ଫୁଲବାଣୀ: କନ୍ଧମାଳ ଜିଲା ଟିକାବାଲି ଥାନା ଅନ୍ତର୍ଗତ ଶଙ୍କରାଖୋଲ ନିକଟସ୍ଥ କୋଚିଲାଗଡ଼ ଠାରେ ଏକ କାର୍ ଭାରସାମ୍ୟ ହରାଇ ରାସ୍ତା ପାର୍ଶ୍ବରେ ଥିବା ଏକ ଗଛରେ ପିଟିହୋଇଯାଇଥିଲା। ଫଳରେ ଘଟଣା ସ୍ଥଳଣେ ଜଣଙ୍କର ମୃତ୍ୟୁ ହୋଇଥିବା ବେଳେ ଅନ୍ୟଜଣେ ଗୁରୁତ୍ୱର ଆହତ ହୋଇଛନ୍ତି। ମୃତ୍ୟୁବରଣ କରିଥିବା ବ୍ୟକ୍ତି ଜଣକ ଫୁଲବାଣୀ ଅଞ୍ଚଳର ଅଶ୍ୱିନୀ ମିଶ୍ର ଓ ଆହତ ଜଣକ ଟିକାବାଲି ବ୍ଳକର ବିଦ୍ୟୁତ୍ ବିଭାଗର କନିଷ୍ଠଯନ୍ତ୍ରୀ ଅନିଲ୍ କୁମାର ପରିଡ଼ା ବୋଲି ଜଣାଯାଇଛି। ଅଫିସ୍ କାର୍ଯ୍ୟରେ କର୍ମଚାରୀ ଅଶ୍ୱିନୀ ଓ ଯନ୍ତ୍ରୀ ମିଶି ଟିକାବାଲି ଆଡ଼କୁ ଯାଉଥିବା ବେଳେ ଶଙ୍କରାଖୋଲ ନିକଟ କୋଚିଲାଗଡ଼ର ଏକ ବୁଲାଣିରେ ଗାଡ଼ିଟି ଭାରସାମ୍ୟ ହରାଇ ଗଛରେ ପିଟି ହୋଇଯାଇଥିଲା। ଖବର ପାଇ ସ୍ଥାନୀୟ ଅଞ୍ଚଳବାସୀ ଘଟଣା ସ୍ଥଳରେ ପହଞ୍ଚି ଉଦ୍ଧାର କରିବା ସହିତ ତୁରନ୍ତ ଅଗ୍ନିଶମ ବାହିନୀକୁ ଖବର ଦେଇଥିଲେ। ଅଗ୍ନିଶମ ବାହିନୀ ଘଟଣା ସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିବା ସହିତ ଆହତ ଯନ୍ତ୍ରୀଙ୍କୁ ଚିକିତ୍ସାପାଇଁ ଫୁଲବାଣୀ ମୁଖ୍ୟ ଚିକିତ୍ସାଳୟକୁ ପଠାଇଛନ୍ତି। ଟିକାବାଲି ପୁଲିସ୍ ଏନେଇ ଏକ ମାମଲା ରୁଜୁକରିବା ସହିତ ତଦନ୍ତ କରୁଛି। ଖବର ପାଇ ବିଦ୍ୟୁତ୍ ବିଭାଗର ନିର୍ବାହୀ ଯନ୍ତ୍ରୀ ଇଂ.ମନୋଜ କୁମାର ମହାନ୍ତି ଓ ଅନ୍ୟ ଅଧିକାରୀମାନେ ଫୁଲବାଣୀ ମୁଖ୍ୟ ଚିକିତ୍ସାଳୟରେ ପହଞ୍ଚି ଆହତ ଯନ୍ତ୍ରୀଙ୍କ ଚିକିତ୍ସା ବ୍ୟବସ୍ଥା ବୁଝିଥିବା ବେଳେ ଟିକାବାଲି ପୁଲିସ୍ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ଫୁଲବାଣୀ ମୁଖ୍ୟ ଚିକିତ୍ସାଳୟକୁ ପଠାଇଛି। ଏହି ଘଟଣା ପରେ ଟିକାବାଲି ବିଦ୍ୟୁତ୍ ବିଭାଗ କର୍ମଚାରୀଙ୍କ ମଧ୍ୟରେ ଶୋକରଛାୟା ଖେଳିଯାଇଛି।
Comments are closed.