ପିପିଲି: ପିପିଲି ଥାନା କୌଶଲ୍ୟାଗଙ୍ଗ ଫାଣ୍ଡି ଅନ୍ତର୍ଗତ ଗୁଡିଆପୋଖରୀ ବଜାର ନିକଟବର୍ତ୍ତୀ ବଙ୍ଗାଳୀସାହିରେ ନିର୍ମାଣାଧିନ ଏକ କୋଠାଘର ମଧ୍ୟରୁ ଜଣେ ଅଚିହ୍ନା ଯୁବକର ଗଳିତ ମୃତଦେହକୁ ପୁଲିସ ରବିବାର ଜବତ କରିଛି। ଉକ୍ତ କୋଠାର ଲିଫ୍ଟ ଘର ମଧ୍ୟରେ ଯୁବକ ଜଣକ ତଳକୁ ମୁହଁମାଡି ପଡ଼ିଥିବା ବେଳେ ଶରୀର ସାରା ପୋକ ସାଲୁବାଲୁ ହେଉଥିବା ପରିଲକ୍ଷିତ ହୋଇଥିଲା। ପାରିପାର୍ଶ୍ବିକ ଅବସ୍ଥାରୁ ଏହା ଏକ ଯୋଜନାବଦ୍ଧ ହତ୍ୟାକାଣ୍ଡ ବୋଲି ସାଧାରଣରେ ସନ୍ଦେହ ପ୍ରକାଶ ପାଇଛି। ମୃତ ଯୁବକର ପରିଚୟ ଜଣାପଡ଼ିନଥିବା ବେଳେ ପୁଲିସ ମୃତଦେହର ପଞ୍ଚାନାମା କରିବା ପରେ ବ୍ୟବଚ୍ଛେଦ ପାଇଁ କଟକ ସ୍ଥିତ ଏଫ୍ଏମ୍ଟି ବିଭାଗକୁ ପଠାଇ ଘଟଣାର ତଦନ୍ତ ଚଳାଇଛି।
ସୂଚନା ଅନୁଯାୟୀ, ବଙ୍ଗାଳୀସାହିରେ ଥିବା ପୁରୁଣା ଭୁବନେଶ୍ୱର ଅଞ୍ଚଳର ବାସିନ୍ଦା ଅଜୟ ମହାପାତ୍ରଙ୍କ ନିର୍ମାଣାଧିନ ୪ମହଲା ବିଶିଷ୍ଟ କୋଠାଘର ମଧ୍ୟରୁ ପ୍ରବଳ ଦୁର୍ଗନ୍ଧ ବାହାରିଥିଲା। ଏ ସଂପର୍କରେ ସ୍ଥାନୀୟ ଲୋକଙ୍କ ଠାରୁ ଖବର ପାଇ ପିପିଲି ଆଇଆଇସି ଅଭିମନ୍ୟୁ ନାୟକ, କୌଶଲ୍ୟାଗଙ୍ଗ ଫାଣ୍ଡି ଅଧିକାରୀ ସୌମ୍ୟରଞ୍ଜନ ଜେନା, ଏସ୍ଆଇ ସନ୍ଦୀପ କୁମାର ଦାସ, ଏଏସ୍ଆଇ ପ୍ରକାଶ ମଲ୍ଲିକ ପ୍ରମୁଖ ରବିବାର ପୂର୍ବାହ୍ନରେ ଘଟଣାସ୍ଥଳରେ ପହଞ୍ଚିଥିଲେ। ଘର ମାଲିକ ଅଜୟଙ୍କ ଉପସ୍ଥିତିରେ ଘରର ତାଲା ଖୋଲାଯିବାରେ ଉକ୍ତ କୋଠାର ଲିଫ୍ଟ ଘର ମଧ୍ୟରେ ଜଣେ ଅଚିହ୍ନା ଯୁବକ ତଳକୁ ମୁଁହମାଡି ପଡ଼ିଥିବା ପରିଲକ୍ଷିତ ହୋଇଥିଲା। ମୃତଦେହଟି ସଂପୂର୍ଣ୍ଣ ପଚିଯାଇ ପ୍ରବଳ ଦୁର୍ଗନ୍ଧ ହେଉଥିବା ବେଳେ ତା’ ଦେହ ସାରା ପୋକ ସାଲୁବାଲୁ ହେଉଥିବା ପରିଲକ୍ଷିତ ହୋଇଥିଲା।
