ଆଠଗଡ : ଆଠଗଡର ସର୍ବପୁରାତନ ଗୋପବନ୍ଧୁ ବିଜ୍ଞାନ ଉଚ୍ଚ ମାଧ୍ୟମିକ ବିଦ୍ୟାଳୟ (କନିଷ୍ଠ କଲେଜ) ଆନୁକୂଲ୍ୟରେ ଛାତ୍ରୀମାନଙ୍କ ପାଇଁ ଏକ ଆତ୍ମରକ୍ଷା କୌଶଳ ତାଲିମ ଶିବିର ସୋମବାର ଉଦଘାଟିତ ହୋଇଯାଇଛି । କଲେଜର ଅଧ୍ୟକ୍ଷ ଡ.ଲୋକନାଥ ସାହୁ ମୁଖ୍ୟ ଅତିଥି ଭାବେ ଯୋଗଦେଇ ଏହାକୁ ଉଦଘାଟନ କରି ଆଜିର ସମାଜରେ ବାଳିକା ଓ ମହିଳାଙ୍କ ସୁରକ୍ଷା ଏକ ପ୍ରଶ୍ନବାଚୀ ସୃଷ୍ଟି କରିଥିବାରୁ ସେମାନେ ନିଜ ସୁରକ୍ଷା ପାଇଁ ସଚେତନ ଓ ସତର୍କ ହେବା ଜରୁରୀ ବୋଲି ମତବ୍ୟକ୍ତ କରିଥିଲେ । ନିଜର ତଥା ପରିବାରର ସୁରକ୍ଷା ନିମନ୍ତେ ପ୍ରତ୍ୟେକ ଛାତ୍ରୀ ଆତ୍ମରକ୍ଷା କୌଶଳ ତାଲିମ ନେବା ଉପରେ ଅଧ୍ୟକ୍ଷ ଗୁରୁତ୍ଵାରୋପ କରିଥିଲେ । ଅଧ୍ୟାପକ ଡ.ଗୌତମବୁଦ୍ଧ ସୀତାରାମ ସମ୍ମାନିତ ଅତିଥି ଭାବେ ଯୋଗଦେଇ ଉଦବୋଧନ ଦେଇଥିଲେ ।
କନିଷ୍ଠ କଲେଜ ଆତ୍ମରକ୍ଷା କୌଶଳ ତାଲିମ କାର୍ଯ୍ୟକ୍ରମର ନୋଡାଲ ଅଧିକାରୀ ଅଧ୍ୟାପିକା ସୁସ୍ମିତା ସାହୁ କାର୍ଯ୍ୟକ୍ରମ ସଂଚାଳନ କରବା ସହ ତାଲିମ ସମ୍ପର୍କରେ ପ୍ରାରମ୍ଭିକ ସୂଚନା ପ୍ରଦାନ କରିଥିଲେ । ସେହିପରି ଡିଗ୍ରୀ କଲେଜ ନୋଡାଲ ଅଧିକାରୀ ଅଧ୍ୟାପିକା ଡ.ଗାୟତ୍ରୀ ତ୍ରିପାଠୀ ସ୍ଵାଗତ ଭାଷଣ ଦେବା ସହିତ ଛାତ୍ରୀମାନଙ୍କ ପାଇଁ ଏହି ଆତ୍ମରକ୍ଷା ତାଲିମର ଆବଶ୍ୟକତା ଓ ଉପଯୋଗିତା ସମ୍ପର୍କରେ ଆଲୋକପାତ କରିଥିଲେ । ଆତ୍ମରକ୍ଷା କୌଶଳ ପ୍ରଶିକ୍ଷିକା ନିରୁପମା ବେହେରା ଓ ସଂଗୀତା ବେହେରା ବିଭିନ୍ନ କୌଶଳ ପ୍ରଦର୍ଶନ ସହିତ ଆତ୍ମରକ୍ଷା କୌଶଳର କେତେକ ସହଜ ଉପାୟ ସମ୍ପର୍କରେ ଛାତ୍ରୀଙ୍କୁ ଶିକ୍ଷା ଦେଇଥିଲେ । କଲେଜର ୨୨୦ ଛାତ୍ରୀଙ୍କୁ ବିଭିନ୍ନ ପର୍ଯ୍ୟାୟରେ ଆଠଦିନ ଧରି ତାଲିମ ଦିଆଯିବ। ଶେଷରେ ଅଧ୍ୟାପିକା ନଳିନୀ ରାଉତ ଧନ୍ୟବାଦ ଅର୍ପଣ କରିଥିଲେ ।
Comments are closed.