ନୂଆଦିଲ୍ଲୀ: ପ୍ରତିରକ୍ଷା ସାମଗ୍ରୀଗୁଡ଼ିକର ଆମଦାନୀ ହ୍ରାସ କରିବା ଓ ଦେଶର ସଶସ୍ତ୍ର ବାହିନୀର କାର୍ଯ୍ୟଦକ୍ଷତା ବୃଦ୍ଧି କରିବା ପାଇଁ ସମସ୍ତ ପ୍ରତିରକ୍ଷା ସାମଗ୍ରୀର ଦେଶୀୟ ଜ୍ଞାନକୌଶଳରେ ଉତ୍ପାଦନ ଲାଗି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଗୁରୁତ୍ୱାରୋପ କରିଛନ୍ତି। ପ୍ରତିରକ୍ଷା ସାମଗ୍ରୀ ଉତ୍ପାଦନରେ ଅତ୍ୟାଧୁନିକ ଜ୍ଞାନକୌଶଳର ସମ୍ପୂର୍ଣ୍ଣ ବ୍ୟବହାର କରିବା ପ୍ରତି ମଧ୍ୟ ସେ ଗୁରୁତ୍ୱ ଆରୋପ କରିଛନ୍ତି। ମଙ୍ଗଳବାର ନୂଆଦିଲ୍ଲୀରେ ଭାରତୀୟ ବିମାନ ବାହିନୀର ଆଧୁନିକୀକରଣ ଓ ଦେଶୀୟକରଣ ଯୋଜନା ସଂକ୍ରାନ୍ତ ଏକ ଆଲୋଚନାଚକ୍ରରେ ଉଦବୋଧନ ଦେଇ ରାଜନାଥ ଏହା କହିଛନ୍ତି।
ଭାରତର ପ୍ରତିରକ୍ଷା ଉତ୍ପାଦନରେ ପୁଞ୍ଜିନିବେଶ କରିବାକୁ ସେ ବିଦେଶୀ କମ୍ପାନୀମାନଙ୍କୁ ଆମନ୍ତ୍ରଣ କରିଛନ୍ତି। ସେ କହିଛନ୍ତି ଏହି କ୍ଷେତ୍ରରେ ମେକ୍ ଇନ୍ ଇଣ୍ଡିଆ କାର୍ଯ୍ୟକ୍ରମ ଜରିଆରେ ବେସରକାରୀ କ୍ଷେତ୍ରକୁ ଜଡିତ କରିବାକୁ ଉଦ୍ୟମ କରାଯାଉଛି। ଭାରତୀୟ ବିମାନ ବାହିନୀ ବୈଷୟିକ ଜ୍ଞାନଦୃଷ୍ଟିରୁ ଏକ ଉନ୍ନତବାହିନୀ ଓ ଅତ୍ୟନ୍ତ ଦକ୍ଷ ପ୍ରତିରକ୍ଷା ବାହିନୀ ବୋଲି ସେ ବର୍ଣ୍ଣନା କରିଛନ୍ତି। ସେ କହିଛନ୍ତି ଭାରତର ପଡୋଶୀ ଦେଶରେ ଥିବା ଆତଙ୍କବାଦୀ ଆଡ୍ଡାସ୍ଥଳୀଗୁଡ଼ିକ ଉପରେ ସମ୍ପ୍ରତି ହୋଇଥିବା ଆକ୍ରମଣରୁ ବିମାନ ବାହିନୀର ଦକ୍ଷତା ଓ ପରାକାଷ୍ଠାର ପ୍ରମାଣ ସାର୍ବଜନୀନ ହୋଇଛି। ଆଲୋଚନାଚକ୍ରରେ ମୁଖ୍ୟ ବକ୍ତବ୍ୟଦେଇ ବିମାନ ବାହିନୀ ମୁଖ୍ୟ ମାର୍ଶାଲ ବି.ଏସ୍. ଧନୋଆ କହିଛନ୍ତି ବିଦେଶର ମହଙ୍ଗା ତଥା ପୁରାତନ ଯନ୍ତ୍ରପାତି ଓ ଅସ୍ତ୍ରଶାସ୍ତ୍ର ସ୍ଥାନରେ ଦେଶରେ ନିର୍ମିତ ଅତ୍ୟାଧୁନିକ ଅସ୍ତ୍ରଶସ୍ତ୍ର ଗୁଡ଼ିକୁ ଅନ୍ତର୍ଭୁକ୍ତ କରାଯାଉଛି। ବିମାନବାହିନୀ ବାହିନୀର ଦକ୍ଷତା ବୃଦ୍ଧି ପାଇଁ ଏଥିରେ ଅତ୍ୟାଧୁନିକ ଅସ୍ତ୍ରଶସ୍ତ୍ର ଓ ଯନ୍ତ୍ରପାତି ଅନ୍ତର୍ଭୁକ୍ତ କରିବା ଅତ୍ୟନ୍ତ ଜରୁରୀ। ଭାରତୀୟ ବିମାନବାହିନୀର ଦକ୍ଷତା ବୃଦ୍ଧି ପାଇଁ ଅଧିକ ଯୁଦ୍ଧବିମାନ ସଂଗ୍ରହ ପ୍ରତି ସେ ଗୁରୁତ୍ୱାରୋପ କହିଛନ୍ତି।
