ପାଟନା: ଗତ ୨୦ବର୍ଷର ଶାସନ କାଳରେ ଏନଡିଏ ସରକାର ବିହାର ପାଇଁ କ’ଣ କରିଛି ତା’ର ଜବାବ ଦେବା ଲାଗି କଂଗ୍ରେସ ସାଂସଦ ପ୍ରିୟଙ୍କା ଗାନ୍ଧୀ ଭଦ୍ରା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ପ୍ରଶ୍ନ କରିଛନ୍ତି। ସୋମବାର ବିହାରର ସୋନବର୍ଷାରେ ନିର୍ବାଚନ ରାଲିକୁ ସମ୍ବୋଧନ କାଳରେ ପ୍ରିୟଙ୍କା କହିଥିଲେ ଯେ ବିହାର ନିର୍ବାଚନ ପାଇଁ ଏନଡିଏର ଇସ୍ତାହାର ପ୍ରକାଶ କରିବା ପୂର୍ବରୁ ପ୍ରଧାନମନ୍ତ୍ରୀ ମୋଦୀ ଓ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଗତ ୨୦ବର୍ଷରେ ରାଜ୍ୟ ପାଇଁ କ’ଣ କରିଛନ୍ତି ତା’ର ହିସାବ ଦେବା ଦରକାର। ସେ କହିଥିଲେ ଯେ ନୀତୀଶ କୁମାର ବିହାର ସରକାରକୁ ଚଳାଉ ନାହାନ୍ତି। ବିହାର ସରକାର ଦିଲ୍ଲୀରୁ ରିମୋଟ୍ କେଣ୍ଟ୍ରାଲ ଦ୍ବାରା ପରିଚାଳିତ ହେଉଛି। ଏନଡିଏ ସରକାର ବିହାରବାସୀଙ୍କ ମତଦାନ ଭଳି ସାମ୍ବିଧାନିକ ଅଧିକାରକୁ ଛିନ୍ନ କରିନେଇଛି। ବିହାର ଯୁବକମାନେ ଯାଇ ଅନ୍ୟ ରାଜ୍ୟରେ କାମ କରୁଛନ୍ତି। ତାଙ୍କ ପାଇଁ ରାଜ୍ୟରେ କୌଣସି କର୍ମନିଯୁକ୍ତି ନାହିଁ। ନିଯୁକ୍ତି ସୁଯୋଗ ସୃଷ୍ଟି କରିବା ଲାଗି ଥିବା ପ୍ରମୁଖ ପିଏସ୍ୟୁଗୁଡିକ ବଡ ବଡ କୋଟିପତିଙ୍କୁ ହସ୍ତାନ୍ତର କରିଦିଆଯାଇଛି। ପ୍ରିୟଙ୍କା କହିଛନ୍ତି ଯେ ପ୍ରଧାନମନ୍ତ୍ରୀ ସବୁବେଳେ କହୁଛନ୍ତି ବିରୋଧୀ ଦଳର ନେତାମାନେ ଦେଶକୁ ଓ ବିହାରକୁ ଅପମାନିତ କରୁଛନ୍ତି। ଏଥିପାଇଁ ପ୍ରଧାନମନ୍ତ୍ରୀ ଅପମାନ ମନ୍ତ୍ରଣାଳୟ ଖୋଲିବା ଦରକାର।
Popular Categories
Previous article
Next article