ମୃତକ ଜଣକ ଏକ ଗାଢ ନୀଳ ରଙ୍ଗର ଟ୍ରାକ୍ସୁଟ୍ ଓ ହାଲୁକା ନୀଳ ରଙ୍ଗର ବନିଆନ ପିନ୍ଧିଥିବା ଦେଖିବାକୁ ମିଳିଥିଲା। ମୃତକର ଆନୁମାନିକ ବୟସ ୩୦ରୁ ୩୫ ବର୍ଷ ମଧ୍ୟରେ ହୋଇଥିବା ଏବଂ ୧୦ରୁ ୧୨ ଦିନ ମଧ୍ୟରେ ଯୁବକର ମୃତ୍ୟୁ ଘଟିଥିବାର ପୁଲିସ ଅନୁମାନ କରୁଛି। ମୃତକର ପରିଚୟ ଜଣାପଡ଼ିନଥିବା ବେଳେ ପୁଲିସ ମୃତଦେହକୁ ଜବତ କରି ପଞ୍ଚାନାମା କରିବା ପରେ ବ୍ୟବଚ୍ଛେଦ ପାଇଁ କଟକ ସ୍ଥିତ ଏଫ୍ଏମ୍ଟି ବିଭାଗକୁ ପଠାଇଛି। ଏନେଇ ପିପିଲି ଥାନାରେ ଏକ ଅପମୃତ୍ୟୁ ମାମଲା ରୁଜୁ ହୋଇଥିବା ବେଳେ ପୁଲିସ ଘଟଣାର ତଦନ୍ତ ଜାରି ରଖିଛି। ତେବେ ଭୁବନେଶ୍ୱର-ପୁରୀ ଜାତୀୟ ରାଜପଥ ଠାରୁ ମାତ୍ର ୭୦ମିଟର ବ୍ୟବଧାନରେ ଥିବା ଏହି କୋଠାଘରଟି ୩ମାସ କାଳ ତାଲା ପଡ଼ି ବନ୍ଦ ହୋଇ ରହିଥିବା ବେଳେ ତା’ ଭିତରକୁ ଯୁବକ ଜଣକ କିପରି ଗଲେ ସେନେଇ ସାଧାରଣରେ ନାନା ପ୍ରଶ୍ନବାଚୀ ସୃଷ୍ଟି ହୋଇଛି। ଉକ୍ତ ଘରକୁ ଲାଗିକରି ଥିବା ଅନ୍ୟଏକ ନିର୍ମାଣାଧିନ ଘରର ଛାତ ଦେଇ ଯୁବକ ଜଣକ ଉକ୍ତ ଘର ମଧ୍ୟକୁ ଯାଇଥାଇପାରେ ଏବଂ ଅସାବଧାନତା ବଶତଃ ଉକ୍ତ ଅର୍ଦ୍ଧନିର୍ମିତ ଲିଫ୍ଟ ଘର ମଧ୍ୟରେ ଖସି ପଡ଼ି ମୃତ୍ୟୁବରଣ କରିଥାଇପାରେ ବୋଲି ପୁଲିସ ଅନୁମାନ କରୁଛି। ଅନ୍ୟପକ୍ଷରେ ଏହା ଏକ ଯୋଜନାବଦ୍ଧ ହତ୍ୟାକାଣ୍ଡ ହୋଇଥାଇପାରେ ବୋଲି ସାଧାରଣରେ ସନ୍ଦେହ ପ୍ରକାଶ ପାଇଛି। ତେବେ, କେଉଁ ପରିସ୍ଥିତିରେ ଯୁବକ ଜଣକ ଉକ୍ତ ଘର ମଧ୍ୟକୁ ଗଲା ସେନେଇ ପୁଲିସ ଖୋଳତାଡ଼ ଚଳାଇବା ସହ ଯୁବକଙ୍କ ପରିଚୟ ଜାଣିବା ପାଇଁ ଉଦ୍ୟମ ଜାରି ରଖିଛି। ବ୍ୟବଚ୍ଛେଦ ରିପୋର୍ଟ ମିଳିବା ପରେ ମୃତ୍ୟୁର କାରଣ ସ୍ପଷ୍ଟ ହେବ ବୋଲି ପୁଲିସ କହିଛି। ଏହି ଘଟଣାଟି ଗୁଡିଆପୋଖରୀ ଅଞ୍ଚଳରେ ଆଲୋଡନ ସୃଷ୍ଟି କରିଛି।
Comments are closed.