ନ୍ୟୁୟର୍କ – ଆମେରିକାର ବୋଷ୍ଟନ ବିଶ୍ୱବିଦ୍ୟାଳୟର ପରୀକ୍ଷାଗାରରେ ଭୟଙ୍କର କୋଭିଡ୍ ଭୁତାଣୁ ଗବେଷକମାନେ ତିଆରି କରିଥିବା ଦାବି କରିଛନ୍ତି । ଏହାକୁ କୃତ୍ରିମ ଉପାୟରେ ତିଆରି କରାଯାଇଛି । ଓମିକ୍ରନ୍ର ସ୍ପାଇକ୍ ପ୍ରୋଟିନ୍ ଏବଂ ମୂଳ କୋଭିଡ୍ -୧୯ ଭୁତାଣୁର ସମିଶ୍ରଣରେ ଏହାକୁ ଗବେଷକମାନେ ପ୍ରସ୍ତୁତ କରିଛନ୍ତି । ଏହି ଭୁତାଣୁ ଭୁଲ୍ରେ ବି ବାହାରକୁ ଆସିଲେ ଏଥିରେ ୮୦ ପ୍ରତିଶତ ଆକ୍ରାନ୍ତଙ୍କ ମୃତ୍ୟୁ ହେବ ବୋଲି ବିଭିନ୍ନ ଅନ୍ତର୍ଜାତୀୟ ଏବଂ ବିଦେଶୀ ଖବର ପ୍ରସାରଣ ସଂସ୍ଥାରେ ଖବର ପ୍ରକାଶିତ ହୋଇଛି । ଏହି ଖବର ପ୍ରକାଶିତ ପରେ ବୋଷ୍ଟନ ସାଧାରଣ ସ୍ୱାସ୍ଥ୍ୟ କମିଶନ ଏବଂ ରିଭ୍ୟୁ କମିଟି ବିଶ୍ୱବିଦ୍ୟାଳର ପରୀକ୍ଷାଗାରରେ ପହଞ୍ଚି ଏହାର ତଦନ୍ତ ଆରମ୍ଭ କରିଛନ୍ତି । ଏଥିପାଇଁ କୌଣସି ବିପଦ ନଥିବା ଏବଂ ଏହି ଗବେଷଣା ପାଇଁ ଅନ୍ତରୀଣ ଅନୁମତି ପ୍ରଦାନ କରାଯାଇଥିବା ବୋଷ୍ଟନ ସାଧାରଣ ସ୍ୱାସ୍ଥ୍ୟ କମିଶନ କହିଛନ୍ତି ।
ତେବେ ଘଟଣାର ପୁଙ୍ଖାନୁପଙ୍ଖ ତଦନ୍ତ କରାଯିବ । ମିଡିଆକୁ କିପରି ଖବର ଲିକ୍ ହେଲା ଏବଂ କାହିଁକି ଏ ବିଷୟରେ କମିଶନ୍ ଗଣମାଧ୍ୟମରୁ ସୂଚନା ପାଇଲେ ସେ ବିଷୟରେ ଜବାବ୍ ମଗାଯାଇଥିବା କୁହାଯାଇଛି ।
ଗବେଷକମାନେ ଏ ବିଷୟରେ ଅନ୍ଲାଇନ୍ରେ ଏକ ପୋଷ୍ଟ କରିଥିଲେ । ମୂଳ କୋଭିଡ୍ ଭୁତାଣୁ ଏବଂ ଓମିକ୍ରନ୍ର ସ୍ପାଇକ୍ ପ୍ରୋଟିନ୍ର ମିଶ୍ରଣରେ ଏକ ପାଥୋଜେନ୍ ବା ନୂଆ ପ୍ରକରଣ ଲାବୋରେଟୋରୀରେ ବିକାଶ କରାଯାଇଥିବା ସୂଚନା ଦେଇଥିଲେ ।
ଏହା ଲୋକଙ୍କ ମଧ୍ୟରେ ଟିକା ଏବଂ ପୂର୍ବ ସଂକ୍ରମଣର ପ୍ରତିରୋଧକ ଶକ୍ତିକୁ ପ୍ରତିହତ କରିପାରେ ବୋଲି କୁହାଯାଇଥିଲା । ଏହାକୁ ପରୀକ୍ଷଣ କରାଯାଇଥିବା ୮୦ ପ୍ରତିଶତ ମୂଷାଙ୍କର ମୃତ୍ୟୁ ହୋଇଥିବା କଥା ରିପୋର୍ଟରେ ଦର୍ଶାଯାଇଛି । ଏପରି ଗବେଷଣା ସମୟରେ ଅଧିକ ସତର୍କ ରହିବା ପାଇଁ ସେଠାକାର ପ୍ରଶାସନ ପକ୍ଷରୁ କୁହାଯାଇଛି ।
