କୁକୁର, ବିଲେଇଙ୍କୁ କରୋନା ସଂକ୍ରମଣ ଆଶଙ୍କା କ୍ଷୀଣ

ନ୍ୟୁୟର୍କ : ଘରେ କୁକୁର ଓ ବିଲେଇ ପାଳିଥିବା ଲୋକଙ୍କ ପାଇଁ ଖୁସି ଖବର । ଗୃହପାଳିତ ଏହି ପଶୁମାନଙ୍କୁ କରୋନା ସଂକ୍ରମଣ ଆଶଙ୍କା ଆପାତତଃ କ୍ଷୀଣ । ତେବେ ସେମାନଙ୍କୁ ମଧ୍ୟ ସାମାଜିକ ଦୂରତ୍ବ ମଧ୍ୟରେ ରଖାଯିବା ଆବଶ୍ୟକ । ମାର୍କିନ ପ୍ରାଣୀ ବିଶେଷଜ୍ଞମାନେ ଏ ସମ୍ପର୍କରେ ସ୍ପଷ୍ଟ କରିଛନ୍ତି। ନ୍ୟୁୟର୍କ ଡ଼େଲିରେ ପ୍ରକାଶିତ ରିପୋର୍ଟ ଅନୁସାରେ କରୋନା ସଂକ୍ରମଣ ସମୟରେ ଗୃହପାଳିତ ପଶୁମାନଙ୍କୁ ବାହାରକୁ ଛାଡ଼ିବା ଉଚିତ୍ ନୁହେଁ । ସେମାନଙ୍କୁ କୁକୁର ଉଦ୍ୟାନ ବା ବାହାରକୁ ବୁଲାଇବା ପାଇଁ ନେବା ମଧ୍ୟ ଅନୁଚିତ୍ । ଅନୁରୂପ ଭାବରେ ଘରେ ଯଦି କେହି କରୋନା ସଂକ୍ରମିତ ଥାଆନ୍ତି ତେବେ ସେମାନଙ୍କ ନିକଟକୁ ଏହି ପଶୁମାନଙ୍କୁ ନିଆଯିବା ମଧ୍ୟ ଉଚିତ ନୁହେଁ ।
ଆମେରିକାନ କେନେଲ କ୍ଲବର ମୁଖ୍ୟ ପଶୁ ଚିକିତ୍ସା ଅଧିକାରୀ ଡ଼ା. ଜେରି କ୍ଲେନଙ୍କ ମତରେ କୁକୁର ବା ବିରାଡ଼ି କରୋନା ଆକ୍ରାନ୍ତ ହୋଇ ମୃତ୍ୟୁବରଣ କରିବେ ନାହିଁ । ତେବେ ସେମାନେ ଏହାଯୋଗୁଁ ବେମାର ହୋଇ ପାରନ୍ତି । ଆମେରିକାର ଏକ ଚିଡ଼ିଆଖାନାରେ ଏକ ବାଘ କରୋନା ଆକ୍ରାନ୍ତ ହେବା ପରେ ଘରୋଇ ପଶୁପକ୍ଷୀମାନଙ୍କୁ ଏହା ବ୍ୟାପିପାରେ ବୋଲି କେହିକେହି ଆଶଙ୍କା କରିଥିଲେ । ହଂକଂ ଓ ବେଲଜିୟମରେ ଗୋଟିଏ ଲେଖାଏଁ କୁକୁର ଓ ବିରାଡ଼ି କରୋନା ସଂକ୍ରମିତ ହୋଇଥିବା ରିପୋର୍ଟକୁ ନେଇ ଡ଼ା. ଜେରି କହିଛନ୍ତି ଯେ ଏହା ଘଟିବା ବିଶ୍ବାସ କରାଯାଇପାରେ କିନ୍ତୁ ଆମେରିକାରେ ସେପରି କିଛି କେଉଁଠି ଘଟିନାହିଁ ।
ଅନୁରୂପ ଭାବରେ ଆମେରିକା ଭେଟେନାରୀ ମେଡ଼ିକାଲ ଆସୋସିଲସନ (ଏଭିଏମଏ)ର ପୂର୍ବତନ ସଭାପତି ଡ଼ା. ଜନ୍ ଡ଼ି ଜଙ୍ଗ କହିଛନ୍ତି ଯେ କୁକୁର ବା ବିରାଡ଼ି ଦ୍ବାରା କରୋନା ସଂକ୍ରମିତ ହେବାର କୌଣସି ଠୋସ୍ ପ୍ରମାଣ ଏଯାବତ୍ ମିଳିନାହିଁ । ମାତ୍ର ପଶୁର ଲୋମରେ ଯଦି କରୋନା ଭୂତାଣୁ କାହାଠାରୁ ଆସିଥାଏ ତେବେ ତାହା ଅନ୍ୟମାନଙ୍କୁ ବ୍ୟାପିବାର ଆଶଙ୍କାରହିଛି ।