ପାଟଣାଗଡ – ସ୍ଥାନୀୟ ପୁଲିସର ଅପାରଗତାର ସୁଯୋଗ ନେଇ ମାତି ଉଠିଛନ୍ତି ଲୁଟିଆ । ଗୁରୁବାର ସକାଳେ ଯୋଗିମୁଣ୍ଡାର ଜଣେ ପରିବା ବିକାଳୀଙ୍କୁ ପ୍ରାଣାନ୍ତକ ଆକ୍ରମଣ କରି ବାଇକ୍ ଏବଂ ୮ ହଜାର ଟଙ୍କା ଲୁଟ ହେବା ପରେ ସଂଧ୍ୟାରେ ସ୍ଥାନୀୟ ଗଙ୍ଗାନଗରରେ ରହୁଥିବା ଜଣେ ସୁନା ବେପାରୀ ବିନୋଦ ସା(୪୦)ଲୁଟିଆଙ୍କ ଶୀକାର ହୋଇଥିବା ଜଣାଯାଇଛି । ଆଜି ଗୋଟିଏ ଦିନରେ ୨ଟି ଲୁଟ୍ ଘଟଣା ଘଟିଯାଇଥିଲେ ମଧ୍ୟ ପୁଲିସର ନିଷ୍କ୍ରିୟତା ଅଞ୍ଚଳବାସୀଙ୍କ ମଧ୍ୟରେ ଭୟ ଏବଂ ଆତଙ୍କର ବାତାବରଣ ସୃଷ୍ଟି କରିଛି । ଏହାସହ ପୁଲିସକୁ ଲୁଟିଆଙ୍କ ଏହା ଖୋଲା ଚ୍ୟାଲେଞ୍ଜ ବୋଲି ବିବେଚନା କରାଯାଉଛି ।
ପ୍ରକାଶ ଯେ, ନିକଟସ୍ଥ ଅପୁରସାଗର ଗ୍ରାମର ମୂଳ ନିବାସୀ ବିନୋଦ ସା ସ୍ଥାନୀୟ ଗଙ୍ଗାନଗରରେ ଏକ ଘରେ ରହୁଥିବା ସହ ଚୂଡାପାଲିଠାରେ ଗାୟତ୍ରୀ ଜୁଏଲର୍ସ ନାମରେ ଏକ ସୁନା ଗହଣା ଦୋକାନ ଖୋଲିଛନ୍ତି । ସବୁଦିନ ଭଳି ଗୁରୁବାରରେ ଦୋକାନ ବନ୍ଦ କରି ନିଜ ଆପାଚି ବାଇକ୍ ନମ୍ବର ଓଡି୦୩ୟୁ-୬୩୧୧ରେ ସେ ନିଜ ଘରକୁ ଫେରୁଥିଲେ । ସଂଧ୍ୟା ପ୍ରାୟ ୬ ଘଣ୍ଟା ୨୦ ମିନିଟ ସମୟରେ ୨ ଜଣ ଦୁର୍ବୃତ୍ତ(ବାଇକ୍ ଆରୋହୀ) ତାଙ୍କୁ ପିଛା କରି ଆସି ବଲାଙ୍ଗିର ରାସ୍ତାର ଧୁବଳପଡା-ଭଇଁଷା ମଧ୍ୟରେ ପଛପଟୁ ଲାତ ମାରିବା ପରେ ବିନୋଦ ତଳେ ପଡିଯାଇଥିଲେ । ଦୁର୍ବୃତ୍ତ ମାନେ ଏକ ଛୁରୀରେ ବିନୋଦଙ୍କୁ ଆକ୍ରମଣ କରି ସେ ନିଜ ପିଠିରେ ଟାଙ୍ଗିଥିବା ବ୍ୟାଗକୁ ଛଡାଇବାକୁ ଉଦ୍ୟମ କରିଥିଲେ ହେଁ ବିଫଳ ହୋଇଥିଲେ । ତେବେ ନଗଦ ଟଙ୍କା ସହ ବିଭିନ୍ନ ଏଟିଏମ୍ କାର୍ଡ, କ୍ରେଡିଟ କାର୍ଡ ଇତ୍ୟାଦି ଥିବା ବିନୋଦଙ୍କ ମନିପର୍ସକୁ ଛଡାଇ ନେବାରେ ଲୁଟିଆମାନେ ସଫଳ ହୋଇଥିବା ଜଣାଯାଇଛି ।
ଛୁରୀମାଡରେ ବିନୋଦଙ୍କ ଡାହାଣ ହାତରେ ଦୁଇଟି ସ୍ଥାନରେ ଗଭୀର କ୍ଷତ ହୋଇଥିବା ବେଳେ ଶରୀରର ବିଭିନ୍ନ ସ୍ଥାନରେ କ୍ଷତ ହୋଇଥିବା ଜଣାଯାଇଛି । ଖବର ପାଇ ବଣିକ ସଂଘ ସଭାପତି ରାଜେଶ ମେହେର, ସୁନାରୀ ସଂଘର ସୁଶାନ୍ତ ମେହେର ଏବଂ ଅନ୍ୟାନ୍ୟ ସଦସ୍ୟ, ଉଠାଦୋକାନୀ ସଂଘର ଡଗରେଶ୍ୱର ମେହେର ଏବଂ ଅନ୍ୟମାନେ ପହଞ୍ଚି ବିନୋଦ୍କୁ ଡାକ୍ତରଖାନାରେ ଚିକିତ୍ସା କରାଇବା ସହ ପାଟଣାଗଡ ଥାନାରେ ପହଞ୍ଚିଛନ୍ତି । ତେବେ ପାଟଣାଗଡ ଅଞ୍ଚଳରେ ହତ୍ୟା, ରାହାଜାନୀ, ଡକାୟତି ଇତ୍ୟାଦି ଘଟଣାମାନ ବୃଦ୍ଧି ପାଉଥିବା ବେଳେ ପୁଲିସର ନିଷ୍କ୍ରିୟତାକୁ ନେଇ ଗଭୀର ଉଦବେଗ ପ୍ରକାଶ କରିଛି ବଣିକ ସଂଘ । ପୁଲିସ ପେଟ୍ରୋଲିଂ ବ୍ୟବସ୍ଥାକୁ କଡାକଡି କରିବା ସହ ବିଗତ ଦିନରେ ସ୍ପଷ୍ଟ ଦିବାଲୋକରେ ଏକ ସୁନା ଗହଣା ଦୋକାନରୁ ହୋଇଥିବା ଡକାୟତି ଘଟଣା ସହ ନିକଟରେ ଘଟିଯାଇଥିବା ଲୁଟ୍ ଘଟଣା ଗୁଡିକର ପର୍ଦ୍ଦାଫାସ କରି ଦୁର୍ବୃତ୍ତମାନଙ୍କୁ ଧରିବାକୁ ଦାବୀ କରିଛି ବଣିକ ସଂଘ । ଏହାଛଡା ଆଗାମୀ ୧୫ ଦିନ ମଧ୍ୟରେ କୌଣସି ସୁଫଳ ନ ମିଳିଲେ ସଂଘ ରାଜରାସ୍ତାକୁ ଓହ୍ଲାଇବାକୁ ବାଧ୍ୟ ହେବ ବୋଲି କହିଛନ୍ତି ସଂଘର ସଭାପତି ରାଜେଶ ମେହେର ।
Comments are closed.