୍କୁ ଅଧିକରୁ ଅଧିକ ଆର୍ଥିକ ସହାୟତା ପ୍ରଦାନ କରିବା ଉପରେ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ ଯଦ୍ୱାରା ସେମାନେ ଚାଷ କାର୍ଯ୍ୟରେ ନିୟୋଜିତ ହୋଇପାରିବେ ଏବଂ ନୂତନ ନିଯୁକ୍ତି ଓ ଆତ୍ମନିଯୁକ୍ତି ସୁଯୋଗ ସୃଷ୍ଟି କରିପାରିବେ। ପିଏମ କିଷାନ ସମ୍ମାନ ନିଧି ମାଧ୍ୟମରେ କୃଷକମାନଙ୍କୁ ପାଖାପାଖି ୩ ଲକ୍ଷ କୋଟି ଟଙ୍କାର ଆର୍ଥିକ ସହାୟତା ମିଳିଛି ବୋଲି ସେ ଉଲ୍ଲେଖ କରିଥିଲେ। ବିଗତ ୧୦ ବର୍ଷ ମଧ୍ୟରେ କୃଷି ଋଣ ପରିମାଣ ୩.୫ ଗୁଣ ବୃଦ୍ଧି ପାଇଛି ବୋଲି ଉଲ୍ଲେଖ କରି ଶ୍ରୀ ମୋଦୀ କହିଥିଲେ ଯେ ବର୍ତ୍ତମାନ ପଶୁସମ୍ପଦ ଏବଂ ମତ୍ସ୍ୟ ଚାଷୀମାନଙ୍କୁ କିଷାନ କ୍ରେଡିଟ୍ କାର୍ଡ ପ୍ରଦାନ କରାଯାଉଛି। ଏହାବ୍ୟତୀତ ଦେଶର ୯ ହଜାରରୁ ଅଧିକ କୃଷକ ଉତ୍ପାଦକ ସଂଗଠନ (ଏଫପିଓ) ଆର୍ଥିକ ସହାୟତା ପାଉଛନ୍ତି। ସେ ଆହୁରି ମଧ୍ୟ ଉଲ୍ଲେଖ କରିଛନ୍ତି ଯେ ଗତ ୧୦ ବର୍ଷ ମଧ୍ୟରେ ସରକାର କ୍ରମାଗତ ଭାବରେ ଅନେକ ଫସଲ ପାଇଁ ଏମଏସପି ବୃଦ୍ଧି କରିଛନ୍ତି।