ରେଳ ବଜେଟରେ ରାଜ୍ୟକୁ ମିଳିଛି ୧୦ ହଜାର ୫୮୬ କୋଟି

ଡେସ୍କ: ୨୦୨୪-୨୫ ଆର୍ଥିକ ବଜେଟ ଆଗତ ହେବାର ଗୋଟିଏ ଦିନ ପରେ ଆଜି ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି, ଚଳିତ ବଜେଟରେ ଓଡିଶାକୁ ରେଳ ଅନୁଦାନ ବାବଦକୁ ୧୦ ହଜାର ୫୮୬ କୋଟି ଟଙ୍କା ଅନୁଦାନ ମିଳିଛି। ଗଣମାଧ୍ୟମକୁ ସୂଚନା ଦେଇ ଶ୍ରୀ ବୈଷ୍ଣବ କହିଛନ୍ତି, ୟୁପିଏ ସରକାର ତୁଳନାରେ ଜାତୀୟ ଗଣତାନ୍ତ୍ରିକ ମେଣ୍ଟ ସରକାର ୧୨ ପ୍ରତିଶତ ଅଧିକ ଅନୁଦାନ ଦେଉଛନ୍ତି। ୟୁରିଏ ସରକାର ମାତ୍ର ୮୩୮ କୋଟି ଟଙ୍କା ଅନୁଦାନ ଦେଉଥିବା ବେଳେ ଏବେ ଓଡିଶାକୁ ୧୦ ହଜାର ୫୮୬ କୋଟି ଟଙ୍କା ଅନୁଦାନ ଦିଆଯାଇଛି।

ଶ୍ରୀ ବୈଷ୍ଣବ କହିଛନ୍ତି, ରାଜ୍ୟରେ ଏବେ ୪୦ଟି ରେଳ ପ୍ରକଳ୍ପ ନିର୍ମାଣାଧୀନ ରହିଛି। ସେହି ୪୦ଟି ପ୍ରକଳ୍ପରେ ୫୪ ହଜାର ୪୩୪ କୋଟି ଟଙ୍କା ବିନିଯୋଗ ହେବ। ଗତ ୧୦ ବର୍ଷରେ ରାଜ୍ୟରେ ୪୨୭ଟି ଫ୍ଲାଏ ଓଭର ଓ ଅଣ୍ଡର ପାସ ନିର୍ମାଣ ହୋଇଥିବା ବେଳେ ଶତ ପ୍ରତିଶତ ବିଦ୍ୟୁତିକରଣ କାର୍ଯ୍ୟ ସରିଛି। ଅନ୍ୟପକ୍ଷରେ ଓଡିଶାର ୫୯ଟି ଷ୍ଟେସନକୁ ଅମୃତ ଭାରତ ଷ୍ଟେସନ କରାଯାଉଥିବା ଶ୍ରୀ ବୈଷ୍ଣବ କହିଛନ୍ତି।