ରାମନାଗୁଡା: ଚୋରି ଅଭିଯୋଗରେ ମଙ୍ଗଳବାର ୨ଜଣ ଅଭିଯୁକ୍ତଙ୍କୁ ଗିରଫ କରିଛି ରାମନାଗୁଡା ପୁଲିସ। ରାୟଗଡ଼ା ଜିଲ୍ଲା ରାମନାଗୁଡା ଥାନା ଅନ୍ତର୍ଗତ ସ୍ଥାନୀୟ ଅଞ୍ଚଳରେ ଗତ କିଛିଦିନ ଧରି ବାରମ୍ବାର ଚୋରି ହେଉଥିବା ନେଇ ଅଭିଯୋଗ ହୋଇଆସୁଥିଲା ବେଳେ ପୁଲିସ ପକ୍ଷରୁ କଡାକଡି ଭାବେ ପାଟ୍ରୋଲିଂ କରାଯାଉଥିଲେ ଚୋର ଧରିବାରେ ସଫଳ ହୋଇପାରୁନଥିଲା ରାମନାଗୁଡା ପୁଲିସ ।
ପୁଲିସ ପକ୍ଷରୁ ମିଳୁଥିବା ସୂଚନା ଅନୁଯାୟୀ, ଚାକୁଣ୍ଡାରେ ଥିବା ନିୟନ୍ତ୍ରିତ ବଜାର କମିଟିର କପା ବଜାର ପ୍ରାଙ୍ଗଣରେ ବିଭିନ୍ନ ସାମଗ୍ରୀ ଚୋରି ହୋଇଥିବା ନେଇ ସେଠାକାର କର୍ମଚାରୀ ଚିତ୍ତରଞ୍ଜନ ପ୍ରଧାନ ଥାନାରେ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତି କରି ରାମନାଗୁଡା ପୁଲିସ ସେକେଣ୍ଡ ଅଫିସର ବାବୁଲା ପ୍ରଧାନଙ୍କ ନେତୃତ୍ୱରେ ଏକ ଟିମ୍ ଗଠନ କରି ବିଭିନ୍ନ ସ୍ଥାନରେ ଚଢ଼ାଉ କରିଥିବା ବେଳେ ଏକ ନମ୍ବର ବିହୀନ ବାଇକ୍ ସହ ୨ଜଣ ଯୁବକ ସନ୍ଦେହ ଘେରକୁ ଆସିଥିଲେ। ଉକ୍ତ ୨ ଯୁବକ ଜଣକ ହେଲେ ଅମଲାବଟା ଗାଁର ପେଦାବାବୁ ମାଣ୍ଡାଙ୍ଗି(୧୯) ଓ ଭାଟିପଡାର ଚିନ୍ନା ନାଗବଂଶ। ଉଭୟଙ୍କୁ ଥାନାରେ ଅଟକ ରଖି ସେମାନେ ଧରିଥିବା ବ୍ୟାଗ ଓ ବାଇକକୁ ଜବତ କରି ଯାଞ୍ଚ କରିଛି ପୁଲିସ। ଅଭିଯୋଗକାରୀଙ୍କ ଏତଲା ଅନୁଯାୟୀ ଯେଉଁ ସବୁ ସାମଗ୍ରୀ ଚୋରି ହୋଇଥିଲା ସେହି ସବୁ ସାମଗ୍ରୀ ସେମାନଙ୍କଠାରୁ ଜବତ ହୋଇଥିବାରୁ ସେମାନଙ୍କୁ କୋର୍ଟ ଚାଲାଣ କରି ଅଧିକ ତଦନ୍ତ ଜାରି ରହିଥିବା ସହ ରାମନାଗୁଡା ଥାନାରେ କେସ ନମ୍ବର ୬୯ଅନୁଯାୟୀ ଧାରା ୪୫୪ ଓ ୩୮୦ ଆଇପିସିରେ ଗିରଫ କରାଯାଇଥିବା ରାମନାଗୁଡା ଥାନା ଅଧିକାରୀ ସୁନିତା ବେହେରା ସୂଚନା ଦେଇଛନ୍ତି। ଏହି ସମୟରେ ଏସ ଆଇ ବାବୁଲା ପ୍ରଧାନ, ଏଏସ ଆଇ ଜଗନ୍ନାଥ ବେହେରା, ପୃଥରାଜ ଝଙ୍କାର, ହୋର୍ମଗାଡ ଜୟଦେବ କରିଆଙ୍କ ସହ ଅନ୍ୟ ପୁଲିସ କର୍ମଚାରୀ ଉପସ୍ଥିତ ଥିଲେ। ଏହି ତଦନ୍ତରୁ ଅଧିକ ତଥ୍ୟ ମିଳିପାରିବ ବୋଲି ସାଧାରଣରେ ଆଶା କରାଯାଉଛି।
