ଜୟପୁର : ଦିନିକିଆ ଓଡିଶାଗସ୍ତରେ ଆସିଥିବା କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ କୋରାପୁଟ ଜିଲା ଜୟପୁରରେ ଆୟୋଜିତ ମହିଳା ସମାବେଶରେ ଯୋଗ ଦେଇ ମହିଳା ଦିବସରେ ମହିଳା କାର୍ଡ ଖେଳିଛନ୍ତି । ରାଜ୍ୟରେ କଂଗ୍ରେସ କ୍ଷମତାକୁ ଆସିଲେ ଗରିବ ଛାତ୍ରୀଙ୍କୁ ମାଗଣା ଶିକ୍ଷା ସହ ଝିଅଙ୍କୁ ବିବାହ କିଟ୍ ମିଳିବ ବୋଲି ରାହୁଲ ଗାନ୍ଧୀ କହିଛନ୍ତି । ଏହା ସହ ବିଧବା ଭତ୍ତା ୨ ହଜାର ଟଙ୍କାକୁ ବୃଦ୍ଧି କରାଯିବ । ପ୍ରତି ପଞ୍ଚାୟତରେ ମହିଳାଙ୍କ ପାଇଁ ସ୍ପେଶାଲ ଅଫିସର ରହିବେ । ମହିଳା ଉଦ୍ୟୋଗୀଙ୍କ ପାଇଁ ଫାଇନାନ୍ସିଆଲ କର୍ପୋରେସନ ହେବ ।
ନବୀନ ସରକାରଙ୍କୁ କଡା ସମାଲୋଚନା କରି ରାହୁଲ ଗାନ୍ଧୀ କହିଛନ୍ତି ଯେ, ଓଡିଶାରେ ଅଫିସରଙ୍କ ରାଜ୍ ଚାଲିଛି । ୪ରୁ ୫ ଜଣ ଅଫିସର ଓଡିଶାକୁ ଚଳାଉଛନ୍ତି । ଏଠାରେ ସବୁ ଲାଭ ନବୀନଙ୍କ ବନ୍ଧୁମାନଙ୍କୁ ମିଳୁଛି । ଆମେ ସାଧାରଣ ଜନତାଙ୍କ ସରକାର ବନାଇବାକୁ ଚାହୁଁଛୁ । ଆପଣଙ୍କ ମନ କଥା ଶୁଣି ସରାକର ଚଳାଇବାକୁ ଚାହୁଁଛୁ । ସେହିପରି କେନ୍ଦ୍ର ସରକାରଙ୍କୁ ଟାର୍ଗେଟ କରି ରାହୁଲ କହିଛନ୍ତି ଦୀର୍ଘ ବର୍ଷ ହେଲାଣି ହାଲ୍ ଫାଇଟର ପ୍ଲେନ ତିଆରି କରୁଛି । କେନ୍ଦ୍ର ସରକାର ଦେଶ ଭକ୍ତିର କଥା କହୁଛନ୍ତି, ହେଲେ ବାୟୁସେନାର ଟଙ୍କା ଅମ୍ବାନିକୁ ଦେଉଛନ୍ତି । ଫାଇଟର ପ୍ଲେନ ତିଆରି କରିବାରେ ଅମ୍ବାନିଙ୍କ ଅଭିଜ୍ଞତା ନାହିଁ। କିନ୍ତୁ ଅମ୍ବାନିଙ୍କ ଫାଇଦା ପାଇଁ ଫ୍ରାନ୍ସ କମ୍ପାନୀ ସହ ଡିଲ ହୋଇଛି । ମୋଦୀ ନିଜେ ଅମ୍ବାନିକୁ ୩୦ ହଜାର କୋଟି ଦେଇଛନ୍ତି ।
ଏହା ସହ ରାହୁଲ ଗାନ୍ଧୀ ଆହୁରି ମଧ୍ୟ କହିଛନ୍ତି ଆଦିବାସୀ, କୃଷକଙ୍କ ଜମି ସୁରକ୍ଷା ପାଇଁ କଂଗ୍ରେସ ଚେଷ୍ଟା କରିଛି। ଆପଣଙ୍କ ସ୍ବାର୍ଥ ପାଇଁ କଂଗ୍ରେସ ସଂସଦରେ ସର୍ବଦା ଚେଷ୍ଟା କରିଛି । ଆମେ ଛତିଶଗଡରେ ନିୟମ କରିଛୁ ଯେ ଶିଳ୍ପ ନକଲେ ଜମି ଫେରସ୍ତ କରାଯିବ । ଛତିଶଗଡରେ ଧାନ କ୍ବିଣ୍ଟାଲ ପ୍ରତି ୨୫ ଶହ ମିଳୁଛି ହେଲେ ଓଡିଶାରେ ଧାନ କ୍ବିଣ୍ଟାଲ ପ୍ରତି ୧୬ ଶହ ଟଙ୍କା ଚାଷୀମାନଙ୍କୁ ମଳୁଛି । ଓଡିଶାରେ କଂଗ୍ରେସ ସରକାର ଆସିଲେ ଧାନ କ୍ବିଣ୍ଟାଲ ପ୍ରତି ୨୫ ଶହରୁ କମ ମିଳିବ ନାହିଁ । କୃଷି ଋଣ ଛାଡ ପାଇଁ କେନ୍ଦ୍ର ସରକାର ଘୋଷଣା କରିଥିଲେ ମଧ୍ୟ ନବୀନ ସରକାର ଏହାକୁ ନାଁ କହୁଛନ୍ତି । ୩ଟି ରାଜ୍ୟରେ ମାତ୍ର ୨ ଦିନରେ କୃଷି ଋଣ ଛାଡ କରାଗଲା। ଓଡିଶାରେ କଂଗ୍ରେସ ସରକାର ଆସିବାର ମାତ୍ର ୧୦ ଦିନ ମଧ୍ୟରେ ଋଣ ଛାଡ କରାଯିବ ବୋଲି ରାହୁଲ ପ୍ରତିଶ୍ରୁତି ଦେଇଛନ୍ତି ।
